Þingmenn úr öllum flokkum hafa lagt fram tillögu til þingsályktunar um eflingu íslenska geitfjárstofnsins þar sem landbúnaðarráðherra verði falið beita sér fyrir eflingu íslenska geitfjárstofnsins. Í því skyni verði bændur sem vilja vinna geitfjárafurðir til sölu og þeir sem halda geitfé sérstaklega aðstoðaðir. Einnig verði kannað hvernig fjölga megi stöðum á landinu þar sem geitfjárrækt fer fram og hafnar verði erfðarannsóknir á stofninum og nýtt til þess þekking sérfræðinga í Landbúnaðarháskólanum á Hvanneyri og á tilraunastöðinni á Keldum.

Hjónin Ólafur Sigurjónsson og Lilja Guðbjartsdóttir stofnuðu nýverið fyrirtækið Flögur ehf. þar sem þau framleiða pappaflögur sem koma í stað hins hefðbundna spóns. Pappaflögurnar eru hugsaðar sem undirburður fyrir hesta og hænur á kjúklingabúum og hafa marga kosti umfram spón.

Evrópusambandið hefur frestað því að skylt verði að merkja allt sauðfé og geitfé með rafrænu örmerki. Samkvæmt núgildandi reglugerð stóð til að örmerkin yrðu almenn skylda frá og með 1. janúar næstkomandi en nú er ljóst að það dregst um minnsta kosti ár.

Við núverandi aðstæður er enn síður vænlegt en áður að huga að afnámi verðtryggingar fjárskuldbindinga vegna þess mikla óróa sem er á fjármálamörkuðum bæði á Íslandi og erlendis. Þetta er álit Gylfa Magnússonar, dósents við viðskipta- og hagfræðideild Háskóla Íslands.

Síðustu tvo daga hafa margir af nautgriparæktarráðunautum landsins setið námskeið í fóðuráætlanagerð fyrir mjólkurkýr, samkvæmt nýja fóðurmatskerfinu NorFór. Aðalkennari á námskeiðinu er norski fóðurfræðinguinn Harald Volden. Námskeiðinu lýkur í dag, miðvikudag.

Meira en helmingur af því nautakjöti sem flutt er til Færeyja kemur frá Brasilíu, en innflutningur á evrópsku nautakjöti er í sögulegu lágmarki. Þetta er viðsnúningur frá því sem var fyrir nokkrum árum, að sögn Hagstofu Færeyja.

Brunavarnir í sveitum eru víða í miklum ólestri. Einkum á þetta við um gripahús og önnur útihús. Þetta er álit mjög margra sem vinna að málaflokknum. Ástæður þess eru einkum þær að fram til þessa hafa ekki verið til skynjarar og viðvörunarkerfi sem hafa dugað við aðstæður sem einkenna gripahús, þar sem mikill raki og ryk er oft viðvarandi. Sömuleiðis er víða pottur brotinn þegar kemur að eldvarnahólfum, einkum í eldri byggingum. Brunavarnamálum hefur almennt lítið verið hreyft í landbúnaði í áranna rás en alvarlegir eldsvoðar síðustu misseri hafa þó hreyft við fólki.

Í fyrirspurnatíma á Alþingi í gær beindi Jón Björn Hákonarson, varaþingm. Framsóknarflokksins í NA-kjördæmi, fyrirspurn til sjávarútvegs- og landbúnaðarráðherra um afstöðu hans til þeirrar þróunar sem er við það að hefjast í landbúnaði, þ.e. verksmiðjubú í mjólkurframleiðslu.

Einn maður á hlut í 33 lögbýlum hér á landi samkvæmt því sem Einar K. Guðfinnsson landbúnaðarráðherra greindi frá á Alþingi í dag. Þar var hann að svara fyrirspurn Birkis Jóns Jónssonar, þingmanns Framsóknarflokksins.

Í stórbrunanum í Stærra-Árskógi fórust allar mjólkurkýrnar 60 talsins ásamt kvígum, kálfum og fjölda geldneyta. Aðeins 34 kvígur komust undan eldinum. Nú hefur verið efnt til fyrirheita-söfnunar meðal bænda á svæðinu. Öllum mjólkurframleiðendum á samlagssvæðinu var sent bréf fyrir helgina og óskað eftir að þeir sem hefðu tök á, létu af hendi mjólkandi kýr, kelfdar kvígur eða kvígukálfa. Ekki er ætlast til þess að gripirnir fáist endurgjaldslaust en mikilvægt er að gripir séu til staðar um leið og framleiðsla getur hafist á nýjan leik. Vonast er til að fyrirheit fáist um 50-60 mjólkandi kýr, ásamt vænum hópi kelfdra kvígna og hóp yngri kálfa.

Bændur eru sumir ósáttir við að neyðast til að setja kýr sínar á beit út í haga. Bændasamtökin eru hins vegar einbeitt í að halda þeirri reglu til streitu að beljur fái að viðra sig úti – þótt víða í Evrópu séu bændur jafnvel hættir útibeit.

Jörðum þar sem stunduð er búfjárframleiðsla fækkaði um 57 eða 7,2% á Suðurlandi á sex ára tímabili. Á sama tíma fjölgaði lögbýlum í ábúð um 4,1% eða 49 talsins.
Bændasamtök Íslands samþykktu í fyrra að láta kanna og greina þróun á eignarhaldi á bújörðum og meta áhrif hennar á búsetu og byggðaþróun. Niðurstaðan liggur nú fyrir. Skýrsluhöfundar segja að ljósin á bæjum til sveita virðist fjarri því að slokkna jafnhratt nú og var á milli áranna 1980 og 2000.

Lögbýli með greiðslumark í mjólk voru alls 1246 árið 1997 og meðalinnlegg hvers býlis tæplega 82 þúsund lítrar. Árið 2006 voru býlin orðin 796 með tæplega 148 þúsund lítra meðalinnlegg. Á sama hátt voru 2.405 sauðfjárbú með greiðslumark árið 1997 og heildarframleiðsla kindakjöts var 7.903 tonn. Árið 2006 voru býlin hins vegar 1.601 og heildarframleiðslan var komin upp í 8.647 tonn.

Opnaður hefur verið styrktarreikningur handa ábúendum í Stærra-Árskógi vegna fjósbrunans sem varð þar síðastliðinn laugardag. Gríðarlegt tjón varð í brunanum, en ábúendur á bænum höfðu nýverið byggt við og endurnýjað fjósið. „Þessi styrktarreikningur var opnaður til að hjálpa þeim að koma undir sig fótunum aftur og með von um að þau gefist ekki upp heldur haldi ótrauð áfram því góða starfi sem þau hafa verið að gera,“ segir í fréttatilkynningu frá vinum ábúenda á Stærra-Árskógi.

Guðni Ágústsson formaður Framsóknarflokksins og fyrrverandi landbúnaðarráðherra og Sigurmundur Ernir Rúnarsson blaðamaður kynna ævisögu þess fyrrnefnda á veitingastaðnum Riverside í Hótel Selfossi næstkomandi laugardag klukkan 15:30. Í bókinni, sem kemur í bókaverslanir á föstudag, er sögð saga Guðna Ágústssonar en jafnframt ættarsaga Brúnastaðafólksins og líst mannlífi í Flóanum á 20. öld.

Stórum hluta af einni stærstu geitahjörð landsins var slátrað í gær og er ljóst að þetta mikil blóðtaka fyrir geitastofninn. Í landinu voru einungis um 440 geitur í vor og með þessum niðurskurði hafa 55 geitur eða 12,5% af stofninum glatast. Þar með er mikilvægur erfðafjölbreytileiki tapaður en geitfjárstofninn íslenski er einstakur landnámsstofn í bráðri útrýmingarhættu.

Víst er að bændur sem aðrir hafa hugsað með hryllingi til eldvoðans á Stærra-Árskógi sem varð á laugardaginn. Vonandi hefur hann þó orðið til þess að bændur hafi í kjölfarið hugsað um sínar eigin brunavarnir, flóttaleiðir í gripahúsum og tryggingar almennt.

Í Morgunblaðinu í dag, 19. nóvember, er viðtal við bóndann á Stærri-Árskógum á miðopnu sem fer hér orðrétt eftir:

„Þetta er það versta sem bóndi getur lent í, fyrir utan mannskaða; að sjá gripina sína brenna inni,“ sagði Guðmundur Geir Jónsson, 35 ára bóndi á Stærra-Árskógi í Dalvíkurbyggð í samtali við Morgunblaðið í gær. Bróðurparturinn af bústofni hans, sem var rúmlega 200 nautgripir, drapst í stórbruna á laugardagskvöldið. Guðmundur bóndi segir enn of snemmt að velta því fyrir sér hvort hann geti byggt upp að nýju.

Allar líkur eru á að a.m.k. 150 nautgripir hafi drepist í eldsvoðanum á Stærra Árskógi í Dalvíkurbyggð í gær. Þrjú sambyggð hús; nýtt fjós, hlaða og gamla fjósið, eyðilögðust í eldinum. Íbúðarhúsið var ekki í hættu þar sem vindátt var heppileg hvað það varðar, og fólki varð ekki meint af. Bóndinn á bænum gekk reyndar hart að sér til þess að bjarga því sem bjargað varð af skepnum, að sögn Ingimars Eydal, aðstoðarslökkviliðsstjóra á Akureyri.

Ný viðbygging við fjós á bænum Stærri Árskógi í Dalvíkurbyggð, er ónýt eftir að kviknaði í þar í dag. Slökkvilið Dalvíkur og Akureyrar eru að störfum og enn er ekki ljóst hvort margra skepnur drápust. Einhverjar sáust hlaupa út í myrkrið. Mikill veðurhamur torveldar slökkvistarf.