Á morgun verða liðin 80 ár síðan fyrst var tekið á móti mjólk hjá Mjólkurbúi Flóamanna á Selfossi.
Mjólkurbúið var formlega stofnað 10. desember 1927, en tók til starfa 5. desember 1929. Af því tilefni verður haldin veisla á Hótel Selfossi, þar sem starfsmönnum, núverandi og fyrrverandi, ásamt fjölmörgum öðrum góðum gestum verður boðið til hátíðardagskrár.

Nú er nýtt hrútaspil komið út en þar er að finna má allar mikilvægustu upplýsingar um sæðingahrúta landsins. Spilið hentar því jafnt fyrir bændur og spilaáhugafólk því ásamt upplýsingum um kynbótagildi hrútanna er þetta einnig venjulegur spilastokkur. Sunnudaginn 13. desember verður svo haldið Íslandsmeistaramót í hrútaspili í Þjóðminjasafninu klukkan 14.

Eins og kunnugt er tóku ný lög um Bjargráðasjóð gildi 23. apríl síðastliðinn. Í bráðabirgðaákvæði með lögunum segir að stjórn sjóðsins sé á árinu 2009 heimilt að ráðstafa fjármunum úr almennri deild sjóðsins til að draga úr hættu á uppskerubresti sem gæti leitt af sér óæskilegan samdrátt í búvöruframleiðslu. Þessir fjármunir eru nýttir til að styrkja bændur til áburðarkaupa.
Umsóknarfrestur um styrk til áburðarkaupa var auglýstur til 20. ágúst og styrkirnir voru greiddir út 21. október, alls 5000 krónur á tonn.
Nú hefur stjórn Bjargráðasjóðs ákveðið að bjóða þeim sem ekki sóttu um á réttum tíma að sækja um nú. Fjárhæð styrks nú getur tekið skerðingu vegna takmarkaðs fjármagns til verkefnisins. Umsóknarfrestur er til 30. desember 2009.

Jón Bjarnason, sjávarútvegs og landbúnaðarráðherra, hefur skipað vinnuhóp til þess að fjalla um breytingar sem kunna að verða á eignarhaldi í landbúnaði og sjávarútvegi í kjölfar bankahrunsins. Vinnuhópurinn skipa Ingimar Jóhannsson, skrifstofustjóri, sjávarútvegs- og landbúnaðarráðuneyti, sem er formaður, Björn Rúnar Guðmundsson, skrifstofustjóri, efnahags- og viðskiptaráðuneyti, Hjördís D. Vilhjálmsdóttir, ráðgjafi ráðherra, fjármálaráðuneyti og Páll Þórhallsson, skrifstofustjóri, forsætisráðuneyti.

Við minnum á fræðslufund Búnaðarsambandsins í dag, föstudaginn 27. nóvember kl 11:00 – 14:30, að Árhúsum Hellu. Þar verður fjallað um kornrækt með sérstakri áherslu á hagkvæmni og nýtingu korns sem fóður fyrir nautgripi.
Fyrirlesarar eru þeir Jónatan Hermannsson og Grétar Hrafn Harðarson frá Landbúnaðarháskólanum, Runólfur Sigursveinsson frá Búnaðarsambandinu og Jóhann Nikulásson, bóndi í Stóru-Hildisey.

Á vef Landssambands kúabænda (www.naut.is) kemur fram að nýlokið er vinnu við skýrslu um þróun fjósgerða og mjaltatækni hérlendis en slík samantekt hefur verið gerð á tveggja ára fresti undanfarin ár. Í skýrslunni kemur fram að að í fyrsta skipti er yfir helmingur mjólkurkúa hér á landi hýstur í legubásajósum. Þá kemur einnig fram enn eru viðhöfð öll grundvallarvinnubrögð sem þekkjast við mjaltir, frá handmjöltum og til mjaltaþjóna en um fjórðungur allrar framleiddrar mjólkur á Íslandi kemur frá búum með mjaltaþjóna.

Helstu hagstærðum viðvíkjandi íslenskum landbúnaði þarf nú að safna saman upp á nýtt. Þetta verður gert á næstu misserum að kröfu Evrópusambandsins sem samþykkir ekki þau vinnubrögð að Bændasamtökin eða aðrir þeir sem hagsmuna eiga að gæta sjái um þessa hagskýrslugerð.

Nýi Kaupþing banki skipti um nafn í dag og heitir nú Arion banki. Segir bankinn, að nýja nafnið sé sótt í grískar fornsögur og vísi m.a. til þrautseigju, samvinnu og endurkomu. Efnt var til samkeppni um nýtt nafn meðal starfsmanna bankans og var nafnið valið úr á þriðja hundrað tillagna.
Í tilkynningu frá bankanum segir, að nýju nafni fylgi ný stefna og gildi. Séu leiðarljós bankans fagmennska, framsækni, umhyggja og tryggð þar sem viðskiptavinurinn er í forgrunni. Með nýjum áherslum sé verið að svara kröfum viðskiptavina og starfsmanna um breytingar í kjölfar endurskipulagningar bankans. Nýtt nafn muni auk þess koma í veg fyrir misskilning bæði í almennri umræðu og meðal innlendra og erlendra samstarfsaðila bankans.

Búnaðarsamband Suðurlands stendur fyrir fræðslufundi að Árhúsum Hellu, föstudaginn 27. nóvember n.k. kl 11:00 – 14:30 um kornrækt með sérstakri áherslu á hagkvæmni og nýtingu korns sem fóður fyrir nautgripi.
Fyrirlesarar eru þeir Jónatan Hermannsson og Grétar Hrafn Harðarson frá Landbúnaðarháskólanum, Runólfur Sigursveinsson frá Búnaðarsambandinu og Jóhann Nikulásson, bóndi í Stóru-Hildisey.

Árleg skýrsla Hagþjónustu landbúnaðarins um uppgjör búreikninga í nautgripa- og sauðfjárrækt er komin út. Í skýrslunni 2008 eru rekstrarupplýsingar frá alls 302 bújörðum. Þær skiptast eftirfarandi: 150 sérhæfð kúabú, 88 sérhæfð sauðfjárbú, 11 blönduð bú og 53 bú af öðrum búgerðum. Gögnin koma víðsvegar að á landinu, um þriðjungur frá Norðurlandi eystra, um fjórðungur frá Suðurlandi og um fjórðungur frá Norðurlandi vestra. Uppgjörsbúin lögðu samtals inn 34 milljónir lítra mjólkur og svarar framleiðslan til um 27% heildarinnleggs mjólkur á landinu á árinu 2008. Uppgjörsbúin lögðu samtals inn 1.777 tonn kindakjöts og samsvarar framleiðslan 13,2% heildarinnleggs kindakjöts á árinu 2008.

Umræða um skuldavanda bænda og breytt rekstrarumhverfi landbúnaðarins í kjölfar kreppunnar er meðal þess sem er efst á baugi á bændafundum Bændasamtakanna sem nú standa yfir. Á fundi sem haldinn var í Miðgarði í Hvalfjarðarsveit í gærkvöldi voru bændur uggandi um sinn hag og spurðu um ábyrgð ráðgjafarþjónustu og ekki síst bankastofnana í aðdraganda hrunsins.
Haraldur Benediktsson formaður BÍ hélt inngangserindi þar sem hann m.a. ræddi um það upplausnarástand sem ríkt hafi í þjóðfélaginu eftir að kreppan skall á. Hann sagði að lítið gengi við að koma ýmsum málum áleiðis og ekki lægju neinar endanlegar tillögur á borðinu vegna skuldavanda bænda. „Almenn ráðgjöf okkar til bænda er að það sé best að reyna að borga af lánum eins og hægt er. Við höfum átt samtöl við bankamenn um ýmsar lausnir en því miður er enn margt hulið þoku,“ sagði Haraldur.

Landbúnaðarháskóli Íslands hefur um árabil staðið fyrir umfangsmiklum búrekstri á Hvanneyri og Hesti í Borgarfirði. Búreksturinn er grunnur fyrir mikilvæga þætti í kennslu og rannsóknum við stofnunina og hornsteinn íslenskra landbúnaðarvísinda. Áherslur hafa verið í búfjárrækt og jarðrækt en einnig á seinni árum í atferlis-, umhverfis- og orkuvísindum.
Nú hefur verið ákveðið að breyta búrekstrinum og aðskilja hann alfarið frá annarri starfsemi við LbhÍ. Stofnað hefur verið sérstakt félag, Grímshagi ehf., um rekstur búsins frá og með næstu áramótum. Telur LbhÍ að með þessu verði markmiðum skólans og íslensks landbúnaðar best borgið eins og á stendur.

Utanríkisráðherra hefur tilkynnt um skipun samninganefndar Íslands vegna fyrirhugaðra aðildarviðræðna við Evrópusambandið. Eins og áður hefur verið greint frá verður Stefán Haukur Jóhannesson, sendiherra, aðalsamningamaður Íslands og stýrir samninganefndinni. Í henni munu sitja, auk aðalsamningamanns, formenn tíu samningahópa og sjö aðrir nefndarmenn. Formaður samningahóps um landbúnaðarmál verður Sigurgeir Þorgeirsson, ráðuneytisstjóri sjávarútvegs- og landbúnaðarráðuneytis.

Það má búast við lífi og fjöri í lokahófi sláturvertíðarinnar hjá Sláturfélagi Suðurlands sem haldið verður á föstudag. Þá kveðja fastráðnir starfsmenn félaga sína sem hafa staðið við hlið þeirra við slátrunina í haust, bæði um 50 lausráðna starfsmenn sem búsettir eru hér á landi en einnig 30 pólska og 8 nýsjálenska farandverkamenn. Margir þeirra koma ár eftir ár hingað til lands til að slátra íslensku fé, og verka það eftir kúnstarinnar reglum. Frá þessu er sagt á www.mbl.is og þar er einnig að finna myndband með myndum úr sláturhúsinu og viðtölum við starfsmenn.

Utanríkisráðherra hefur falið Stefáni Hauki Jóhannessyni sendiherra að vera aðalsamningamaður Íslands í fyrirhuguðum aðildarviðræðum Íslands og Evrópusambandsins. Stefán Haukur er einn reyndasti samninga-maður Íslands á alþjóðavettvangi. Hann hefur verið sendiherra Íslands gagnvart Evrópusambandinu í Brussel frá árinu 2005.

Ísland verður fljótlega kynnt í tveimur löndum sem ákjósanlegur staður fyrir minkaeldi. Ráðunautur Bændasamtakanna bindur vonir við að kynningin skili tilætluðum árangri.
Skagafjörður verður kynntur í að minnsta tveimur löndum sem ákjósanlegur staður fyrir minkarækt. Mjög hefur þrengt að minkabúum í Hollandi og Danmörku á undanförnum árum en það er einmitt í þessum löndum sem Skagafjörður verður kynntur sérstaklega, ásamt Árborgarsvæðinu.

Dr. John McEwan, vísindamaður við AgResearch Invermay, Nýja Sjálandi, mun halda erindi um erfðarannsóknir á sauðfé í dag, mánudaginn 2. nóvember, í húsnæði Landbúnaðarháskóla Íslands á Keldnaholti.. Yfirskrift erindisins er „Einkirnabreytileikar í sauðfé – greining og hagnýting“.
Í erindinu verður fjallað um raðgreiningu á erfðamengi sauðfjár í heild sinni,
þróunarvinnu sem leiddi af sér flögu sem gerir vísindamönnum kleift að greina þúsundir einkirnabreytileika í sauðfé, og hvernig nota má þessi tæki í rannsóknum á eingena eiginleikum og við kynbætur á sauðfé. Dæmi um eiginleika þar sem þetta nýtist eru gulur litur á kjötfitu og hornalag sauðfjár.

Stjórn BÍ hefur í samráði við LK gert eftir farandi breitingar á 3. grein reglna um gæðastýrt skýrsluhald í nautgriparækt:
“Þau bú sem ekki standast ofangreindar kröfur, fá ekki greiðslur fyrir viðkomandi ársfjórðung. Bú sem falla út af einum eða fleiri ársfjórðungum eiga rétt á að koma inn á næsta ársfjórðungi, enda hafi þau þá skilað öllum skýrslum það sem af er verðlagsárinu eigi síðar en fyrstu skýrslu þess ársfjórðungs og skilað kýrsýnum á undangengnum ársfjórðungum samkvæmt ofangreindum kröfum”.

Eins og kunnugt er voru Samtök ungra bænda stofnuð í Dalabúð í Búðardal þann 23. október s.l. og eru stofnfélagar samtakanna ríflega 100 alls staðar af að landinu.
Á fundinum var samþykkt ályktun þar sem skorað er á sjávarutvegs- og landbúnaðarráðherra að beta sér fyrir bættu lánaumhverfi ungs fólks sem vill hefja búskap og liðka þannig fyrir nýliðun í landbúnaði. Ályktunin ásamt greinargerð fer hér á eftir:

Matvælastofnun hefur birt kort af nýrri legu sauðfjárveikivarnarlína samkvæmt auglýsingu nr. 793/2009. Með þessum breytingunum eykst vægi þeirra girðinga sem eftir eru. Flutningur yfir varnarlínur er ennþá óheimill, en flutningur á sauðfé og nautgripum verður frjálsari á stærri svæðum en verið hefur. Þá hvílir ábyrgð á búfjareigendum að verja sinn bústofn og sýna ábyrgð gagnvart öðrum. Kortið sýnir með svörtum línum hvernig varnarlínurnar liggja. Brotalínan táknar aukavarnarlínu og litir tákna svæðaskiptingu litamerkinga á sauðfé. Ekki hefur verið tekin ákvörðun um hvort eða hvernig litamerkingum á sauðfé verður breytt. Þess vegna geta verið fleiri litir innan hvers hólfs og sami litur beggja megin við varnarlínur.