Mánudaginn 21. september sl. fékk Jón Bjarnason sjávarútvegs- og landbúnaðarráðherra afhenta flösku af bíódísil (jurtadísilolíu) sem unnin var í haust úr vetrarrepju frá Þorvaldseyri undir Eyjafjöllum. Hér er um nýja aukabúgrein að ræða og er þetta fyrsta framleiðslu bíódísil hér á landi. Það var Ólafur Eggertsson bóndi á Þorvaldseyri sem afhenti flöskuna.

Flytja þarf út allt að 2800 tonn af lambakjöti á næstu tólf mánuðum vegna mikils samdráttar í sölu á innanlandsmarkaði. Síðustu ár hafa verið flutt út á bilinu 1500 til 1600 tonn á ári.

Matvælastofnun hefur birt í Stjórnartíðindum nýja auglýsingu um skipan varnarlína vegna sauðfjársjúkdóma. Fyrri auglýsing sem birtist 21. ágúst sl. var ekki rétt og hefur nú verið birt ný og leiðrétt útgáfa.
Auglýsingin birtist einnig í Bændablaðinu sem út kom í dag og þar er einnig að finna grein Halldórs Runólfssonar yfirdýralæknis þar sem hann gerir grein fyrir því sem í auglýsingunni felst. Sauðfjárbændur eru hvattir til þess að kynna sér hvort tveggja vel.
Auglýsingin fer hér á eftir:

Í fyrravor hafði franskur ljósmyndari, Bruno Compagnon, samband við skrifstofu Landssambands kúabænda og spurðist fyrir um hvort mögulegt væri að heimsækja kúabú hér á landi, til að mynda búpeninginn. Það reyndist auðsótt mál og dvaldi Bruno þessi á Íslandi í 10 daga í júnímánuði við iðju sína. Hefur hann að aðalstarfi að ljósmynda kýr, fyrir búnaðarblað í heimalandi sínu.

Margir kúabændur eru í erfiðri stöðu vegna skulda og í nokkrum tilvikum virðist gjaldþrot óumflýjanlegt. Þetta á einkum við um bændur sem fjárfest hafa mikið á síðustu árum, byggt ný fjós, keypt vélar eða aukið við sig í framleiðsluheimildum. „Staðan er erfið hjá hópi bænda og verulega farið að taka á, ekki síst andlega,“ segir Baldur Helgi Benjamínsson, framkvæmdastjóri Landssambands kúabænda.

Nokkuð mismunandi skilmálar eru í boði hjá sláturleyfishöfum varðandi heimtöku í haust, en með brottfalli útflutningsskyldunnar er ekki lengur um neinn sérstakan heimtökurétt að ræða. Sláturhúsunum er því í sjálfsvald sett hvaða kjör þau bjóða upp á í því efni. Hér er samantekt um þau eins og þau koma fram á heimasíðum þeirra. Allar tölur eru án vsk.

Meðfylgjandi kvöldmynd er frá þreskingu á risaakri á Skógasandi undir Eyjafjöllum á dögunum. Byggyrkið er Skúmur og akurinn er 60 hektarar að stærð, sá stærsti á Íslandi. Það eru bændur á Drangshlíðarbúinu sem þarna eru að störfum, en búið hefur nýlega fengið skráningu hjá Matvælastofnum sem framleiðandi á korni og hálmi til sölu – og er því eina sérhæfða kornræktarbýli landsins.

Íslenskur hestur á búgarði í Bandaríkjunum drapst nýlega af völdum hestaheilabólgu. Veikin berst með moskítóflugum og getur ógnaði lífi dýra og manna. Hesturinn var á búgarði ræktandans Johns Dur í bænum Henniker í New Hampshire-ríki í Bandaríkjunum. Bæjarblaðið Concord Monitor greinir frá þessu en þar segir að hesturinn, sem mun hafa komið í heiminn fyrir átján mánuðum, hafi veikst af hestaheilabólgu í byrjun mánaðarins og síðan drepist af völdum sjúkdómsins á fimmtudaginn fyrir viku.

Hætta er á að fólk með svínaflensu smiti alifugla og svín. Sóttvarnalæknir hvetur fólk með flensueinkenni að vera  ekki að störfum í svína- og alifuglahúsum. Í orðsendingu frá Haraldi Briem sóttvarnalækni til bænda hvetur hann þá sem ábyrgir eru fyrir skepnum að huga að því hvernig þeir eru í stakk búnir til að bregðast við ef margt heimilisfólk smitast samtímis. Þá mælist hann einnig til að bændur geri áætlun um umhirðu og fóðrun skepnanna.

Breskur karlmaður, sem var í gönguferð með hundinum sínum, lenti í kröppum dansi þegar kúahjörð neyddi hann til að leita skjóls í Thamesá í Oxfordskíri í rúma klukkustund. Maðurinn, sem er frá London, var að ganga eftir stíg skammt frá bænum Radcot þegar kýrnar hófu að elta hann. Hann hringdi í lögregluna og óskaði eftir aðstoð og um tíma var lögregluþyrla sett í viðbragðsstöðu.

Þegar litið ef yfir skilmála tryggingarfélaganna vegna lausafjártrygginga bænda, má sjá að í þeim öllum er að finna eftirfarandi klausu þegar kemur að undanþágum frá bótum á tjóni vegna eldsvoða: „Þrátt fyrir það greiðist þó sem um eldsvoða væri að ræða ef fóður ofhitnar og/eða brennur (kolast) þótt eldur verði ekki laus“.

Sveitasælan getur fljótt breyst í andhverfu sína, ef hún er í sífellu rofin af gestakomum. Húsmæður til sveita eru margar að niðurlotum komnar eftir sumarið, þar sem Íslendingar ferðuðust margir innanlands. Og komu gjarnan við hjá gömlum kunningjum, ættingjum eða vinum, sem búa svo vel að eiga sumarafdrep í sveitinni, eða búa þar allan ársins hring. »Þegar gestirnir fóru var ísskápurinn eins og eyðimörk, allur klósettpappír búinn, dýnur um öll gólf og ég var dögum saman að þvo sængurfatnað og handklæði, skúra og skrúbba. Og taka saman allan hlífðarfatnaðinn, sem ég hafði grafið upp til að lána illa búnum gestum. Svo hófst allt að nýju næstu helgi,« segir kona, sem kveðst búin að fá sig fullsadda á ferðalögum Íslendinga um landið, með viðkomu heima hjá henni.

Ég hef fylgst rækilega með þessu og orðið fyrir miklum vonbrigðum. Það hefur engin breyting orðið því miður,“ segir Bjarni Jónsson, framkvæmdastjóri Sambands garðyrkjubænda. Um síðustu mánaðamót tók gildi ný reglugerð, þar sem tiltekið er að ferskar matjurtir, sem seldar eru í verslunum, skuli vera merktar á umbúðum með upplýsingum um upprunaland. Það sama gildir um vörutegundir úr ferskum matjurtum þar sem þeim er blandað saman og/eða þær skornar niður.

Miðvikudaginn 9. september s.l var féð á Stóra-Ármóti rekið saman úr úthaganum og lömb valin til slátrunar og ásetnings. Sauðfjárræktarráðunautar Bssl og aðrir starfsmenn hauststarfanna í sauðfjárrækt mældu og stiguðu lömbin. Þetta er einn liður í því að samræma vinnubrögðin fyrir haustið. Nokkur lömb voru stiguð og valin til nánari skoðunar í sláturhúsi SS á Selfossi daginn eftir, en þangað mættu líka ráðunautar frá Búvest, Jón Viðar frá Bændasamtökum Íslands og Stefán Vilhjálmsson frá yfirkjötmatinu. Í sláturhúsi SS voru lömbin stiguð á fæti og skrokkarnir síðan skoðaðir í kjötsalnum.

Stjórnir lífeyrissjóðanna taka á fundi í dag afstöðu til þess hvort sjóðirnir komi að stofnun Fjárfestingasjóðs Íslands. Arnar Sigurmundsson, formaður stjórnar Landssamtaka lífeyrissjóða, telur yfirgnæfandi líkur á að þetta gangi eftir. Fjárfestingasjóði Íslands er ætlað að fjárfesta í fyrirtækjum sem lent hafa í erfiðleikum, fyrirtækjum sem voru lífvænleg fyrir bankahrunið og eiga alla möguleika á því að geta starfað áfram. Síðan er meiningin að selja fyrirtækin aftur.

Stjórnvöld kanna sérstaklega hvernig unnt er að bæta skuldastöðu einyrkja sem eiga í miklum greiðsluerfiðleikum. Margir þeirra hafa lagt allt undir, bæði atvinnurekstur og heimili. Fréttastofa Bylgjunnar og Stöðvar 2 hefur greint frá vanda kúabænda, en einn af hverjum tíu þeirra er í miklum greiðsluerfiðleikum vegna lána sem tekin voru síðustu ár til að stækka bú, tæknivæða fjós eða kaupa tæki til að auka hagkvæmni búrekstrarins.

Umhverfisnefnd Flóahrepps hefur ákveðið að önnur tveggja umhverfisverðlauna ársins 2009 skuli falla í hlut Tilraunabúsins á Stóra-Ármóti. Veitt eru verðlaun í tveimur flokkum, annars vegar „Heimili“ og hins vegar „Fyrirtæki/stofnanir“ og fellur Stóra-Ármót undir seinni flokkinn. Alls bárust nefndinni ábendingar um ellefu aðila þar sem snyrtimennska og vel hirt umhverfi þykir bera af og vera sveitarsómi og er þetta niðurstaða umhverfisnefndar eftir skoðun á öllum tilnefningunum.

Franskir sparifjáreigendur íhuga nú að hætta að leggja peninga sína inn á banka og kaupa frekar kýr. Fjárfestingin er talin örugg ólíkt hlutabréfamarkaðnum og gefa góða vexti. Vinsælasti sparireikningurinn í Frakklandi býður rétt rúmlega eins prósents vexti en með því að fjárfesta í kúm má búast við allt að sjö prósenta vöxtum á ári. Hver kýr kostar 1200 evrur en svo stækkar hjörðin ár frá ári.

Á yfirlitssýningu kynbótahrossa á Gaddstaðaflötum í s.l. viku var Dagur Brynjólfsson, ljósmyndari, staddur og myndaði fjöldann allan af þeim hrossum sem þar voru til sýningar. Myndir Dags má skoða á vefsíðu hans, www.dalli.is.

Fjármálaráðuneytið hefur sent frá sér fréttatilkynningu þess efnis að vegna þeirra sérstöku aðstæðna sem uppi eru í þjóðfélaginu nú um stundir telji ráðuneytið gildar ástæður fyrir því að nýta heimild í lögum um tímabundna niðurfellingu álags vegna skila á virðisaukaskatti með gjalddaga 1. september 2009. Niðurfelling álagsins gildir í 8 daga eða til 9. september 2009. Fréttatilkynninguna í heild sinni má sjá hér að neðan: