Komnar eru niðurstöður úr gróðursýnum sem tekin voru 20.-21. maí s.l. á vefinn hjá okkur. Sýnin voru tekin eftir að rignt hafði í um tvo daga og því hafa mál færst mjög til betri vegar. Flúorstyrkur var í öllum tilfellum um eða vel fyrir neðan þolmörk sauðfjár eða á bilinu 31-83 mg/kg F þurrefnis en þolmörkin eru 75-100 mg/kg F þurrefnis.
Á bæjunum Raufarfelli, Ytri Ásum og Sólheimahjálegu var styrkur flúors yfir þolmörkum nautgripa og hesta og voru á bilinu 59-83 mg/kg F þurrefnis en þolmörk nautgripa og hesta er 30-40 mg/kg F þurrefnis.

Stjórn Búnaðarsambandsins fundaði í morgun og fór yfir stöðu mála varðandi vinnu Búnaðarsambandsins varðandi afleiðingar eldgossins í Eyjafjallajökli. Sveinn Sigurmundsson, framkvæmdastjóri, fór yfir stöðuna á búfjárflutningum af svæðinu. Fram kom að farið hafi verið í þrjár skipulagðar heimsóknir ráðunauta á þá bæi sem verst urðu úti. Bændasamtökin og önnur búnaðarsambönd hafa lagt okkur lið og er Búnaðarsamband Suðurlands þeim þakklátt fyrir þeirra framlag. Nú eru ráðunautar m.a. að meta fóðurþörf á svæðinu og að gera ráðstafanir í samráði við bændur, viðkomandi sveitarfélög og Bjargráðasjóð um framhaldið.
Þó að í það minnsta sé hlé á gosinu þá er mikið vandamál varðandi fok á ösku á svæðinu.

Knattspyrnusamband Íslands hefur ákveðið að bjóða bændum á gossvæðinu á vináttulandsleik Íslands og Andorra sem fer fram á Laugardalsvelli á morgun laugardaginn 29. maí kl. 16:00.
Þeir bændur sem hyggjast þiggja boðið er vinsamlegast bent á að hafa samband við skrifstofu KSÍ í dag föstudag í síma 510-2900 fyrir kl. 16:00. Þá verða miðar teknir frá en þá er síðan hægt að nálgast á vellinum í sérstöku boðsmiðahliði.

Vegna sérstakra aðstæðna hefur stjórn Orlofssjóðs BÍ ákveðið að styrkja bændur sérstaklega á áhrifasvæði eldgossins í Eyjafjallajökli. Hámarksfjárhæð orlfsstyrks hefur þannig verið hækkuð í kr. 82.500 fyrir bændur á skilgreindu áhrifasvæði gossins. Umsóknarfrestur er til 15. júní 2010.
Á heimasíðu BÍ er að finna úthlutunarreglur, umsóknareyðublað og þau tilboð og afslætti sem standa til boða.

Þann 18. maí s.l. samþykkti Alþingi breytingu á lögum um framleiðslu, verðlagningu og sölu á búvörum. Tilgangur breytinganna var m.a. sá að veita heimild til að kúabændur á áhrifasvæði eldgossins í Eyjafjallajökli geti notið stuðnings af beingreiðslum, þó framleiðsla þeirra hafi raskast eða lagst niður.

Yfirlitssýning kynbótahrossa á Sörlastöðum fer fram á morgun föstudaginn 28. maí og hefst kl. 10:00. Byrjað verður á hryssum í flokki 7 vetra og eldri og endað á stóðhestum 7 vetra og eldri. Reiknað er með að hádegishlé verði tekið þegar sýningum á 5 vetra hryssum er lokið, þannig að eftir hádegi verður byrjað á 4 vetra hryssum og síðan yngstu stóðhestunum.
Röð hrossa á yfirlitssýningunni verður eftirfarandi:

Norska bændahreyfingin og fleiri fyrirtæki í Noregi hafa ákveðið að styðja við bakið á íslenskum bændum sem hafa orðið fyrir neikvæðum áhrifum af gosinu í Eyjafjallajökli. Þeir hafa lagt 7 milljónir íslenskra króna í sjóð sem Bændasamtökum Íslands er ætlað að ráðstafa til þeirra bænda sem eiga í hlut.

Yfirlitssýning kynbótahrossa á Sörlastöðum er á morgun föstudaginn 28. maí og hefst kl. 10:00. Byrjað verður á hryssum í flokki 7 vetra og eldri og endað á stóðhestum 7 vetra og eldri. Reiknað er með að hádegishlé verði tekið þegar sýningum á 5 vetra hryssum er lokið, þannig að eftir hádegi verður byrjað á 4 vetra hryssum og síðan yngstu stóðhestunum.

Enn hefur verið ákveðið að framlengja skráningarfrest á kynbótasýninguna á Gaddstaðaflötum við Hellu. Síðasti skráningardagur verður fimmtudagurinn 27. maí. Bændasamtök Íslands hafa gefið leyfi til að sýningin standi til 18. júní.

Svo virðist sem eldgosinu í Eyjafjallajökli sé lokið, a.m.k. í bili. Menn hafa varann á sér en gosið 1821 til 1823 lét stundum ekkert á sér kræla svo mánuðum skipti en tók sig svo upp aftur af tvíefldum krafti. Það er hins vegar vonandi að slíkt gerist ekki nú.
Bændur á öskufallssvæðinu eru þegar teknir til við hreinsunarstörf og þau vorverk sem hafa orðið að bíða vegna gossins.

Samkeppniseftirlitið hefur lokið rannsókn sinni á meintri misnotkun Mjólkursamsölunnar á markaðsráðandi stöðu á markaði fyrir framleiðslu og heildsölu á mjólkurvörum. Niðurstaða Samkeppniseftirlitsins er sú að þau gögn sem aflað var í málinu gefi til kynna að MS hafi brugðist við aukinni samkeppni á markaði sem ríkti eftir innkomu Mjólku á markað árið 2005 og stóð til ársins 2009 af festu og afli. Hin aukna samkeppni hafi veitt Mjólkursamsölunni umtalsvert og nauðsynlegt aðhald á markaði sem neytendur nutu góðs af með auknu vöruúrvali og lægra verði og ennfremur hærra mjólkurverði til bænda. Gögn málsins gefa hins vegar ekki til kynna að Mjólkursamsalan hafi farið út fyrir ramma samkeppnislaga. Þannig er ekki leitt í ljós að Mjólkursamsalan hafi með kerfisbundnum og skipulögðum aðgerðum reynt að útiloka keppinauta frá markaði með samkeppnishamlandi aðgerðum. Því er ekki tilefni til frekari aðgerða af hálfu Samkeppniseftirlitsins.

Gríðarlegt brottfall hefur orðið á Sörlastaðasýningunni, í upphafi voru skráð um 200 hross og þegar hollaröðun var birt á þriðjudagskvöldið voru hrossin komin í 140. Eins og staðan er í dag losa hrossin rétt 100 þannig Búnaðarsambandið neyðist til að breyta hollaröðun umtalsvert. Þeir knapar og eigendur sem þegar hafa kynnt sér hvenær þeir eiga tíma ættu endilega að skoða hollaröðunina á nýjan leik.

Komnar eru niðurstöður úr gróðursýnum sem tekin voru 17. maí sl.l á vefinn hjá okkur. Um er að ræða sýni sem efnagreind voru hjá Landbúnaðarháskóla Íslands.
Greinilegt er á þessum sýnum að gróður er mengaðar á svæðinu kringum eldstöðina og alls ekki hægt að mæla með því að búfénaði sé beitt undir Eyjafjöllum, í vesturhluta Mýrdals og innst í Fljótshlíð.
Etir því sem fjær dregur eldstöðinni minnkar flúormengunin, sérstaklega þar sem rignt hefur að undanförnu. Úrkoma eða nýtt öskufall breyta þessari mynd að sjálfsögðu mjög hratt.

Um 150 manns komu á íbúafund á Hvolsvelli í gærkvöldi. Þar var farið yfir ýmis málefni tengd gosinu í Eyjafjallajökli. Magnús Tumi Guðmundsson frá Jarðfræðistofnun Háskóla Íslands fór yfir þróun gossins og var með nýjar tölur um magn gjósku í gosinu. Nú hafa komið um 300 milljón rúmmetrar af gjósku frá Eyjafjallajökli og til viðmiðunar má nefna að í Kötlugosinu 1918 komu 700 milljón rúmmetra af gjósku frá því gosi.

Hefja á átaksverkefni um aðstoð við íbúa á gossvæðinu á Suðurlandi. Árni Páll Árnason, félags- og tryggingamálaráðherra, og Steingrímur J. Sigfússon, fjármálaráðherra, Vinnumálastofnun, Landgræðslan og sveitarstjórnir Rangárþings eystra, Mýrdalshreppur og Skaftárhreppur eru á þessari stundu að undirrita samning þess efnis að bænum Fljótsdal í Fljótshlíð. Samningurinn felst í að sveitarfélögin á svæðinu munu bjóða fólki á atvinnuleysisskrá vinnu við afleysingar og aðstoð við búskap á svæðinu. Gríðarlegt vinnuálag hefur verið á bændum auk þess sem björgunarsveitir og sjálfboðaliðar hafa lagt fram mikla vinnu við að aðstoða bændur frá gosbyrjun.

Landbúnaðarháskólinn hefur fengið styrk fyrir sumarstarfsmanni til vöktunar flúors og áburðarefna (Ca, Mg, K, P, S) í ösku, jarðvegi, plöntum og drykkjarvatni búpenings á öskufallssvæðinu undir Eyjafjöllum sumarið 2010. Einnig hefur fengist styrkur til kaupa á tækjabúnaði til flúormælinga á rannsóknastofunni á Hvanneyri. Styrkurinn er veittur frá Vinnumálastofnun og iðnaðarráðuneytinu.

Fóðurblandan hefur sent frá sér tilkynningu um lækkun á húsdýrafóðri um allt að 4%. Lækkunin tekur gildi í dag, föstudaginn 21. maí. Í tilkynningunni segir að lækkunin sé tilkomin vegna styrkingar á gengi íslensku krónunnar.

Enn er allt í óvissu hvort Landsmóti verði frestað eða ekki. Búnaðarsambandið hefur því ákveðið að framlengja skráningarfrestinn á kynbótasýninguna á Gaddstaðaflötum til þriðjudagsins 25. maí. Vonandi verður þá búið að taka ákvörðun um hvort og hvenær Landsmót verður. Hollaröðun mun að öllu óbreyttu ekki verða birt fyrr en föstudaginn 28. maí. Röðin verður birt á heimasíðu Búnaðarsambands Suðurlands www.bssl.is . Búast má við breytinum á hollum dag frá degi, því fram að þessu hefur verið mikið um afskráningar á kynbótasýningar hér sunnanlands.

Reglugerð sjávarútvegs- og landbúnaðarráðherra, um markaðsfyrirkomulag við aðilaskipti á greiðslumarki mjólkur, tók gildi við birtingu hennar þann 17. maí sl. Í henni felst að komið verður á fót markaði með mjólkurkvóta sem Matvælastofnun starfræki. Verður markaðurinn starfræktur tvisvar á ári, 1. júní og 1. desember, og í fyrsta sinn 1. desesmber nk. Nokkur óánægja hefur risið meðal bænda vegna breytinganna. Telja þeir t.a.m. að þær eigi sér stað án nægilegs fyrirvara.

Dregið hefur úr virkni gossins í Eyjafjallajökli og gosmökkurinn hefur lækkað undanfarna daga. Það bendir til þess að verulega hafi dregið úr kvikuflæði miðað við lok síðustu viku. Mökkurinn náði í gær upp í um fimm kílómetra hæð og er kvikuflæðið talið vera vel undir 50 tonnum á sekúndu, að því er kom fram í stöðuskýrslu Veðurstofunnar og Jarðvísindastofnunar HÍ í gær. Þar sagði jafnframt að enn mætti búast við sveiflum í gosvirkninni með breytilegu gjóskufalli. Í gær féll töluverð aska innst í Fljótshlíð, einkum í Fljótsdal.