Í gær áttu formaður og framkvæmdastjóri Bændasamtakanna ásamt ráðuneytisstjóra sjávarútvegs- og landbúnaðarráðuneytisins fund með Elínu Sigfúsdóttur bankastjóra Nýja Landsbankans. Farið var yfir það hvernig efnahagskreppan horfir við landbúnaði og mikilvægi þess að hægt verði að tryggja áframhaldandi rekstur búa til skemmri og lengri tíma. Rætt var um rekstrargrundvöll, dýravelferð, matvælaöryggi og sérstöðu landbúnaðar. Fulltrúar BÍ fóru yfir hvað samtökin geta í samvinnu við búnaðarsamböndin boðið upp á varðandi ráðgjöf.

Kaupþing hefur ákveðið að hætta að taka gjald fyrir skilmálabreytingu vegna frystingar erlendra lána. Í stað þess að borga 11.350 krónur fyrir breytinguna greiða lántakendur því nú eingöngu 1.350 króna þinglýsingargjald.

Í ljósi frétta af frystingu erlendra lána vill ríkisstjórnin taka fram eftirfarandi: Viðskiptaráðuneytið hefur í dag rætt við alla bankastjóra hinna nýju ríkisbanka til að tryggja að þjónusta við viðskiptavini bankanna sé í samræmi við tilmæli ríkisstjórnarinnar um frystingu myntkörfulána.

Búið er að opna fyrir aðgang notenda Worldfengs að eigin heimasvæði sem kallað er Heimarétt. Í Heimaréttinni eiga að koma fram öll hross í eigu viðkomandi áskrifanda. Fjórar upplýsingasíður koma upp sem eru; hrossin mín, fargað, selt og útflutt. Allir eigendur sem eru áskrifendur að WorldFeng geta nú sjálfir skráð eigandaskipti, afdrif og bætt inn athugsemdum um sín hross með því að hafa aðgang að Heimaréttinni.

Lögreglumenn á Hvolsvelli stöðvuðu ökumann á leið úr austurhluta umdæmisins í liðinni viku. Hann reyndist vera með 300 kíló af kindakjöti sem var heimaslátrað og ætlað til dreifingar. Kjötið var haldlagt og því eytt í samráði við Matvælastofnun eftir því sem segir í dagbók lögreglu.

Í fréttum Ríkissjónvarpsins í gærkvöld birtist skemmtileg frétt um áhættufé í hlíðum Úlfarsfells en það er fyrsta skemmtilega fréttin sem birtist um fjármál í langan tíma. Svavar Halldórsson fréttamaður lýsti vanda ærinnar af stakri prýði og greinilegt er að það eru fleiri fréttamenn en Gísli Einarsson sem kunna að gera landbúnaðartengdar fréttir skemmtilegar.

Nú er verið að leggja lokahönd við á frágang á DeLaval mjaltaþjóni í fjósinu á Hvanneyri en hann verður tekinn í notkun í næstu viku. Básinn getur þjónað 65-70 kúm. Hér er um að ræða hefðbundinn mjaltaþjónn með frumuteljara. Snorri Sigurðsson framkvæmdastjóri búrekstrar LbhÍ sagði að seinna verði settur upp sérstakur búnaður sem getur gert fullkomnar efnamælingar á mjólkinni um leið og kýrnar eru mjólkaðar. Sá búnaður er í prófun erlendis og lofar góðu. Árleg framleiðsla Hvanneyrarbúsins er um 320 þúsund lítrar sem er áþekkt framleiðsluréttinum.

Á vef Bændasamtakanna hefur verið opnuð upplýsingasíða um sérstakar aðstæður á fjármálamarkaði og viðbrögð við þeim. Um er að ræða upplýsingar sem geta gagnast bændum og öðrum sem starfa við landbúnað. Þar er að finna tengla á vefsíður sem tengjast m.a. landbúnaði, hinu opinbera og lánastofnunum.

Hollenskir vísindamenn hafa fundið leið til að minnka gaslosun kúa um allt að tuttugu prósent. Talið er að í heiminum sé hálfur annar milljarður nautgripa og fimmtungur allrar metanlosunar í andrúmslofti í heiminum sé af þeirra völdum.

Ríkisstjórn Íslands hefur ákveðið að beina þeim tilmælum til Fjármálaeftirlitsins, f. h. skilanefndar Glitnis hf. og Kaupþings hf., og til stjórna Nýja Landsbankans hf. og Nýja Glitnis hf., að frystar verði afborganir skuldara á myntkörfulánum, sérstaklega vegna húsnæðislána, þar til ró kemst á gjaldeyrismarkaðinn.

Fjallalamb hf. og Strikamerki hf. hafa nú þróað upprunakerfi sem upplýsir neytendur hvaðan afurðir Fjallalambs koma.
Neytandinn kaupir 1/2 skrokk í kassa, les á merkimiða sem límdur hefur verið á kassann og getur síðan farið inn á www.fjallalamb.is smellt á upprunamerkingu og skoðað síðan mynd af bæ viðkomandi framleiðenda ásamt upplýsingum um ábúendur. Númer framleiðenda er fjögurra stafa númer sem kemur fram á miðanum. Einnig kemur fram á þessum miða einstaklingsnúmer lambsins ásamt sláturdagsetningu.

Lánsfjárkreppan sem nú gengur yfir heiminn hefur heldur betur breytt fjármálaumhverfinu hér á landi. Væntanlega hefur enginn Íslendingur farið varhluta af því. Ekki nóg með að erfitt eða ómögulegt sé að fá lán til framkvæmda eða kaupa heldur hafa flestar eða allar vörur hækkað gríðarlega á undanförnum mánuðum. Kaupmátturinn hefur því rýrnað verulega að undanförnu og er sama hvar í stétt menn eru. Vandamálið er allra landsmanna!

Á þessu stigi er ekkert hægt að segja um framhaldið og bændur á sama báti og annað atvinnulíf í landinu,“ segir Haraldur Benediktsson formaður Bændasamtaka Íslands aðspurður um þá stöðu sem uppi er í efnahagslífinu vegna óstöðugleika á fjármálamarkaði.
Hjá Bændasamtökunum hefur verið settur á laggirnar starfshópur til þess að fjalla um þá stöðu sem margir bændur standa frammi fyrir vegna slæmrar skuldastöðu og erfiðs reksturs. Á morgun fimmtudag munu forsvarsmenn bænda funda með landbúnaðarráðherra til þess að ræða vandann og koma á framfæri þeim hagsmunum sem snerta bændur landsins. Haraldur segir að miklir rekstrarerfiðleikar steðji að bændum og margir sem sjái fram á erfiða tíma.

Nú eru að verða síðustu forvöð að tryggja sér sæti í hrossaræktarferð Hrossaræktarsamtaka Suðurlands og Búnaðarsambands Suðurlands til Svíþjóðar dagana 28. nóvember til 1. desember 2008 í tilefni af 100 ára afmæli Búnaðarsambandssins. Á dagskrá er að fara á alþjóðlega hestasýningu í Globen í Stokkhólmi og heimsækja hrossaræktarbú rétt fyrir utan Stokkhólm. Fararstjóri verður enginn annar en Sigurður Sæmundsson.

Hvítmaga var smöluð um síðustu helgi. Hvítmaga liggur milli Skógafjalls og Sólheimaheiðar í Mýrdal og er ekki hægt að komast yfir í Hvítmögu nema með því að fara yfir Sólheimajökul sem er skriðjökull úr Mýrdalsjökli. Að sögn Einars Guðna Þorsteinssonar bónda á Ytri Sólheimum smalaðist nokkuð vel þó að enn sé vitað af nokkrum kindum eftir.

Mikill bruni er nú í Landeyjum og er talið að um 140 nautgripir hafi orðið eldinum að bráð. Slökkviliðið á Hvolsvelli var kallað út um kl. 7 í morgun að bænum Vestra-Fíflholti í Vestur-Landeyjum þar sem kviknaði í gripahúsi.  Að sögn Magnúsar Hlyns Hreiðarsonar, fréttamanns, sem er á staðnum tókst að bjarga um 60 gripum út en alls voru um 200 gripir í húsinu.

Þann 24. september næstkomandi verður alþjóðlegi skólamjólkurdagurinn haldinn hátíðlegur í níunda sinn. Í tilefni dagsins býður Mjólkursamsalan öllum grunnskólabörnum landsins upp á mjólk í skólunum og má reikna með að þar verði drukknir 12.000 lítrar af mjólk. Alþjóðlegi skólamjólkurdagurinn er haldinn hátíðlegur víða um heim en það er Matvælastofnun Sameinuðu þjóðanna sem hvetur til að haldið sé upp á daginn. Á Íslandi er haldið upp á hann undir kjörorðunum „Holl mjólk og heilbrigðir krakkar“.

Fjármagnskostnaður ætlar allt lifandi að drepa, sagði Einar K. Guðfinnsson landbúnaðarráðherra í utandagskrárumræðum á Alþingi í gær og taldi hvorki landbúnað né annað atvinnulíf geta þrifist við þessar aðstæður. Hafði hann áhyggjur af stöðu landbúnaðar og bætti við að ná þyrfti tökum á efnahagslífinu þannig að Seðlabankinn gæti lækkað vexti.

Þessa dagana er verið að taka fyrir nokkur mál tengdum úrskurði óbyggðanefndar um þjóðlendur á svokölluðu svæði fimm, sem nær frá Fljótsdal í suðri til Þistilfjarðar í norðri. Óbyggðanefnd úrskurðaði nokkur svæði sem voru innan þinglýstrar eignar jarðanna sem þjóðlendur og vilja landeigendur fá þeim úrskurðum hnekkt.