„Tal um stuðning ESB við svokallaðan norðlægan landbúnað er sjónhverfing. Við teljum að ekkert sé þar á bak við“ segir Haraldur Benediktsson, formaður Bændasamtaka Íslands. Samtökin hafa unnið að athugun á afleiðingum þess fyrir íslenskan landbúnað ef Ísland gengur í Evrópusambandið, meðal annars með fundum með samningamönnum Finna.
Haraldur segir að Finnar hafi fengið heimild til þess, með samningunum við ESB, að skilgreina hluta landbúnaðarins sem norðlægan og styrkja hann sérstaklega, þar til Evrópusambandið ákvæði annað. Stuðningurinn sé alfarið á kostnað finnskra skattgreiðenda. „Samkvæmt öllum reglum ESB stenst það ekki að einhver hluti landsvæðis þess fái sérmeðferð, það eiga allir að vera jafnir.“

Endurmenntunardeild Landbúnaðarháskólans býður upp á fjölbreytt námskeið fyrir kúabændur hér sunnanlands í febrúar og mars n.k. Eftirtalin námskeið verða í boði:
* Mjaltaþjónar og bætt mjólkurgæði, Árhúsum, 15. mars 2010 
* Nýting belgjurta til að auka frjósemi og afurðargetu jarðvegs, Hótel Heklu, Skeiðum 23. feb. 2010
* Láttu nautgripunum líða vel og þér líka!, Stóra Ármóti, 2. mars 2010

Í desember s.l. lagði Sigurður Ingi Jóhannsson, alþm., fram svohljóðandi fyrirspurn til sjávarútvegs- og landbúnaðarráðherra um sjóði í vörslu ráðuneytisins:
1. Hver eru verkefni fóðursjóðs, búnaðarsjóðs, garðávaxtasjóðs og verðmiðlunar landbúnaðarvara?
2. Hversu mikið fjármagn höfðu þessir sjóðir til ráðstöfunar árin 2007, 2008 og 2009 og hversu mikið er áætlað að þeir hafi 2010?
3. Kemur til greina að mati ráðherra að leggja sjóðina niður eða færa þá til greinanna sjálfra?

Ríkisstjórnin hefur ekki sett fram neinar áætlanir um að breyta um stefnu í landbúnaðarmálum. Þetta kemur m.a. fram í svörum sjávarútvegs- og landbúnaðarráðuneytisins við spurningum Evrópusambandsins um landbúnað í tengslum við aðildarumsókn Íslands að ESB.
Þýðing á svörunum hefur verið birt á heimasíðu sjávarútvegs- og landbúnaðarráðuneytisins, en Jón Bjarnason markaði þá stefnu á síðasta ári að þýða bæði spurningar og svör ráðuneytisins yfir á íslensku. Þýðing á svörum um sjávarútveginn verður birt fljótlega.

Aðalfundur Félags kúabænda á Suðurlandi var haldinn í Árhúsum, Hellu 1. febrúar sl. Þórir Jónsson á Selalæk var endurkjörinn formaður félagsins en í skýrslu hans komu fram m.a. áhyggjur af stöðu bænda, bæði vegna skuldastöðu yngri bænda og eins vegna raunlækkunar á afurðaverði. Hann nefndi sem dæmi að afurðaverð á nautakjöti til bænda hefði lækkað um 28% á 12 árum og þá hefði engin hækkun komið til á mjólkurverði til bænda á liðnu ári þó veruleg hækkun hafi orðið á nær öllum aðföngum á sama tíma.

Rök hníga að því að fjórfalda megi byggræktun hér á landi, að sögn Jónatans Hermannssonar, tilraunastjóra á Korpu og lektors við Landbúnaðarháskóla Íslands.
Áætlað er kornræktin hafi skilað um 16 þúsundum tonna uppskeru í ár, að langmestu leyti byggi. Fjórföldun þess þýðir yfir 60 þúsund tonna framleiðslu.
Framleiðslan samsvarar öllum innflutningi á byggi að viðbættum hluta þess fóðurhveitis sem gefið er svínum. Auk þess er reiknað með að bæta megi fóðrun nautgripa með aukinni notkun fóðurkorns.

Fjárfestingarstofa undirbýr kynningu á Íslandi sem minkaræktarlandi, sem verður komið á framfæri við minkaræktendur á Norðurlöndum og í Hollandi.
Þórður H. Hilmarsson, forstöðumaður Fjárfestingarstofu Íslands, segir að Íslendingar standi sig vel í minkaræktinni. Hér séu framleidd góð skinn sem seljist fyrir hátt verð, rekstrarkostnaður búanna sé tiltölulega lítill og mikið til af hráefni og ónýttri afkastagetu í fóðurstöðvum.

Landsbanki Íslands er stærsti eigandi fyrirtækisins Lífsvals sem á 45 jarðir víða um land. Bankinn eignaðist hlut í félaginu við stofnun þess 2002. Bankinn er líka stærsti lánardrottinn félagsins, en það skuldaði í árslok 2008 um þrjá milljarða króna. Fyrirtækið tapaði á síðasta ári um 1,2 milljörðum króna. Bókfærðar eignir félagsins nema 5,2 milljörðum.
Á síðustu árum hafa orðið til nokkur félög sem kaupa og selja bújarðir. Stærst þessara félaga er Lífsval. Fyrirtækið er í eigu nokkurra einstaklinga. Stærsti eigandinn er hins vegar Landsbanki Íslands með 19% hlut. Bankinn kom inn í félagið við stofnun þess árið 2002 og hefur því verið fjárhagslegur bakhjarl þess frá upphafi. Skuldir Lífsvals við Landsbanka Íslands í árslok 2008 námu rúmlega 2,4 milljörðum króna.

Í fyrradag ræddi Björn Bjarnason, fyrrv. ráðherra, við Harald Benediktsson, formann Bændasamtaka Íslands, í þætti sínum á ÍNN. Samtalið snerist einkum um aðlögunarviðræðurnar við Evrópusambandið. Fram kom hjá Haraldi að Bændasamtökin hafa aflað sér uppllýsinga um landbúnaðarstefnu ESB með markvissum hætti allt frá árinu 2003 og menn því nokkuð vel undirbúnir þar á bæ. Hann sagði jafnframt að Bændasamtökin taki þátt aðildarferlinu með þátttöku í vinnuhópum samninganefndarinnar en jafnframt stæðu samtökin að sjálfstæðri gagnöflun.

Virkjun Skaftár í landi Skálar á Síðu er á teikniborðinu og stefnt að því að framkvæmdir fari á fullt á næsta ári. Samhliða er áformað að reisa fóðurverksmiðju fyrir fiskeldi, sem nýti orkuna.
Skaftá er í röð tíu vatnsmestu fljóta landsins en nú þegar hugmyndir, um að veita henni úr farvegi sínum á hálendinu vestur yfir til Tungnár- og Þjórsárvirkjana, virðast úr sögunni er eigandi Skálar, Þórarinn Kristinsson, langt kominn með undirbúning að virkjun hennar við bæinn. Hann segir stefnt að 4 megavatta rennslisvirkjun og rannsóknir, teikningar og leyfi séu komin vel af stað.

Við minnum á fræðslukvöld sem Landbúnaðarháskóli Íslands og Hrossaræktarsamtök Suðurlands standa fyrir í félagsheimili Hestamannafélagsins Sleipnis á Selfossi, miðvikudagskvöldið 13. janúar nk. frá kl. 19.45 til kl. 22.00.
Á námskeiðinu verður farið yfir helstu hrossaliti og erfðum þeirra lýst. Myndir verða mikið notaðar og raunveruleg dæmi tekin til útskýringar. Markmiðið er að þátttakendur öðlist skilning á helstu atriðum litaerfðanna.

Í Morgunblaðinu í dag er að finna grein eftir Egil Ólafsson, blaðamann, þar sem velt er upp ýmsum grundvallarspurningum er varða félagskerfi bænda, fjármögnun þess og ráðgjafarþjónustunnar og búnaðargjald. Greinin er fróðleg lesning og fer hér á eftir:

Verðskrá RARIK fyrir dreifingu á raforku hækkaði um 10% að jafnaði um áramótin en þá hækkaði virðisaukaskattur á almenna raforkunotkun úr 24,5% í 25,5%. RARIK segir hækkunin fyrst og fremst tilkomna vegna verðlagshækkana, hækkana á aðföngum og gengisþróunar.
Á sama tíma leggst nýr orkuskattur á raforku 12 aurar á hverja kílówattstund. Sá skattur mun koma fram á reikningum söluaðila (t.d. hjá Orkusölunni) en ekki hjá dreifiaðila (RARIK). Hliðstæður skattur er lagður á sölu á heitu vatni, en er reiknaður hlutfallslega á heildarkostnað, 2% af smásöluverði á heitu vatni.

Brotist var inn í prestbústaðinn í Grundarfirði í gær. Rúða var brotin í svefnherbergi en innbrotsþjófurinn, ef svo má kalla, náðist í glugganum þar sem hann var á fjórum fótum, sem honum er reyndar eðlislægt því þetta er hrútur. Hrúturinn slapp frá eiganda sínum þegar verið var að flytja hann á milli fjárhúsa, þar sem hann var við þjónustustörf á fengitíma.

Tjón varð í MS á Selfossi þegar rafmagn sló út í um fimm mínútur í morgun. Um 6.000 lítrar af mjólk fóru í súginn þegar vélbúnaður varð rafmagnslaus. Guðmundur Geir Gunnarsson mjólkurbússtjóri segir tjónið nema mörg hundruð þúsundum króna.
„Þegar þetta gerist þá slá öll tæki og tól út. Dælur hætta að virka og annað, og það er mjólk í öllum lögnum. Við missum hér um 6.000 lítra af mjólk víðsvegar um í búinu,“ segir Guðmundur Geir í samtali við mbl.is.

Uppgjör skýrsluhalds í nautgriparækt fyrir nóvember s.l. er nú komið á vef Bændasamtakanna. Meðalafurðir standa nú í 5.107 kg/árskú og eru afurðir mestar í Skagafirði eða 5.730 kg/árskú. Næst í röðinni koma svo Snæfellsnes með 5.534 kg/árskú og Árnessýsla með 5.527 kg/árskú.
Afurðahæsta búið er sem fyrr hjá Daníel í Akbraut en þar standa afurðir nú í 7.733 kg/árskú en fast á hæla hans kemur búið á Kirkjulæk í Fljótshlíð með 7.586 kg/árskú. Annars vekur óneitanlega athygli að nú eru 13 bú með meðalafurðir yfir 7.000 kg/árskú á landinu öllu.

Sunnudaginn 13. desember n.k. verður haldið Íslandsmeistaramót í Hrútaspilinu þar sem keppt verður um Hrútabeltið. Mótið verður haldið í Þjóðminjasafninu og hefst klukkan 14.
Allir geta tekið þátt, en skilyrði er þó að eiga nýja Hrútaspilið en það verður til sölu í verslun Þjóðminjasafnsins. Eina sem þarf er að mæta í Þjóðminjasafnið og skrá sig til leiks fyrir klukkan 14.

Í sjónvarpsfréttum RÚV í gær sagðist Gylfi Magnússon, viðskipta- og efnahagsráðherra, telja að Mjólka ætti að fara í gegnum fjárhagslega endurskipulagningu. Þegar hann var spurður um hvort hann teldi að það ætti þá að fella niður skuldir Mjólku svaraði Gylfi því til að hann teldi best ef hægt væri að vinna úr málefnum Mjólku þannig að eftir stæði sjálfstætt fyrirtæki sem væri öflugur keppinautur á markaði og hefði alla möguleika til að veita stóra fyrirtækinu sem fyrir væri það aðhald sem æskilegt og nauðsynlegt væri á þessum markaði eins og öðrum.

Samkeppniseftirlitið hefur birt ákvörðun og álit um samruna Kaupfélags Skagfirðinga (KS), Mjólku og Vogabæjar. Samkeppniseftirlitið gerir ekki athugasemdir við samruna KS og Vogabæjar og kemst sömuleiðis að þeirri niðurstöðu að eftirlitið hafi ekki lögsögu varðandi samruna KS og Mjólku. Fyrirtækin séu bæði afurðastöðvar í mjólkuriðnaði og samruni þeirra falli ekki undir gildissvið samkeppnislaga enda sé ákvæði í búvörulögum sem heimili sameiningu afurðastöðva. Þrátt fyrir þetta gagnrýnir Samkeppniseftirlitið samrunann harðlega og segir að um sé að ræða samkeppnishamlandi aðgerð.

Lánasjóður landbúnaðarins er einn þeirra lögaðila sem gera fjárkröfu á hendur Landsbanka Íslands en eins og kunnugt er var skipuð skilanefnd yfir bankanum 7. október 2008. Vekur það nokkra athygli að sjóður sem lagður var niður fyrir fjórum árum sé kröfuaðili nú. Skýring þess er sú að Lánasjóðurinn átti lausafé sem varðveitt var við sölu lánasafns sjóðsins árið 2005 og eru þetta þeir fjármunir.