Fóðurblandan hefur sent frá sér tilkynningu þess efnis að mánudaginn 6. desember 2010 muni allt tilbúið fóður hjá fyrirtækinu hækka um 4 – 8% misjafnt eftir tegundum.

Fyrsti rýnifundur um landbúnaðarmál hefst í Brussel í dag en á rýnifundum bera sérfræðingar Íslands og Evrópusambandsins saman löggjöf á tilteknum sviðum. Umræður um landbúnaðarmál munu standa í fjóra daga í þessari lotu og aftur fjóra daga í lok janúar.
Á rýnifundunum er farið yfir löggjöf beggja aðila í þeim 33 efnisköflum sem lagasafn Evrópusambandsins skiptist í til að greina hvar íslensk löggjöf er frábrugðin og hvað semja þarf um.

Haustfundir sauðfjárræktarinnar eru nýafstaðnir og gengur þeir vel fyrir sig. Mæting var mjög góð í Árnes- og Rangárvallasýslum, en eitthvað minni í Austur- og Vestur- Skaftafellssýslum. Þórey fór yfir niðurstöður lamba- og hrútaskoðana í haust, Sveinn fór yfir stöðu Sauðfjársæðingarstöðvarinnar og Jón Viðar kynnti sæðingahrútana sem verða á stöðinni í vetur og fræddi bændur um niðurstöður sæðinganna veturinn 2010 á landsvísu og hversu mikilvægt öflugt skýrsluhald er í þeim efnum. Eftir kaffiveitingar í boði Sauðfjársæðingarstöðvar Suðurlands voru verðlaunaveitingar fyrir bestu lambhrúta, veturgömlu hrútana og efstu hrúta fyrir BLUP kynbótamat 2010.

Jón Bjarnason, sjávarútvegs- og landbúnaðarráðherra hefur skipað starfshóp til að leysa úr þeim vanda sem steðjar að svínarækt í landinu. Þetta var ákveðið á fundi sem ráðherra hélt með fulltrúum Svínaræktarfélags Íslands, Matvælastofnunar, Bændasamtaka Íslands og sjávarútvegs- og landbúnaðarnefndar Alþingis að því er fram kemur í tilkynningu frá ráðuneytinu.

Á vef Matvælastofnunar kemur fram að stofnunin hefur nú kært níu forráðamenn/eigendur nautgripa til lögreglu. Þessi aðilar sinntu ekki tilmælum stofnunarinnar um að tryggja nautgripum sínum útivist eftir að þeim höfðu borist athugasemdir þar að lútandi. Samkvæmt reglugerð um aðbúnað nautgripa skal tryggja öllum gripum, nema graðnautum eldri en sex mánaða, átta vikna útivist hið minnsta ár hvert.

Á vef Matvælastofnunar er að finna uppfærða grein þar sem fram kemur að folaldadauði í kjölfar smitandi hósta, sem herjað hefur á íslensk hross undanfarna mánuði, hafi ekki aukist. Hins vegar er margt annað sem orðið getur folöldum að aldurtila og eru forráðamenn/eigendur folalda hvattir til að lesa greinina sem fer hér á eftir:

Hjá Landbúnaðarháskóla Íslands er komið út ritið Velferð kúa í lausagöngufjósum. Í ritinu er gerð grein fyrir niðurstöðum könnunar á aðbúnaði og velferð mjólkurkúa í lausagöngufjósum á Íslandi. Könnunin var gerð árið 2008 í 46 fjósum víða um landið og var hvert fjós heimsótt tvisvar. Stuðst var við aðferðir sem þróaðar voru í Evrópuverkefninu Welfare Quality®, um velferð búfjár og notuð eyðublöð og mælikvarðar sem fengnir voru þaðan.

Við minnum á námskeið í sauðfjárræktarkerfinu Fjarvis.is sem haldið verður í Heppuskóla á Höfn næst komandi föstudag, 26. nóvember. Nú fer hver að verða síðastur að skrá sig.

Nánari upplýsingar um námskeið í sauðfjárræktarkerfinu Fjarvis.is á Höfn.

Almennir haustfundir Bændasamtakanna hefjast mánudaginn 22. nóvember með fundi á Sauðárkróki. Fyrsti fundur hér á Suðurlandi verður á Flúðum þriðjudaginn 23. nóvember n.k. Alls verða fundirnir 16 talsins, verða haldnir um allt land og verða síðustu fundir þann 6. desember n.k.
Á fundunum verða m.a. rædd þau tækifæri sem landbúnaðurinn hefur til þess að efla þjóðarhag og hvar sóknarfæri liggja. Nýgerður búnaðarlagasamningur verður til umfjöllunar og spurt verður hvernig unnt er að verja kjör bænda í erfiðu efnahagsástandi.

Landbúnaðarstjóri ESB, Dacian Ciolos, kynnti í gær hugmyndir að breytingum á landbúnaðarstefnu ESB (CAP) sem gilda eiga 2013-2020. Þær hugmyndir ganga einkum út á það að stuðningi til bænda verði dreift á réttlátari og jafnari vegu en nú er gert auk þess sem aukið tillit verði tekið til umhverfissjónarmiða. Haft er eftir landbúnaðarstjóranum að það gangi ekki eftir 2013 að mismunandi reglur gildi innan ESB, „gömlu“ löndin og þau „nýju“ verði öll að sitja við sama borð. Þetta þýðir í raun að aukinn stuðningur mun renna til landanna í A-Evrópu frá því sem nú er en V-Evrópu löndin munu þá að sama skapi taka skerðingar á sig.

Samkvæmt upplýsingum frá Matvælastofnun er búið að taka og greina lungnasýni úr 60 lömbum frá bæjum á gossvæðinu. Þau hafa verið skoðuð á Tilraunastöðinni á Keldum. Engar stórsæjar breytingar sem rekja má til gossins hafa fundist, aðeins eitthvað af bólgubreytingum vegna lungnaorma. Vefjaskoðun hefur heldur ekki leitt neitt óeðlilegt í ljós hingað til. Skýrsla um þessar rannsóknir er í vinnslu á Keldum. Þá eru í gangi rannsóknir á efnainnihaldi í beinum og lifur en niðurstöður ekki komnar enn.

Umhverfisráðherra hefur lagt fram frumvarp til breytinga á lögum um úrvinnlsugjald þar sem meðal annars er lagt til að gjald á rúlluplpast hækki út 5 kr/kg í 12 kr/kg eða um 140%. Þessi hækkun hefur óneitanlega þau áhrif að rúlluplast mun hækka í verði. Rúlla af 750 mm plasti mun þannig hækka um 200 krónur í verði og rúlla af 500 mm plasti um 154 kr. vegna hækkunar á úrvinnslugjaldinu verði frumvarpið að lögum.

Nýlega var unnin athugun á þróun breytilegs kostnaðar á kúabúum innan SUNNU-verkefnisins. Verkefnið var unnið að frumkvæði Landssambands kúabænda með hliðsjón af samþykkt ályktunar frá síðasta aðalfundi samtakanna um skoðun á möguleikum á lækkun franmleiðslukostnaðar næstu 10 árin innan greinarinnar.

Þann 1. janúar 2011 taka gildi verðskerðingarákvæði vegna frírra fitusýra (FFS) í mjólk og verður því um að ræða verðskerðingu á afurðastöðvaverði mjólkur ef faldmeðaltal FFS mánaðar fer yfir 1,1 mmol/l. Þeir sem hafa verið við efri mörk og þar yfir eru því eindregið hvattir til að vinna tímanlega að lausn málsins og hafa samband við mjólkureftirlitsmann ef þörf er á og leita eftir aðstoð.
Á undanförnum vikum hafa mjólkureftirlitsmenn farið á alla bæi sem átt hafa í fitusýruvandmálum og víðast hvar náðst árangur. Þó er einhver brögð að því að einstaka bú séu um eða fyrir ofan áður greind mörk, sérstaklega á vissum tímum ársins.

Unnur Brá Konráðsdóttir, alþm., hefur lagt fram fyrirspurn til munnlegs svars til til sjávarútvegs- og landbúnaðarráðherra um aðgerðir til að fyrirbyggja tjón á jörðum bænda undir Eyjafjöllum. Fyrirspurnin er svohljóðandi:

Staða bænda er óskýr í nýju frumvarpi Árna Páls Árnasonar, efnahags- og viðskiptaráðherra, um uppgjör vegna myntkörfulána. Frumvarpið miðar fyrst og fremst að því að taka á skuldamálum einstaklinga en ekki fyrirtækja. Ráðherra mælir fyrir frumvarpinu á Alþingi í dag.
„Það er frekar óskýrt í frumvarpinu hvernig taka á á lánamálum bænda,“ sagði Elías Blöndal, lögfræðingur Bændasamtakanna, en margir bændur eru með myntkörfulán.
Þetta kemur fram í Morgunblaðinu í dag.

Við minnum á námskeið í sauðfjárræktarkerfinu fjarvis.is sem haldin verða á Kirkjubæjarklaustri þann 19. nóvember n.k. og Höfn þann 26. nóvember n.k. Nú fer hver að verða síðastur að skrá sig. Nánari upplýsingar með því að smella á „Lesa meira…“

Uppgjör skýrsluhalds nautgriparæktarinnar fyrir október er lokið og standa meðalafurðir á árskú nú í 5.318 kg yfir landið allt. Afurðir eru nokkru meiri hér á Suðurlandi eða 5.431 kg/árskú til jafnaðar. Afurðir eru sem fyrr mestar í Árnesýslu eða 5.504 kg/árskú og síðan 5.486 kg/árskú í Rangárvallasýslu.
Afurðahæsta búið á landinu er hjá Steinari Guðbrandssyni í Tröð í Borgarbyggð eða fyrrum Kolbeinsstaðahreppi. Þar hafa kýrnar mjólkað 7.945 kg/árskú til jafnaðar síðustu 12 mánuði og eru nú komnar mjög nærri Íslandsmeti kúnna í Akbraut frá 2008 en það er 8.159 kg. Hér á Suðurlandi eru afurðir s.l. 12 mánaða mestar hjá Arnari Bjarna og Berglindi í Gunnbjarnarholti þar sem 109,6 árskýr hafa mjólkað að jafnaði 7.618 kg. Þau eru í fjórða sæti á landsvísu. Lífsval ehf. Í Flatey í Hornafirði er í öðru sæti á Suðurlandi og sjötta á landsvísu með 7.530 kg/árskú og þeim fylgir svo fast á hæla góður listi gróinna sunnlenskra afurðabúa. Þar má nefna Reykjahlíð, Kirkjulæk, Ytri-Skóga, Hraunkot, Helluvað, Arakot, Stóra Ármót og Fjall.

Uppgjör á skýrslum fjárræktarfélaganna fyrir árið 2010 er þegar hafið. Það er fyrr á ferðinni en nokkru sinni áður. Afrekslistarnir eru þegar aðgengilegir á vefnum. Við þá bætist síðan jafnt og þétt eftir því sem uppgjörinu miðar áfram. Af þessum fyrstu tölum er hins vegar strax ljóst að afurðir eru meiri og kjötmatsniðurstöður betri haustið 2010 en áður hefur sést.

Þeir bændur sem enn hafa ekki að fullu gengið frá vorupplýsingunum verða að gera það nú þegar. Til að falla ekki út úr gæðastýringunni verða bændur að skila inn haustupplýsingum fyrir 1. febrúar ár hvert. Eftir því sem skilum á vorupplýsingum seinkar þá seinkar uppgjöri fyrir vorið sem seinkar svo skilum á haustupplýsingum. Einnig er haustuppgjörið á fullu skriði þessa dagana hjá BÍ og vorupplýsingum safnað saman frá mörgum bæjum til uppgjörs.