Á nýjum vef Ráðgjafarmiðstöðvar landbúnaðarins rml.is má finna niðurstöður skýrsluhalds í nautgriparækt fyrir febrúarmánuð. Upplýsingarnar voru sóttar í Huppu og miðast við stöðuna eins og hún var 10. mars.  Þá höfðu 95% af þeim 585 sem í skýrsluhaldi eru skilað inn mjólkurskýrslum.

Búnaðarblaðið Freyja hefur verið gefið út frá 2011, nú í ár verður sú nýbreytni í útgáfu þess að blaðið kemur eingöngu út rafrænt.  Það er gert til að að spara tíma og peninga. Í blaðinu er fjallað um nýliðun í nautgripa- og sauðfjárrækt og tveir landsþekktir verðurfræðingar gera illviðrinu 10. og 11. september góð skil, ásamt ýmsum öðrum fróðlegum greinum.  Útgefandi Freyju er Útgáfufélagið Sjarminn.

Nú í febrúar hófust mælingar á átgetu íslensku mjólkurkýrinnar á Stóra-Ármóti. Mælingarnar eru hluti af M.S. verkefni Lilju Daggar Guðnadóttur við LbhÍ undir leiðsögn Jóhannesar Sveinbjörnssonar og Grétars H. Harðarsonar. Halla Kjartansdóttir, starfsmaður BSSL, hefur verið henni til aðstoðar við framkvæmd mælinganna. Notast er við 18 kýr á fyrri hluta mjaltaskeiðs, flestar eru á fyrsta mjaltaskeiði, en sú elsta er á 7. mjaltaskeiði.Verkefninu er ætlað að auka við þau gögn sem áður hefur verið aflað um átgetu og er áætlað að frekari rannsókn verði gerð næsta vetur á Stóra-Ármóti í þessum sama tilgangi. Markmið verkefnisins er að geta notað þær upplýsingar sem aflað er með áðurnefndum rannsóknum til að bæta þær spár sem nú eru notaðar í fóðurmatskerfinu NorFor um átgetu íslensku mjólkurkýrinnar.

Í dag fór í loftið heimasíða Ráðgjafarmiðstöðvar landbúnaðarins rml.is.

Búnaðarþing er búið að kjósa nýja stjórn Bændasamtaka Íslands til næstu þriggja ára. Stjórnin er skipuð sex stjórnarmönnum auk formanns sem er kosinn sérstaklega. Nýja stjórn skipa Sindri Sigurgeirsson, Bakkakoti, sem kosinn var formaður, Guðbjörg Jónsdóttir, Læk, Fanney Ólöf Lárusdóttir, Kirkjubæjarklaustri, Guðný Helga Björnsdóttir, Bessastöðum, Vigdís M. Sveinbjörnsdóttir, Egilsstöðum, Þórhallur Bjarnason frá Laugalandi og Einar Ófeigur Björnsson í Lóni.

Um síðustu áramót tók Ráðgjafarmiðstöð landbúnaðarins RML til starfa.  Fyrirtækið tekur yfir faglegt starf og ráðgjöf til bænda sem verið hefur á höndum búnaðarsambanda og ráðgjafasviðs Bændasamtakanna.  Það er hægast að lista það upp sem eftir verður hjá Búnaðarsambandinu. Fyrirtæki Búnaðarsambandsins.  Kynbótastöð Suðurlands, Sauðfjársæðingastöð Suðurlands, Tilraunabúið Stóra Ármóti og bændabókhaldsdeildin. Búnaðarsambandið leigir RML starfsaðstöðu og afnot af bílum.  Þá mun BSSL áfram sinna félagslegum störfum, umsýslu og úttektum jarða- og húsabóta, umsóknum um lögbýli og sjá um fleiri verkefni  sem m.a. lúta að lögum um búfjárhald, girðingalögum, vörnum vegna landbrots  ofl. Búnaðarsamböndin munu sjá um túnkortagerð, úttektir og eftirlit vegna umsókna m.a. í Framleiðnisjóð og Bjargráðasjóð. Þá urðu þær breytingar um áramót að Ólafur Þór tók við umsjón yfir bændabókhaldi í stað Skafta Bjarnasonar sem fór í 70 % starf um leið og hann tók við oddvitastöðu í Skeiða- og Gnúpverjahreppi.

Búnaðarþing var núna rétt í þessu að kjósa nýjan formann BÍ Sigurgeir Sindra Sigurgeirsson bónda í Bakkakoti.  

Búnaðarþing 2013 var sett í gær á Hótel sögu.  Yfirskrift þingsins þetta árið er „Bændur segja allt gott“.  Búnaðarþing stendur til miðvikudags og er fjöldi mála yfir 30.  Setningarræðu hélt Haraldur Benediktsson og ávarp flutti Steingrímur J. Sigfússon, sem jafnframt veitti Landbúnaðarverðlaun 2013.  Verlaunin í ár fengu bændurir í Laxárdal II í Skeiða- og  Gnúpverjahrepp og handverkshópurinn Handverkskonur milli heiða.   

Samanburð á áburðarverði þeirra fjögurra aðila sem hafa auglýst áburð til sölu handa bændum. Í töflunni er verð borið saman miðað við að bera 100 kg N á hektara. Greiðslukjör eru mismunandi en miðað er við greiðslu í maí og að pantað sé fyrir 15. mars. Er þetta birt með fyrirvara um villur og verðbreytingar.

Nautgriparæktarfélag Austur-Skaftfellinga boðar til aðalfundar í veitingasal á Brunnhól á Mýrum, miðvikudaginn 27. febrúar n.k. og hefst hann kl. 20.30.

Heimasíða BSSL hefur ekki verið uppfærð frá mánaðamótum jan/feb. s.l. Ástæðan er sú að um áramót breyttist starfsemi og hlutverk Búnaðarsambandsins í kjölfar stofnunar Ráðgjafarmiðstöðvar landbúnaðarins (RML). Vefstjóri heimasíðunnar Guðmundur Jóhannesson fluttist yfir í í nýja fyrirtækið ásamt flestu starfsfólki Búnaðarsambandsins. Á stjórnarfundi BSSL þann 25. febrúar var ákveðið að halda áfram með heimasíðuna og aðlaga hana að breyttu hlutverki sambandsins.

Á aðalfundi Félags kúabænda á Suðurlandi á Hellu á mánudaginn fengu fimm kúabú viðurkenningu frá Búnaðarsambandi Suðurlands og Auðhumlu fyrir frábæran rekstur og bústjórn á búum sínum. Til grundvallar voru lagðar rekstrartölur áranna 2010 og 2011 samkvæmt bústjórnarverkefninu SUNNA en það er verkefni sem rúmlega 60 sunnlensk kúabú taka þátt í  árlega og hefur verið samvinnuverkefni Búnaðarsambands Suðurlands og viðkomandi búa. 

Við vekjum athygli á námskeiði í jörð.is sem boðið verður upp á dagana 6.-8. febrúar n.k. á þremur stöðum hér á Suðurlandi. Námskeiðið er einkum ætlað bændum, en er þó öðrum opið. Hámark þátttakanda er 12. Námskeiðið verður kennt í kennslustofum með nettengingu. Nemendur mæta með sínar eigin fartölvur, þeir sem geta, aðrir fá lánaðar tölvur á staðnum.

Eins og við sögðum frá í gær er ársuppgjöri skýrsluhalds nautgriparæktarinnar fyrir árið 2012 nú lokið. Að venju höfum við tekið saman lista yfir afurðahæstu búin og kýrnar á Suðurlandi. Eins og undanfarin ár er sá háttur hafður á að búunum er raðað eftir kg verðefna þar sem afurðir eftir árskú og efnainnihald innleggsmjólkur er lagt til grundvallar.
Afurðahæsta búið að þessu sinni er Dalbær í Hrunamannahreppi þar sem meðalafurðir ársins reyndust vera 565 kg MFP eftir árskú og 7.525 kg mjólkur. Í öðru sæti Kirkjulækur í Fljótshlíð með nánast sömu afurðir í verðefnum eða 564 kg MFP eftir árskú og 7.454 kg mjólkur. Þriðja sætinu hampar Reykjahlíð á Skeiðum með 560 kg MFP eftir árskú og 7.492 kg mjólkur. Fjórða sætið skipar svo afurðahæsta bú síðasta árs og handhafi Íslandsmetsins, Hraunkot í Landbroti með 558 kg MFP eftir árskú og mestar afurðir í kg mjólkur eða 7.577 kg. Eins og sjá má er í raun aðeins sjónarmunur milli þessara búa.