Samkeppniseftirlitið hefur komist að þeirri niðurstöðu að Bændasamtök Íslands (BÍ) hafi brotið gegn samkeppnislögum með aðgerðum sem miðuðu að því að hækka verð á búvörum.
Snýr brotið að búvörum sem ekki lúta opinberri verðlagningu skv. búvörulögum, s.s. kjúklingum, eggjum, grænmeti og svínakjöti. Vegna þessa brots er BÍ gert að greiða 10 milljónir króna stjórnvaldssekt og lagt fyrir þau að grípa til aðgerða til þess að koma í veg fyrir að samskonar brot verði endurtekin.

Greiðendur erlendra húsnæðislána gætu séð fram á léttari greiðslubyrði næstu misseri verði ný greiðslujöfnunarleið Íslandsbanka á þessum lánum almenn. Bankinn ætlar strax í næstu viku að opna fyrir umsóknir viðskiptavina sinna um þetta úrræði. Um er að ræða eins konar teygjulán sem taka mið af greiðslubyrðinni eins og hún var 1. maí 2008 og breytast afborganir í samræmi við greiðslujöfnunarvísitölu, en ekki neysluvísitölu.

Einn af þekktustu viðskiptarithöfundum Bandaríkjanna segir íslenska karla hafa stýrt uppbyggingu fjármálageirans af fífldirfsku og vankunnáttu. Ísland sé gjaldþrota land, krónan búin að vera, skuldir margföld landsframleiðsla og fólk hamstrar mat og peninga, samtímis því sem það sprengir upp Range Rover-jeppana sína til að ná peningum út úr tryggingafélögum. Þetta eru inngangsorð úttektar á uppsveiflunni hér og hruninu í fyrrahaust, og birtist í aprílhefti bandaríska tímaritsins Vanity Fair undir heitinu Wall Street í freðmýrinni (e. Wall Street on the Tundra).

Pål Haugstad, formaður norsku bændasamtakanna Norges Bondelag, var gestur Búnaðarþings í ár. Hann sagði í viðtali í Ríkissjónvarpinu að norrænir bændur hefðu sent stuðningsyfirlýsingu til íslenskra bænda og áskorun til stjórnvalda í þeim erfiðleikum sem nú blasa við. Varðandi Evrópumálin sagði Pål að útilokað væri að aðlaga landbúnaðarstefnu Evrópusambandsins að norskum veruleika. Hann sagði það sama eiga við hérlendis.

Meðal þeirra sem tóku til máls á Búnaðarþingi í gær var Steingrímur J. Sigfússon, ráðherra landbúnaðar, sjávarútvegs og fjármála. Hann sagði meðal annars að drög að nýju frumvarpi um Bjargráðasjóð lægju fyrir en í þeim er sjóðnum veitt heimild til að styrkja bændur vegna áburðarkaupa. Að hve miklu leyti liggur ekki fyrir en niðurstöðu er að vænta á næstu dögum.

Íslenska krónan hefur átt í verulegri vök að verjast síðasta árið. Fyrir því höfum við öll fundið. Fyrir ári stóð gengisvísitala íslensku krónunnar, GVT, í um 130 stigum. Í dag er GVT í rúmlega 190 stigum. Greining Íslandsbanka fjallaði um gengisþróun GVT gagnvart þó nokkrum myntum í grein í gær sem fjallað var um hér á síðunni í morgun. Þar segir að blómaskeiði vaxtamunarviðskipta sé lokið.

Á heimasíðu Viking Genetics kemur fram að sá núlifandi gripur (SRB-svartskjöldóttar sænskar kýr) í Svíþjóð sem státar af mestum æviafurðum er 444 Dotty frá Br. Bengt og Göran Larsson, Holmryd, Bredared. Kýrin hefur borið 12 sinnum og hefur hiingað til mjólkað 163.337 kg OLM eða 12.197 kg verðefna. Meðalafurðir eru á 14 árum 11.095 kg mjólkur með 4,4% fitu og 3,5% prótein.

Til greina kemur að sameina Háskóla Íslands og Landbúnaðarskólann á Hvanneyri. Þetta kemur fram í bréfi sem menntamálaráðuneytið sendi stjórnendum skólanna um miðjan febrúar.
Jón Atli Benediktsson, aðstoðarrektor vísinda og kennslu við HÍ, segir að í bréfinu sé óskað eftir því að báðir skólar skoði fýsileika þess að sameina Háskóla Íslands og Landbúnaðarháskólann á Hvanneyri. „Okkur finnst áhugavert að skoða þetta betur, en það á eftir að fara yfir málið,“ segir Jón Atli. Hann bendir á að sameiningu Kennaraháskólans og Háskóla Íslands hafi lokið á síðasta ári og það yrði væntanlega notuð svipuð aðferðarfræði við þessa sameiningu. Jón Atli segir að samkvæmt ósk menntamálaráðuneytis verði skipaður hópur sem muni skoða hvort sameiningin sé æskileg. Sá hópur skili af sér í mars.

Í dag verða þau naut sem eru í nautastöðinni á Hvanneyri flutt í nýju nautastöðina á Hesti. Þar með verður starfsemi á Hvanneyri lokið. Ætlunin er að hefja síðan sæðistöku í nýju stöðinni í næstu viku.
Í næstu viku verða síðan þeir nautkálfar sem enn eru í Uppeldisstöðinni í Þorleifskoti fluttir í nýju stöðina á Hesti.

Hægt er að auka hollustu brauðvara með því að nota að hluta til bygg í staðinn fyrir hveiti, að því er fram kemur í rannsókn Matís (Matvælarannsóknir Íslands) og Landbúnaðarháskóla Íslands. Í byggi eru trefjaefni sem geta lækkað kólestról í blóði og haft dempandi áhrif á blóðsykur. Ólafur Reykdal verkefnastjóri hjá Matís, segir í fréttatilkynningu að hægt sé að auka hollustu brauðvara með því að nota að hluta til bygg í staðinn fyrir hveiti.

Steingrímur J. Sigfússon landbúnaðarráðherra segir mjög erfitt að taka til baka þá skerðingu á búvörusamningum ríkisins við bændur, sem eru í fjárlögum þessa árs. Ef það eigi að gera þurfi að tryggja fé á fjárlögum til móts við slíka breytingu. Eygló Harðardóttir, þingmaður Framsóknarflokksins, spurði ráðherrann að því á Alþingi í morgun hvort hann ætlaði sér að taka skerðingarnar til baka.

Minkaskinn seldust upp á febrúar-uppboði hjá Kopenhagen Fur, stærsta skinnamarkaði heims. Alls seldust 3,5 milljónir skinna fyrir rúmlega 15 milljarða króna.
Nokkur spenna var fyrir uppboðið þar sem sala í haust var fremur dræm og alls óljóst hverning markaðurinn brygðist við fjármálakreppunni. Eftirspurnin fór hins vegar fram úr björtustu vonum enda seldust öll skinn sem boðin voru upp.
Verðið lækkaði að vísu um 12,5% frá síðasta uppboði en góð sala vegur þar upp á móti.

Ný Nautastöð Bændasamtaka Íslands verður vígð þriðjudaginn 10. febrúar að Hesti í Borgarfirði. Húsið verður opið bændum og öllu áhugafólki um íslenska nautgriparækt á milli kl. 13 og 17. Klukkan 14:00 fer vígslan fram auk þess sem boðið verður upp á tónlistaratriði, fyrirlestra og að sjálfsögðu veitingar.

Steingrímur J. Sigfússon, ráðherra landbánaðarmála, óttast að margir bændur þurfi að bregða búi vegna fjárhagserfiðleika. Hann mun á næstunni ræða við bændaforystuna um möguleg úrræði.
Ráðherrann segist ekki aðeins hafa áhyggjur af stöðu kúabænda, heldur bændastéttinni í heild.

Innganga í ESB er ekki gerð til fimm heldur 50 ára í hið minnsta. Þið verðið því að komast af til lengri tíma hvað efnahagsmál og matvælabirgðir varðar. Þegar Finnar gengu í ESB var það markmið stjórnvalda að finna lausn til að styrkur finnsks landbúnaðar yrði tryggður við inngönguna. Hefði það ekki verið gert værum við nú illa stödd sem landbúnaðarsamfélag,“ sagði Pekka Pesonen, finnskur framkvæmdastjóri evrópsku bændasamtakanna COPA-Cogeca á hádegisfundi Samfylkingarinnar í gær.

Umhirðu um nótur þarf að vanda, því það er dýrt að týna nótu. Kostnaður við að týna nótu í einstaklingsrekstri er um 50% af upphæð nótunnar, að teknu tilliti til tapaðs innskatts, tekjuskatts og útsvars. Ef nóta fyrir keyptum búaðföngum upp á 25.000 kr. tapast er raunverulegur kostnaður búsins til viðbótar af þessum búaðföngum ekki aðeins virðisaukaskattsupphæðin, 4.920 kr. eins og sumir gætu haldið, heldur 12.426 kr. auk  25.000 kallsins sem greiddur var í upphafi. Nóta sem ekki kemur til frádráttar í búrekstrinum virkar einfaldlega sem tekjuaukning bóndans sem greiða þarf skatta af.  Góð umhirða um nótur búsins er því peningur beint í vasann!

Nýr starfsmaður hefur verið ráðinn í fjármálaráðgjöf BSSL í samvinnu við Bændasamtök Íslands. Um tímabundna ráðningu er að ræða til eins árs í fæðingarorlofi Margrétar Ingjaldsdóttur. Nýi starfsmaðurinn heitir Eggert Þröstur Þórarinsson og er ættaður frá Hraungerði í Álftaveri.

Endurgreiddur virðisaukaskattur er ekki lottóvinningur! Fáir þú endurgreiddan virðisaukaskatt aftur og aftur er afar líklegt að verulegt tap sé búinu því það þýðir einfaldlega að innskatturinn er meiri en útskatturinn, þ.e. útgjöldin meiri en tekjurnar. Það er hvoru tveggja bæði afar óheppilegt og afar óeðlilegt í hvaða rekstri sem er.

Á fréttamannafundi um kl. 13 í dag tilkynnit Geir H. Haarde forsætisráðherra á ríkissjórn Sjálfstæðisflokks og Samfylkingar væri fallin. Hann mun síðar í dag ganga á fund forseta Íslands og biðjast lausnar fyrir sig og ráðuneyti sitt.

Í nýútkomnu fréttabréfi BSSL (1.tbl. 2009) var ranglega sagt að Sigmar Aðalsteinsson byggi á Jaðri í Flóahreppi. Hið rétta er að hann býr í Jaðarkoti. Beðist er velvirðingar á þessum mistökum. Eftir sem áður tekur hann á móti pöntunum um klaufsnyrtingu í síma 696-8653. Sömuleiðis tekur félagi hans og frændi, Þorsteinn Logi Einarsson, á móti pöntunum í síma 867-4104.