Bændur í Landeyjum, undir Eyjafjöllum og trúlega víðar hafa nú hafið fyrsta slátt sumarsins og er það vel. Hey sem aflað er svo snemma er án nokkurs vafa mikið framleiðslufóður, orkuríkt og lystugt. Gæðin eru hins vegar eðlilega á kostnað magnsins þegar svo snemma er slegið á vaxtartímanum og vekur það spurningar bænda um hvað ætla megi að sprettan sé á þessum hluta vaxtartímans.

Sláttur er hafinn á nokkrum bæjum í Austur-Landeyjum að því er fram kemur á www.mbl.is. Guðlaug Björk Guðlaugsdóttir á Voðmúlastöðum segir að þar hafi verið slegnir 8 hektarar af snemmsprottnu afbrigði af vallarfoxgrasi.
Guðlaug Björk segir, að slátturinn hefjist nú á svipuðum tíma og í fyrra en sprettan hafi verið mjög góð í vor þar sem hlýtt hafi verið í veðri. Í fyrra hófst sláttur í Landeyjum þann 4. júní, 2007 hófst hann 8. júní, 2006 þann 13. júní og 2005 þann 4. júní.
Metið er hins vegar frá 2003 þegar sláttur hófst þann 28. maí.

Haraldur Benediktsson formaður BÍ ritar leiðara í nýtt Bændablað þar sem hann fjallar um þingsályktun ríkisstjórnarinnar um að sækja um aðild að ESB. Þar gagnrýnir hann harðlega Vinstri græna sem fyrir kosningar lofuðu á bændafundum að þeir myndu standa vörð um sjálfstæði Íslands og lýstu því yfir að ekki yrði sótt um aðild að Evrópusambandinu. Í seinni hluta leiðarans, sem er birtur hér í heild sinni undir, ræðir Haraldur um nýfallinn úrskurð áfrýjunarnefndar samkeppnismála.

Gert er ráð fyrir að sláttur undir Eyjafjöllum hefjist í næstu viku. Samkvæmt upplýsingum Ólafs Eggertssonar, bónda á Þorvaldseyri er grasspretta mjög góð og líta tún vel út á Suðurlandi þrátt fyrir loftkulda í maí. Segist hann telja að rekja megi það til þess að raki hafi verið góður og að ekki hafi komið vorþurrkatímabil eins og algengt sé á þessum árstíma.

Bændasamtök Íslands hafa tekið saman nokkrar tölur úr gagnagrunni nautgriparæktarinnar fyrir árið 2008 yfir fjölda gripa, burði, sölu gripa, förgun og kálfadauða.
Við lok síðasta árs voru 75.743 nautgripir skráðir lifandi í gagnagrunni nautgriparæktarinnar og skiptust þeir þannig að kýr í mjólkurframleiðslu voru 25.798, aðrar kýr 3.081, kvígur 26.767 og naut 20.097.

Ákvörðun bandarískra yfirvalda um að greiða mjólkurbúum útflutningsbætur í fyrsta sinn í fjögur ár hefur vakið mikla reiði innan ESB og hjá Nýsjálendingum. Bandaríkin hyggjast aðstoða mjólkurframleiðendur með því að greiða útflutningsbætur á 92 þús. tonn af mjólkurvörum til útflutnings þar sem heimsmarkaðsverð hefur fallið.
Mariann Fischer Boel, landbúnaðarstjóri ESB, segir þessa ákvörðun óréttláta þó svo ESB geri raunar slíkt hið sama, þ.e. greiði útflutningsbætur. Að sögn hennar tók ESB ekki upp útflutningsbætur að nýju fyrr en að lokinni athugun á áhrifum þess á markaðinn.

Í dag, þriðjudaginn 26. maí stendur Umhverfisstofnun fyrir opnum fundi  í Frægarði, fundarsal Landgræðslu ríkisins í Gunnarsholti. Fundurinn hefst kl. 13:30. Á fundinum mun fulltrúi stofnunarinnar fara yfir helstu mál er varða forsendur slíkra leyfisveitinga, en á fundinum mun fulltrúi ORF Líftækni kynna starfsemi fyrirtækisins auk þess sem fulltrúar Náttúrufræðistofnunar Íslands og Ráðgjafarnefndar um erfðabreyttar lífverur munu kynna framkomnar umsagnir um fyrirhuguð áform fyrirtækisins um útiræktun. Áhugasamir aðilar geta einnig komið skriflegum athugasemdum við umsóknina á framfæri við stofnunina. Umsagnafrestur er til 28. maí.

Áfrýjunarnefnd samkeppnismála hefur staðfest niðurstöðu Samkeppniseftirlitsins að Bændasamtök Íslands hafi brotið samkeppnislög. Segir nefndin að verðlagning búvara sem ekki eru verðlagðar á grundvelli búvörulaga lúti „lögmálum hins frjálsa markaðar og þar með ákvæðum samkeppnislaga eins og samkeppnisyfirvöld hafa staðfest hvað eftir annað með úrskurðum þar að lútandi.“

Á fundi Héraðsnefndar Árnesinga sem haldinn var að Laugarvatni 12. maí sl. var samþykkt að Loftur Þorsteinsson í Haukholtum verði skipaður markavörður austan vatna – þ.e. austan Ölfusár, Sogs og Hvítár, í stað Arnórs heitins Karlssonar sem lést í vetur. Verkefni markavarðar eru skilgreind í afréttarlögum nr.6/1986 og í reglugerð um mörk og markaskrár nr. 200/1998.

Nú ættu allir sauðfjár- og kúabændur að hafa fengið kjörgögn i hendur vegna atkvæðagreiðslunnar um breytingar á búvörusamningi. Bændasamtökin og viðkomandi búgreinafélög hvetja bændur til þátttöku í kosningunum. Minnt er á að atkvæðaseðlar skulu hafa borist til skrifstofu Bændasamtaka Íslands ekki síðar en föstudaginn í þessari viku eða þann 29. maí nk. Talning atkvæða fer fram þriðjudaginn 2. júní og verða niðurstöður kunngjörðar strax að lokinni talningu.

Hópur hestamanna er nú á leið ríðandi frá Höfn í Hornafirði á Selfoss. Væri það vart í frásögur færandi nema fyrir þær sakir að ætlunin er að fara yfir öll vatnsföll á leiðinni með gamla laginu, þ.e. á vaði eða sundríðandi ef þarf. Hermann Árnason frá Stóru-Heiði í Mýrdal, frjótæknir hjá Kynbótastöð Suðurlands fer fyrir hópnum en með honum í för eru sex ferðafélagar sem vanir eru löngum dagleiðum.

Árni M. Mathiesen, fyrrverandi alþingismaður og fjármálaráðherra, er kominn til starfa hjá Dýralækniþjónustu Suðurlands. Dagskráin á Selfossi segir að Árni sé í starfsþjálfun enda hafi hann ekki unnið við fagið í 20 ár. Í samtali við fréttastofu segir Árni þó of mikið sagt að hann sé búinn að ráða sig þar til starfa. „Maður er að rifja upp það sem maður einu sinni starfaði,“ segir Árni í samtali við fréttastofu. Þetta er mér svona bæði til ánægju og yndisauka og til að skipta um umhverfi,“ segir Árni.

Næsta laugardag, þann 9. maí standa Jötunn-Vélar fyrir kynningardegi um landbúnað á athafnasvæði sínu að Austurvegi 69, Selfossi. Markmiðið með SUNNLENSKA SVEITADEGINUM er að skapa jákvæða umræðu um íslenskan landbúnað og starfsemi tengda landbúnaði, búin verður til skemmtileg stemming fyrir Sunnlendinga og aðra gesti, með þátttöku sem flestra fyrirtækja og aðila sem tengjast landbúnaði hér á Suðurlandi.

SUNNLENSKI SVEITADAGURINN stendur frá kl 11:30 – 16:30

Undanfarna daga hefur fjöldi kynningarfunda vegna breytinga á búvörusamningunum verið haldinn víða um land. Kynningarefnið sem fram hefur verið lagt á fundunum má sjá hér. Fundarsókn hefur verið þokkaleg m.v. árstíma og viðhorf fundagesta almennt jákvæð.  Á því hafa verið gerðar smávægilegar breytingar, hér er aðeins gerð grein fyrir þeim atriðum sem snúa að drögum að breytingu á samningnum um starfsskilyrði mjólkurframleiðslunnar.
 

Nú á vormánuðum keypti einkahlutafélagið Skarni ehf. 20 tonna haugtank af gerðinni Samson. Dreifarinn getur hvort heldur sem er fellt niður búfjáráburð eða lagt hann á jörðina með slöngubúnaði. Um gríðarlega afkastamikið tæki er að ræða, niðurfellingarbúnaðurinn hefur 8 metra vinnslubreidd en slöngubúnaðurinn hefur 16 metra vinnslubreidd. Skarni ehf. er í eigu verktakafyrirtækisins Túnfangs ehf., Jötunn-Véla á Selfossi, sem jafnframt flutti tækið til landsins, og fjögurra búnaðarfélaga í Árnessýslu, Bf. Skeiðahrepps, Bf. Villingaholtshrepps, Bf. Hraungerðishrepps og Bf. Stokkseyrarhrepps. Eigendur Túnfangs ehf., verktakarnir Sigurður Ágústsson og Davíð Ingvason sjá alfarið um haugkeyrsluna og taka jafnframt við pöntunum í símum 894-1130 (Sigurður) og 898-9154 (Davíð). Til verksins nota þeir dráttarvél af gerðinni Fendt Vario, 360 hestöfl.

General Mills og Dannon, sem til samans ráða yfir tveimur þriðju af mjólkurvörumarkaðnum í Bandaríkjunum, hafa nú ákveðið að taka ekki við mjólk úr kúm sem meðhöndlaðar hafa verið með hormóninu BST (Bovine SomatoTropin). Hormónið hefur verið notað vestra undanfarin ár til að auka nyt kúnna, en því hefur verið haldið fram að það hafi heilsuspillandi áhrif á neytendur. Fyrirtækin segja að með þessum aðgerðum séu þau að koma til móts við kröfur neytenda.

Innflutningur mat- og drykkjarvöru hefur dregist saman um tæp 30% það sem af er þessu ári miðað við sama tíma árið 2008, samkvæmt tölum Hagstofunnar. Greinilegt er því að innkaupakörfur landans eru öðruvísi samansettar nú en í fyrra þótt ekki hafi verið formlega kannað hvernig neyslumynstrið hefur breyst. Þórólfur Þórlindsson, forstjóri Lýðheilsustofu, vill ekki meina að Íslendingar hafi ástundað slíka ofneyslu á matvörum að við megum við 30% samdrætti án þess að finna fyrir því. Skýringin sé fyrst og fremst sú að við leitum nú mun meira á innanlandsmarkaðinn en áður.

Stjórnvöld í Mexíkó segja að 81 sé látinn úr svínainfúlensu í landinu en veikin fer nú eins og eldur í sinu milli íbúa landsins. Opinberum byggingum hefur verið lokað, öllum stórum viðburðum aflýst og fólk beðið um að halda sig heima til þess að forðast sýkingu. Alþjóða heilbrigðisstofnunin (WHO) óttast að svínainflúensan geti orðið að heimsfaraldri og að öll ríki heims verði að vera á varðbergi.

„Þetta var fínn fundur – eins og þeir gerast bestir,“ sagði Steingrímur J. Sigfússon, ráðherra og formaður VG, eftir um tveggja tíma fund um landbúnaðar- og atvinnumál á Breiðumýri í Reykjadal í morgun. Þar mættu 40-50 manns. Þetta var fyrsti fundur VG af þremur um landbúnaðar- og atvinnumál í dag.
Steingrímur sagði að mest hafi verið rætt um landbúnaðarmál, nýju búvörusamningana og stöðuna hjá bændum. Hann sagðist ekki hafa heyrt annað en að menn hafi talið skynsamlega ráðstöfun að gera búvörusamningana. „Bændur eru svo félagslega þroskaðir og ábyrgir að þeir eru skilningsríkir á þessar aðstæður og vilja leggja sitt af mörkum,“ sagði Steingrímur.