Ákveðin hafa verið einkunnalágmörk kynbótahrossa fyrir Landsmót 2008. Kröfurnar hafa verið hertar talsvert frá því fyrir Landsmót 2006, eða um fimm stig í hverjum flokki einstaklingssýndra kynbótahrossa. Einnig hafa lágmörk afkvæmasýndra stóðhesta verið hækkuð um tvö stig í aðaleinkunn í kynbótamati. Engar kynbótahryssur verða sýndar með afkvæmum á Landsmóti 2008 en á síðastliðnu ári ákvað Fagráð í hrossarækt að leggja þær af.

Í kvöldverðarboði í kjölfar formannafundar BSSL sl. föstudagskvöld voru kjörnir tveir nýir heiðursfélagar Búnaðarsambands Suðurlands. Þetta voru þeir Ágúst Sigurðsson í Birtingaholti og Páll Lýðsson í Litlu-Sandvík. Sveinn Sigurmundsson framkvæmdastjóri fór yfir æviágrip þeirra og Þorfinnur Þórarinsson, formaður Búnaðarsambandsins afhenti þeim heiðursskjal og blómvönd.

Búnaðarsamband Suðurlands hélt árlegan formannafund sinn síðastliðinn föstudag, 18. janúar 2008, þar sem saman komu formenn allra búnaðar- og búgreinafélaga á starfssvæði Búnaðarsambandsins. Fundurinn endaði með hátíðarkvöldverði í tilefni þess að Búnaðarsambandið fagnar 100 ára afmæli sínu á þessu ári. Fundurinn, sem og hátíðarkvöldverðurinn voru hvoru tveggja á Hótel Selfossi.

„Suðurland bragðast best“ er heitið á málþingi sem haldið verður 30. janúar á Hótel Selfossi. Markmið málþingsins er að vekja athygli á framboði og nýsköpun í matvælaframleiðslu á Suðurlandi og að hvetja Sunnlendinga til þess að nýta matvæli úr heimabyggð. Þá er átt við heimamenn alla, en ekki síst þá sem stunda veitingarekstur og ferðaþjónustu.

„Við erum að skoða að afnema kjarnfóðurtollinn. Það er mikill áhugi fyrir þessu í landbúnaðinum,“ segir Einar K. Guðfinnsson, sjávarútvegs- og landbúnaðarráðherra. Einar segir að verð á áburði, kjarnfóðri og fleiru hafi hækkað hratt, því sé tollurinn í endurskoðun. „Þetta skýrist í mars í síðasta lagi, hvað verður.“ Tvö fyrirtæki framleiða kjarnfóður hér á landi, í heild um níutíu þúsund tonn á ári, en innflutningur er hverfandi.

Í upphafi árs var Sigríður Pétursdóttir, bóndi á Ólafsvöllum í Skeiða- og Gnúpverjahreppi, sæmd hinni íslensku fálkaorðu við hátíðlega athöfn á Bessastöðum fyrir störf sín að ræktun íslenska fjárhundsins. Þegar Sigríður hóf ræktun íslenska fjárhundsins á sjöunda áratug síðustu aldar var ræktunarstofninn mjög fátæklegur en með hugsjónastarfi sínu tókst henni ásamt örfáum öðrum ræktendum að bjarga kyninu.

Jóhannes Hr. Símonarson, ráðunautur BSSL hefur verið ráðinn framkvæmdastjóri Landbúnaðarsýningarinnar á Hellu sem haldin verður dagana 22.-24. ágúst í sumar. Sýningin er stærsti viðburður afmælisfagnaðar Búnaðarsambands Suðurlands sem er 100 ára á árinu.

Að sögn Jóhannesar er þetta spennandi verkefni þar sem ætlunin er að sameina góða fagsýningu fyrir bændur og afar öfluga neytendasýningu.  Á sýningunni mun landbúnaðurinn sýna allt það sem hann hefur upp á að bjóða í víðustu skilgreiningu orðsins. Allir landsmenn ættu að geta fundið eitthvað við sitt hæfi á þessari sýningu.

Frá og með 1. janúar 2008 tóku gildi breytingar á starfsemi Landbúnaðarstofnunar. Nafni stofnunarinnar hefur verið breytt í Matvælastofnun (e: Icelandic Food and Veterinary Authority) og samhliða þessari nafnabreytingu munu verkefni stofnunarinnar breytast í þá veru að matvælasvið Fiskistofu og matvælasvið Umhverfisstofnunar færast yfir til Matvælastofnunar. Jafnframt hefur nýtt merki verið hannað utan um skammstöfun stofnunarinnar, MAST.

Heimilsföng fyrrum Landbúnaðastofnunar breytast ekki né heldur kennitala og símanúmer.

„Mér finnst nú, þegar þessar gífurlegu hækkanir verða á fóðrinu, að ekki sé lengur forsvaranlegt að ráðamenn verji áfram fákeppni og trufli heilbrigða samkeppni á þessum markaði,“ segir Guðbjörg Jónsdóttir bóndi.
Hún rekur kúabú á Læk í Flóa ásamt manni sínum, Gauta Gunnarssyni. Þau hjónin hafa á milli 40 og 50 kýr í fjósi og 215 þúsund lítra greiðslumark.

Byrjað var að reisa nýtt fjós á bænum Stærri-Árskógi í Dalvíkurbyggð við utanverðan Eyjafjörð í gær, en útihúsin þar gjöreyðilögðust í eldsvoða í nóvember. Guðmundur Geir Jónsson bóndi var að störfum við fimmta mann þegar Morgunblaðið kom í heimsókn skömmu fyrir hádegi. Gámar með stálbitum og öðru efni í eitt stykki fjós voru komnir í hlað og von á fleirum.

Samkvæmt heimildum Morgunblaðsins ríkir nú ráðningarstöðvun hjá flestum fjármálastofnunum á íslenska fjármálamarkaðnum, hvort sem um viðskiptabanka, sparisjóði, verðbréfafyrirtæki eða fjárfestingarfyrirtæki er að ræða. Heimildarmenn Morgunblaðsins úr fjármálageiranum eru þeirrar skoðunar, að þetta séu eðlileg og skiljanleg viðbrögð fjármálafyrirtækja, því útilokað sé að segja til um það, hversu lengi sú niðursveifla kemur til með að vara, sem nú ríkir, og jafnútilokað sé að segja til um það, hvenær botninum verði náð.

Þó að jarðarverð sé kannski ekki hátt í Bandaríkjunum á evrópskan mælikvarða heefur það aldrei verið hærra en nú. Meðalverð er nú um 290 þús. krónur á hektara og hefur farið hækkandi undanfarið gagnstætt því sem gerst hefur með lóðir þar.

Veðurfar var óvenjulegt á síðasta ári.  Miklir þurrkar framan af sumri og dró úr sprettu, einkum á sandatúnum.  Nýting heyja var góð enda veðrátta til heyskapar einmuna góð.  Margir luku fyrsta slætti um mánaðarmótin júní-júlí.  Um miðjan ágúst fór að rigna með fáum uppstyttum fram að jólum. Uppskerustörf haustsins voru erfið vegna bleytu og dæmi um að ekki næðist að uppskera korn og garðávexti.  Hálmur sem víða er notaður sem undirburður er ýmist enn úti á akrinum eða illa þurr í rúllum.

Hekla er komin að því að gjósa og reiknað er með að Grímsvötn geti gosið innan fárra ára. Tvö ár eru nefnd í því sambandi. Lítið er vitað um hversu nálægt gosi Katla er og er fylgst vel með henni þar sem hún er langhættulegasta eldstöð landsins.

Guðni Ágústsson, formaður Framsóknarflokksins, tekur undir með Björgólfi Thór Bjórgólfssyni athafnamanni og vill leggja niður krónuna. Þetta kom fram í viðtali við Guðna á Útvarpi Sögu.

Á bænum Auðsholti vöknuðu íbúar við það í gærmorgun að bærinn var umlukinn vatni. Krakkarnir á bænum komust því ekki á litlu-jólin, þeim til mikillar armæðu, og pósturinn sneri fljótt við þegar hann sá í hvað stefndi enda aðeins var hægt að komast að bænum á mjög stórum bílum eða dráttarvélum. Talið er að vatnavextirnir hafi náð hámarki síðdegis í gær og þrátt fyrir að spáð sé rigningu í dag muni vatnshæðin minnka.

Lögreglan á Selfossi varar bændur og þá sem eiga hagsmuna að gæta að vatnavöxtum í Hvítá. Fylgst er gaumgæfilega með vatnavöxtum í ánni í dag. „Þetta er ekki orðið að almannavarnaástandi enn sem komið er,“ sagði Svanur Kristinsson varðstjóri á Selfossi í samtali við Fréttavef Morgunblaðsins.

Eftirlitsstofnun EFTA hefur ákveðið að senda íslenskum yfirvöldum rökstudda áminningu vegna laga um bætiefni í dýrafóðri. Bætiefni í dýrafóðri mega samkvæmt reglugerðum EFTA ekki fara á markað án leyfis að afstaðinni vísindalegri rannsókn sem staðfesti að bætiefnin hafi ekki skaðleg áhrif á heilsu dýra og manna eða umhverfið.

Fimmtán hross hafa drepist á bænum Geirlandi við Kirkjubæjarklaustur vegna bráðrar hræeitrunar á síðastliðnum dögum. Fram kemur á fréttavef Eiðfaxa, að fyrstu hrossin byrjuðu að veikjast á fimmtudagsmorgun í síðastliðinni viku og frá þeim tíma hafa hross drepist eitt af öðru.

Einari K. Guðfinnssyni, landbúnaðar- og sjávarútvegsráðherra hafa verið færðar góðar gjafir á síðustu dögum. Í dag var honum færð bókin „Sáðmenn sandanna“, saga landgræðslustarfs á Íslandi sem tekin er saman af Friðriki G. Olgeirssyni sagnfræðingi. Bókin er gefin út af Landgræðslunni í tilefni þess að eitthundrað ár eru liðin frá upphafi skipulegs landgræðslustarfs hér á landi en engin þjóð virðist hafa starfað lengur samfellt að landgræðslu og stöðvun jarðvegseyðingar en við Íslendingar.