Veðrátta í ágúst var hagstæð um land allt, nokkuð hvasst var þó þann 29. að því er fram kemur í yfirliti á vef Veðurstofu Íslands.
Meðalhiti í Reykjavík var 11,5 stig og er það 1,2 stigum ofan meðallags og er níundi hlýjasti ágústmánuður frá upphafi mælinga. Talsvert hlýrra var í ágúst 2003 og 2004. Á Akureyri var meðalhitinn einnig 11,5 stig og er það 1,5 stigum ofan meðallags. Á Höfn í Hornafirði var meðalhitinn 10,9 stig, 0,7 stigum ofan meðallags og 7,7 stig á Hveravöllum og er það 1,5 stigum ofan meðallags.

Þungt hljóð er í sauðfjárbændum og telja þeir framtíðarhorfur greinarinnar slæmar. Þeir segja að hækkun á afurðaverði sem sláturleyfishafar boða nægi engan veginn til að vega upp hækkanir sem orðið hafa á tilkostnaði. Margir bændur munu hugleiða að bregða búi ef ástandið batnar ekki.
Sláturleyfishafar telja sig á hinn bóginn ekki hafa svigrúm til að hækka afurðaverð á lambakjöti. Hár vaxtakostnaður geri birgðahald ákaflega dýrt og eins muni markaðurinn ekki kyngja því að lambakjöt hækki langt umfram aðrar kjöttegundir.

Um 12.000 manns lögðu leið sína á Landbúnaðarsýningu og Töðugjöld á Hellu um helgina og er óhætt að segja að mætingin hafi farið fram úr björtustu vonum en gert hafði verið ráð fyrir 5.000-8.000 gestum. Gestir komu hvaðanæva að af landinu, úr þéttbýli jafnt sem dreifbýli, ungir sem aldnir. Sumir komu jafnvel lengra að, t.d. stór hópur grænlenskra bænda sem brá sér til Íslands gagngert til að skoða Landbúnaðarsýninguna.

Vegna Landbúnaðarsýningarinnar áHellu helgina 22.-24. ágúst verða skrifstofur Búnaðarsambandsins lokaðar föstudaginn 22. ágúst, þ.e. á morgun.

Við hvetjum bændur og búalið sem og aðra landsmenn til þess að mæta á Landbúnaðarsýninguna og berja augum íslenskan landbúnað dag.

Verið velkomin á Hellu dagana 22.-24. ágúst. Við tökum vel á móti ykkur.

Í ár fagnar Búnaðarsamband Suðurlands 100 ára afmæli sínu og af því tilefni er nýkomið út 100 ára afmælisrit Búnaðarsambandsins þar sem rakin er saga sambandsins s.l. 100 ár. Bókina ritaði Páll Lýðsson heitinn, bóndi og sagnfræðingur í Litlu-Sandvík. S.l. mánudagskvöld afhenti Guðbjörg Jónsdóttir, formaður BSSL, þeim Elínborgu Guðmundsdóttur, ekkju Páls Lýðssonar og Þorfinni Þórarinssyni, fyrrverandi formanni BSSL, fyrstu eintökin af bókinni.

Íslenskt heilhveiti kemur á markaðinn í haust. Ólafur Eggertsson, bóndi á Þorvaldseyri undir Eyjafjöllum, hefur ræktað það um árabil en hingað til aðeins notað það sem skepnufóður.
Ólafur hefur kynnt sér hveitirækt í Noregi og Svíþjóð og gert eigin tilraunir til að athuga hvaða afbrigði henta best.

Móðurlaust folald var tekið í fóstur af mjólkandi hryssu með folald. Tókst þetta afar vel og annast hryssan bæði folöldin jafn vel. Fyrr í sumar gerðist sá leiðinlegi atburður að hryssan Ástríða frá Feti veiktist illa og féll. Ástríða var háættuð fyrstu verðlauna hryssa í eigu hrossaræktarbúsins Fets. Var hún undan Orra frá Þúfu og gæðingamóðurinni Ásdísi frá Neðra-Ási.

Í kjölfar útgáfu fjórðu úttektar Milliríkjanefndar Sameinuðu þjóðanna um loftslagsbreytingar (IPCC) skipaði Þórunn Sveinbjarnardóttir umhverfisráðherra vísindanefnd um loftslagsbreytingar á haustdögum 2007 og fól henni að skila skýrslu um líkleg áhrif hnattrænna loftslagsbreytinga á Íslandi. Nefndin skilaði skýrslu fyrir skömmu og í henni kemur fram að áhrif hlýnunar á gróðurfar eru þegar umtalsverð. Aukning hefur orðið á gróðri á síðustu árum og áratugum og samtímis hafa skógarmörk birkis færst ofar í landið. Að minnsta kosti ein fjallaplanta sem fylgst hefur verið með, fjallkrækill, er talin á undanhaldi vegna hlýnunar. Þá hafa aðstæður til kornræktar og skógræktar batnað með hlýnandi loftslagi.

Á laugardaginn nk. stendur mikið til hjá Borgfirðingum. Er þá ætlunin að minnast tveggja merkra viðburða í landbúnaðar- og samgöngusögu Íslands. Í tilkynningu Landbúnaðarsafns Íslands á Hvanneyri kemur fram að frá klukkan 11 til 15:30 verði dagskrá á Hvanneyri helguð dráttarvélum en um þessar mundir eru 90 ár frá því fyrsta dráttarvélin kom til lands á Akranesi. Verða nokkrar af elstu og yngstu dráttarvélum þar til m.a. til sýnis. Þegar dagskránni er lokið á Hvanneyri verður haldið inn að Hvítárbrú við Ferjukot, en þangað eru 6 km. Þar á að minnast þess að 80 ár eru liðin frá því að brúin var vígð.

Von er á 29 manna hóp grænlenskra bænda á Landbúnaðarsýninguna á Hellu. Um er að ræða hóp frá Vatnahverfi á Suður-Grænlandi sem kemur til Íslands gagngert til að heimsækja sýninguna. Vatnahverfi er nálægt bæjunum Narsarsuaq og Qassiaruk.

Bændur eru farnir að hugleiða að skipta yfir í lífræna ræktun vegna hækkandi verðs á kjarnfóðri, tilbúnum áburði og skordýraeitri . Hér á landi fá bændur þó ekki aðstoð til að breyta yfir í lífræna ræktun líkt og annars staðar í Evrópu.

Lítið þokaðist í gærkvöld og nótt í Doha-viðræðunum svokölluðu hjá Alþjóðaviðskiptastofnuninni í Genf í Sviss. Þar er nú reynt að útkljá ýmis deilumál um alþjóðaviðskipti svo sem um tollfrjálsa verslun með landbúnaðarvörur. Aðeins er tímaspursmál hvenær breyta þarf styrkja- og niðurgreiðslukerfi landbúnaðarins á Íslandi, segir Sigurgeir Þorgeirsson, aðalfulltrúi Íslands í viðræðunum.

Kjósverjar buðu til mikillar hátíðar um síðustu helgi en þetta er í annað sinn þeir bjóða gestum í sveitina undir nafninu “Kátt í kjósinni”. Veðrið lék við gesti sem heimsóttu bændur og kynntu sér það fjölbreytta starf sem unnið er í Kjósinni. Í Félagsgarði var haldinn sveitamarkaður þar sem m.a. voru seldar og kynntar framleiðsluvörur af svæðinu, s.s. nautakjöt, broddur, sultur, mjólkurvörur frá Mjólku, skart og ullarvörur.

Nokkrir aðilar innan skógræktargeirans á Íslandi slá sér saman um að kynna skógrækt á Íslandi og þau störf sem þessi tiltölulega nýlega búgrein hefur skapað. Þessir aðilar eru Skógrækt ríkisins, Suðurlandsskógar, Hekluskógar og Landssamtök skógareigenda. Ætlunin er að reisa skógarhús þar sem starfsemin verður kynnt í máli og myndum og þar geta áhugasamir kynnt sér hvar best sé að sækja ráðgjöf um skógrækt. Þá verða vélar tengdar skógariðnaðinum til sýnis og hugmyndir eru uppi um að sýna í notkun sérstaka plöntunarvél á fyrirfram ákveðnum tímum yfir sýningardagana.

Nú er orðið ljóst að býflugur verða til sýnis á Landbúnaðarsýningunni á Hellu en sýningin leggur metnað sinn í að sýna öll húsdýr sem yfirleitt er mögulegt. Félagsmenn í Býflugnaræktendafélagi Íslands munu sýna og kynna býflugnarækt en félagsskapurnn var stofnaður árið 2001. Áhugi á ræktun býflugna hefur vaxið með hverju árinu og hunangið sem er afurð býflugnanna fyrir löngu orðið vinsælt meðal þjóðarinnar.

Nú styttist óðum í 21. júlí en þann dag eru síðustu forvöð sýnenda að panta sýningarpláss og auglýsingaskilti á Landbúnaðarsýninguna á Hellu. Eftir þann dag förum við að móta sýningarsvæðið endanlega með tilliti til þeirra pantana sem þá verða komnar. Siðustu daga hafa pantanir á sýningarsvæðinu því tekið kipp og sem dæmi um fyrirtæki sem pantað hafa sýningarpláss á síðustu dögum eru Landsvirkjun, Varmavélar ehf. og IMPRA á Nýsköpunarmiðstöð.

Mikil áhersla verður lögð á að kynna Landbúnaðarsýninguna á Hellu vel fyrir landsmönnum. Nú þegar hefur sýningin verið auglýst vel í Bændablaðinu og í Fréttablaðinu auk þess sem veggspjöld og einblöðungar (flyer) hafa verið útbúnir og dreift á valda staði víðsvegar um land. Aðal auglýsingaherferðin hefst þó ekki fyrr en eftir verslunarmannahelgi og mun tíðni auglýsinga og fjöldi aukast dag frá degi og ná hámarki þann föstudag sem sýningin hefst, 22. ágúst. Þann dag mun útvarpsstöðin Bylgjan verða með beina útsendingu frá sýningunni sem hefst strax með „Íslandi í bítið“ og ekki ljúka fyrr en kvöldfréttir hefjast kl. 18.30.

Heimasíða Búnaðarsambands Suðurlands, www.bssl.is hefur legið niðri undanfarin sólarhring þar sem uppgötvaðist að hún hefði orðið fyrir árás tölvuþrjóta. Fyrirtækið Aicon á Selfossi sem hýsir vefsíðuna tók hana því úr umferð tímabundið og hefur unnið að því í dag að auka öryggi hennar sem koma í veg fyrir að slíkar árásir megi heppnast.

Samband garðyrkjubænda stendur fyrir stórsýningu garðyrkjunnar á Landbúnaðarsýningunni á Hellu þann 22.-24. ágúst n.k. Júlíanna Einarsdóttir blómaskreytir hefur verið ráðin til að hanna sýningarsvæði garðyrkjunnar en sýningin fer fram í öðrum helmingi andyrsins í Rangárhöllinni (um 100 fermetrar) og á útisvæði jafnstóru þar við.

Tollgæslan á Keflavíkurflugvelli lagði hald á tæp 5 tonn af ólöglegum matvælum sem ferðamenn komu með til landsins í fyrra, þar af rúm 2,7 tonn af hráu kjöti eða um 600 kg meira en árið 2006. Stór hluti hráa kjötsins sem tekinn er af ferðamönnum er pylsur sem leyft er að selja í verslunum hér, að sögn Bjargar Valtýsdóttur, deildarstjóra hjá Tollgæslunni á Suðurnesjum.