Eins og alþjóð veit reið Suðurlandsskjálfti yfir í gær. Upptök skjálftans voru undir Ingólfsfjalli mitt á milli Selfoss og Hveragerðis. Mikið eignatjón hefur orðið í skjálftanum a.m.k. hvað næst upptökunum en sem betur fer engin teljandi slys á fólki svo vitað sé.

Í dag náðist samkomulag um nýjan samning um kaup og kjör starfsmanna sem vinna almenn landbúnaðarstörf á bændabýlum var undirritaður í morgun. Gildir hann frá 1. maí sl. til loka nóvember 2010. Ýmis nýmæli eru í þessum samningi, svo sem að starfsmönnum eru nú tryggðar starfsldurshækkanir, auk þess sem ný ákvæði eru um aðbúnað og vinnuvernd. Þá fá landbúnaðarverkamenn aðgang að fræðslusjóðum atvinnulífsins.

Guðbrandur Sigurðsson, forstjóri Auðhumlu svf. lætur að eigin ósk af störfum hjá félaginu, þann 1. júní næstkomandi, eftir ríflega þriggja ára starf hjá því og fyrirrennurum þess. Guðbrandur mun frá sama tíma taka við framkvæmdastjórastarfi hjá Nýlandi ehf. sem er í meirihlutaeigu hans. Það félag mun taka að sér sölu og markaðsfærslu íslenskra mjólkurafurða erlendis fyrir Mjólkursamsöluna auk þess að sinna ýmsum öðrum verkefnum.

Á ársfundi Byggðastofnunar sem fram fór s.l. föstudag kom fram að meginbreyting hefur orðið á útlánastarfsemi Byggðastofnunar og lánveitingar í landbúnaði hafa aukist mjög, enda lánar stofnunin nú til hefðbundins landbúnaðar sem ekki var gert áður fyrr. Fjöldi umsókna frá bændum hefur aukist jafnt og þétt á undanförnum mánuðum og mest vegna kaupa á mjólkurkvóta og stækkunar á fjósum og öðrum búnaði þeim tengdum.

Agnes Geirdal, formaður Félags skógarbænda á Suðurladi, afhenti fyrir stuttu Landsamtökum skógareigenda og öðrum skógarbændafélögum nýjan fána félagsins en Félag skógarbænda hafði staðið fyrir samkeppni varðandi merki félagsins.

Þessa dagana mæðir mikið kynbótadómurum hrossa því nú stendur yfir nokkurra vikna þrotlaus törn við að dæma kynbótahross á þessu landsmótsári. Af því tilefni tók Þuríður Magnúsína Björnsdóttir, blaðamaður á Morgunblaðinu ágætt viðtal við Guðlaug Antonsson, landsráðunaut í hrossarækt sem m.a. nefnir í viðtalinu að hann viljil helst ekki beinasleggju í keppnisbrautina. Viðtalið við Guðlaug fer hér á eftir:

Jarle Reiersen, framleiðslustjóri Reykjagarðs og fyrrverandi dýralæknir alifuglasjúkdóma skrifar áhugaverða grein í Morgunblaðið í dag sem ber titilinn; „Ísland – fyrirmyndarlandið?“. Í greininni fjallar Jarle um nýja matvælalöggjöf sem liggur fyrir Alþingi og sína sýn á hana. Greinin fer hér á eftir:

Ákveðið hefur verið að auglýsa á ný eftir umsóknum um nýliðunarstyrki í sauðfjárrækt skv. gildandi sauðfjársamningi. Auglýst var fyrr á þessu ári og bárust þá 23 umsóknir sem er minna en búist var við. Yfirferð þeirra er nú lokið og ætti umsækjendum að berast tilkynning frá Bændasamtökunum um niðurstöðu nú á næstu dögum.
Í ljósi fjölda umsókna samþykkti stjórn Bændasamtakanna á fundi sínum 30. apríl sl. að leita eftir heimild sjávarútvegs- og landbúnaðarráðuneytisins til að auglýsa á ný eftir umsóknum. Ráðuneytið hefur nú fallist á það. Sú breyting var gerð að hægt er að sækja um styrk vegna bústofnskaupa sem fóru fram frá og með 1. janúar 2007 og síðar, en í fyrri úthlutun var skilyrði að kaupin hefðu átt sér stað 1. október 2007 eða síðar. Að öðru leyti eru reglurnar óbreyttar.

Engar sérreglur gilda á Íslandi um innflutning erfðabreyttra matvæla. Þau finnast nú víða um heim og telja margir að plöntuerfðatækni verði lykilatriði í að brauðfæða fjölgandi mannkyn á ört rýrnandi ræktunarlandi. Byrjað er að rækta erfðabreytt bygg hérlendis, þó eingöngu til sérvirkrar prótínframleiðslu í lyf, lyfjaþróun og til iðnaðarnota. Kynbætur hafa verið stundaðar allar aldir með blöndun skyldra tegunda. Erfðabætur byggjast hins vegar á líftækni, þar sem erfðamengi lífvera er breytt til að styrkja eftirsóknarverða eiginleika. Oft er það gert með því að blanda saman jurta- og dýraríki.

Bændasamtökin sendu í vikunni frá sér svar til nefndasviðs Alþingis vegna beiðnar um umsögn vegna frumvarps um breytingar á matvælalögum. Eins og fram hefur komið í fjölmiðlum telja Bændasamtökin að ekki sé unnt að gefa umsögn um frumvarp innan tilskilins frests, þar sem margt varðandi frumvarpið, aðdraganda þess og framkvæmd er óljóst og umsagnarfrestur afar skammur.

Föstudaginn 16. maí verður efnt til málþings um lífrænan landbúnað í Norræna húsinu. Á fundinum verður fjallað um hvort lífrænn landbúnaður sé valkostur á Íslandi. Fundurinn hefst kl. 12:45 og stendur til kl. 17:00. Dr. Áslaug Helgadóttir, aðstoðarrektor rannsóknamála, Landbúnaðarháskóla Íslands setur fundinn og Einar K. Guðfinnsson sjávarútvegs- og landbúnaðarráðherra ávarpar fundarmenn. Fundarstjóri verður Dr. Sjöfn Sigurgísladóttir, forstjóri Matís.

Væntanleg matvælalöggjöf gæti leitt til þess að innlendri framleiðslu verði ýtt til hliðar á smásölumarkaðnum, að mati þeirra sem hagsmuna eiga að gæta í landbúnaði. Takmörkuð samkeppni á smásölumarkaði þar sem tveir stórir aðilar ráða ferðinni er helsta áhyggjuefni þeirra.
Með matvælalöggjöfinni, sem mun gera að verkum að Ísland verður hluti af innra markaði Evrópska efnahagssvæðisins með búfjárafurðir, kjötvörur, mjólkurvörur og egg, verður talsverð breyting á skilyrðum íslensks landbúnaðar. Til stendur að löggjöfin verði samþykkt í þessum mánuði og taki gildi 1. júlí og verði að fullu komin til framkvæmda 18 mánuðum síðar.

Svínaræktarfélag Íslands hefur sent frá sér ályktun í kjölfar aðalfundar þann 26. apríl sl., m.a. vegna neikvæðrar og illa upplýstrar umræðu um matvælaverð á Íslandi og þátt íslensks landbúnaðar, þar á meðal svínaræktarinnar í því. Kemur þar einnig fram að aðalfundurinn líti á loforð ríkisstjórnarinnar til verkalýðshreyfingar í nýgerðum kjarasamningum, um frekari lækkun tolla á innfluttar matvörur, sem hreina aðför að íslenskum landbúnaði.

Aðalfundurinn mótmælir einnig þeim áformum að opna landið fyrir innflutningi á fersku kjöti um mitt næsta ár, sem muni ógna góðu heilbrigði íslensks búfjár og heilnæmi matvæla. Er þess krafist að gripið verði til nauðsynlegra mótvægisaðgerða til verndar innlendri búvöruframleiðslu.

Um hvítasunnuhelgina verður líf og fjör í Skagafirðinum þegar efnt verður til Sauðburðarhelgar í Syðri-Hofdölum og að Hótel Varmahlíð.

 „Ég er búinn að ganga með þessa hugmynd lengi í kollinum og hef oft hugsað um það hvernig hægt sé að framkvæma það að bjóða fólki að koma og kynnst sveitasælunni og allri þeirri miklu vinnu sem á sér stað í sveitinni á þessum tíma. Nú í apríl ákváðum við að drífa í því að framkvæma þetta og ég hringdi í Svanhildi á Hótel Varmahlíð til að athuga með gistimöguleika og mat. Leist henni svo vel á hugmyndina okkar að við ákváðum að hittast plönuðum dagskránna og settum inn heimsókn í hefðbundið fjós og einnig með róbóta. Síðan skelltum við okkur í að auglýsa þetta og bjóða upp á eina helgi í ár og sjá svo til með framhaldið,“ segir Klara Helgadóttir í Syðri-Hofdölum um tildrög þess að efnt er til þessarar Sauðburðarhelgar.

Hæstiréttur hefur ómerkt dóm héraðsdóms Reykjavíkur í máli unglingsstúlku sem varð fyrir því að nýborin kýr réðst skyndilega á hana. Kýrin stangaði stúlkuna og felldi og traðkaði síðan á andliti hennar. Rétturinn vísaði málinu á ný heim í hérað.

Hjónin og bændurnir Sæmundur Jón Jónsson og Anne Manly Thomsen í Árbæ á Hornafirði ætla að hefja framleiðslu á ís. Tilraunaframleiðsla er þegar hafin en þau reikna með að ísframleiðslan verði komin í fullan gang seinna í þessum mánuði.

Minkabændur á Íslandi bera sig vel enda hafa gengisbreytingar að undanförnu verið þeim hagstæðar. Björn Halldórsson, formaður félags loðdýrabænda, segir verð á minkaskinnum frá Íslandi vera með því hæsta sem greitt er í heiminum.
Horfur í greininni séu góðar, ekkert bendi til verulegrar framleiðsluaukningar í heiminum næstu 3-4 árin en erfiðara sé að meta eftirspurnina.

Nautgriparæktarfélag Hrunamanna hélt aðalfund sinn í dag og þar kom fram hörð gagnrýni á matvælafrumvarpið svokallaða. Fundurinn samþykkti ályktun þar sem frumvarpniu er algjörlega hafnað og bent á þær hættur sem skapast geta með innflutningi á hráu kjöti.

Í tilefni af 100 ára afmæli Búnaðarsambands Suðurlands 2008 verður haldin landbúnaðarsýning á Gaddstaðaflötum við Hellu dagana 22.-24. ágúst næstkomandi. Landbúnaðarsýningin á Hellu 2008 verður ein sú stærsta sinnar tegundar sem haldin hefur verið hérlendis um árabil. Sýningin verður þróunar- og tæknisýning jafnframt því sem hún kynnir hlutverk og stöðu íslensks landbúnaðar í þjóðfélaginu. Markmið sýningarinnar er að kynna fjölbreytni íslensks landbúnaðar, hátt tæknistig og þá miklu þekkingu sem er að finna innan greinarinnar.

Nýkjörin stjórn Búnaðarsambands Suðurlands fundaði f.h. í dag en sem kunnugt er voru þau Guðbjörg Jónsdóttir á Læk og Gunnar Kr. Eiríksson í Túnsbergi kjörin í stjórn á aðalfundi BSSL 18. apríl s.l.
Á fundinum skipti stjórnin með sér verkum þannig að Guðbjörg Jónsdóttir er formaður, Egill Sigurðsson er varaformaður, Guðni Einarsson er ritari og Ragnar Lárusson og Gunnar Kr. Eiríksson eru meðstjórnendur.