Síðasta föstudag, 19. mars, var opinn dagur á Tilraunabúinu á Stóra Ármóti þar sem gestum og gangandi var boðið að koma og skoða tilraunafjósið og kynna sér starfsemina. Dagurinn heppnaðist mjög vel og mættu vel á þriðja hundrað manns á svæðið.
Auk kynningar á starfsemi Tilraunabúsins kynnti Búnaðarsambandið m.a. túnkortagerð,  Bændasamtök Íslands kynntu gagngrunnana huppa.is og jord.is auk fóðuráætlanagerðar með NorFor.  Landbúnaðarháskóli Íslands var með kynningu á tilraunastarfi. Þá var farið yfir kúadóma og sýndur klaufskurður í klaufskurðarbás Kynbótastöðvarinnar.

Eldgos hófst á Fimmvörðuhálsi á tólfta tímanum á laugardagskvöldið, 20. mars. Þegar í stað var lýst yfir hættustigi og bæir á hættusvæði rýmdir vegna hugsanlegs flóðs ef gosið hefði undir jökli. Síðan þá hefur komið í ljós að ekki er hætta á flóði að svo stöddu en rýming er enn í gildi á eftirtöldum bæjum: Drangshlíðardalur, Núpakot, Þorvaldseyri, Seljavellir, Lambafell, Önundarhorn, Berjanes, Stóra Borg, Eyvindarhólar, Hrútafell, Rauðuskriður, Fljótsdalur, Brú og Leifsstaðir.
Annarri rýmingu er þar með aflétt. Enn er unnið á neyðarstigi. Rýmt verður að nýju ef forsendur breytast.

Í könnun sem fyrirtækið MMR, Markaðs- og miðlarannsóknir ehf., hefur gert kemur í ljós að liðlega þrír af hverjum fjórum aðspurðum, 76,3%, kváðust frekar eða mjög fylgjandi því að ríkið eigi að greiða styrki til íslensks landbúnaðar. Mjög athyglisvert er að ríkisstyrkir til landbúnaðar njóta mest fylgis í yngsta aldurshópnum, 18-29 ára, en þar eru 82,8% frekar eða mjög fylgjandi þeim. Það sama gildir um 73% þeirra sem eru 30-49 ára og 75,5% þeirra sem eru 50-67 ára en könnunin náði til fólks á aldrinum 18-67 ára.

Reglugerð um einstaklingsmerkingar búfjár tók gildi árið 2005 þar sem m.a. er kveðið á um að skylt sé að skrá og einstaklingsmerkja öll hross eldri en 10 mánaða. Í byrjun voru hross fædd fyrir árið 2003 undanþegin merkingarskyldu en nú hefur sú undanþága verið felld úr gildi. Hross sem fædd eru árið 2008 og síðar skulu vera örmerkt en frostmerki eru viðurkennd í eldri hrossum, að því gefnu að þau séu læsileg.

Álit Framkvæmdastjórnar ESB á aðildarumsókn Íslands var til umfjöllunar á fundi sjávarútvegs- og landbúnaðarnefndar Alþingis í fyrradag að ósk Einars K. Guðfinnssonar, þingmanns Sjálfstæðisflokksins.
Hann segir ljóst að aðild að ESB muni hafa gríðarleg áhrif á sjávarútveg og landbúnað hér á landi.

LS hefur borist tilkynning frá Matvælastofnun þar sem að fram kemur að stofnunin hafi tekið beiðni samtakanna um rannsókn vegna lyfsins Albencare til meðferðar.
Ætlunin er að rannsaka málið frekar í samræmi við beiðni LS. Samstarfsnefnd MAST og Lyfjastofnunar hefur jafnframt fundað um hvort taka eigi lyfið af markaði. Nefndin taldi ekki ástæðu til þess á þeim forsendum að ekki væri neinn grunur um óæskilega verkan lyfsins væri það notað í samræmi við gildandi undanþágu. Sú undanþága felur í sér að lyfið eigi að gefa nautgripum.

Samkvæmt upplýsingum frá Samtökum afurðastöðva í mjólkuriðnaði (SAM) var sala á mjólkurvörum í fyrra meiri en búist var við í erfiðu efnahagsástandi. Hins vegar breyttist neyslumynstur nokkuð á þann veg að neytendur færðu sig úr dýrari mjólkurvörum í ódýrari mjólkurvörur.
Mjólkurframleiðsla ársins 2009 dróst saman um 0,38% frá árinu á undan og nam tæpum 126 milljónum lítra.

Erlendur Björnsson, sauðfjárbóndi í Seglbúðum í Landbroti, hlaut í gær Evrópsku landgræðsluverðlaunin (The Environment and soil management award) sem ELO-samtökin (European Landowner’s organization) veita árlega. Erlendur hlýtur verðlaunin fyrir uppgræðslu lands og endurheimt raskaðra vistkerfa á jörð sinni. Hann hefur grætt land sitt frá 1982 og frá 1994 innan verkefnisins Bændur græða landið, sem er samstarfsverkefni bænda og Landgræðslu ríkisins.

Fóðurblandan hefur birt sáðvöruverð. Ánægjulegt er að sjá að sáðvara lækkar í mörgum tilfellum og á það einkum við um grasfræ, í sumum tilvikum grænfóðurs. Ef litið er á algengustu tegundir þá lækka grasfræblöndurnar í verði f.f. ári um 4-13%, Vega vallarfoxgras lækkar um 5% en aðrar tegundir vallarfoxgrass hækka um 8%.

Sauðfjárbændur sem ætla að sækja um nýtt leyfi til að selja líflömb skulu senda skriflega umsókn til Matvælastofnunar eigi síðar en 1. apríl 2010 á eyðublöðum sem finna má á www.mast.is eða með því að hafa samband í síma 530-4800 og fá þau send.
Sauðfjárbóndi sem nú þegar hefur fengið söluleyfi heldur því milli ára án umsóknar, svo lengi sem hann uppfyllir skilyrði reglugerðarinnar. Tilkynna þarf Matvælastofnun ef óskað er að söluleyfi verði fellt niður og mun stofnunin þá taka nafn búsins af lista yfir bú sem hafa leyfi til að selja líflömb árið 2010.

Sjö árum eftir að lánastofnanir þurftu að afskrifa milljarða vegna taps í svínarækt þurfa fjármálastofnanir aftur að taka á sig milljarða tap vegna lánveitinga til svínabúa. Arion banki er enn á ný farinn að reka svínabú, en bankinn er núna með um 25% markaðshlutdeild í svínarækt.
Verð á svínakjöti hefur lækkað mikið að undanförnu. Verðið er núna næstum 40% lægra en það var í ársbyrjun 2008. Þessa lækkun má fyrst og fremst rekja til þess að framleitt er of mikið af svínakjöti í landinu. Markaðurinn hefur verið að dragast saman m.a. vegna þess að landsmönnum hefur fækkað. Þar munar ekki síst um útlendinga sem flutt hafa frá landinu, en þeir eru margir aldir upp við matarmenningu sem byggist á mikilli neyslu á svínakjöti.

Össur Skarphéðinsson, utanríkisráðherra, sagði alveg ljóst að kostnaður við stofnanakerfi landbúnaðarins hér á landi muni aukast verulega við aðild að Evrópusambandinu. Hins vegar muni stjórnvöld reyna að ná fram sem hagstæðastri niðurstöðu í aðildarviðræðum.
Einar K. Guðfinnsson, þingmaður Sjálfstæðisflokks, gerði í fyrirspurnartíma á Alþingi í dag að umtalsefni viðtal í Morgunblaðinu við Jón Bjarnason, landbúnaðar- og sjávarútvegsráðherra, á laugardag. Þar sagði Jón m.a. að Evrópusambandið gerði kröfur um að komið verði á fót stofnunum hér á landi til þess að hafa umsjón með framkvæmd sameiginlegu landbúnaðarstefnunnar.

Landssamtök sauðfjárbænda hafa óskað eftir rannsókn yfirdýralæknis f.h. MAST og Lyfjastofnunar á málefnum tengdum meðferð ormalyfsins Albencare.
Tilurð málsins er sú að við fósturtalningu á Brjánslæk á Barðaströnd fyrir skömmu kom í ljós að mun fleiri ær eru lamblausar en eðlilegt má telja auk þess sem tvöfalt fleiri eru einlembdar. Í framhaldi af því vaknaði grunur um að lyfið Albencare gæti tengst málinu. Það hefur nú orðið til þess að óskað hefur verið eftir rannsókn.

Uppgjör febrúar-mánaðar í skýrsluhaldi nautgriparæktarinnar hefur verið birt á vef Bændasamtakanna. Afurðir eftir árskú hafa heldur lækkað frá því um áramót og eru nú 5.116 kg/árskú. Sama þróun hefur orðið á Suðurlandi þar sem afurðir eftir árskú reiknast nú 5.394 kg.
Skýrsluskil eru mjög góð eða 97% á landinu öllu. Hér á Suðurlandi eru skýrsluskil best í A-Skaft. eða 100%. Síðan koma Árnessýsla og V-Skaft. með 97% og Rang. með 95%.
Afurðir eru sem fyrr mestar í Skagafirði en Snæfellingar koma þar mjög skammt á eftir.
Reykjahlíð trónir enn á toppnum á lista yfir afurðahæstu búin með 7.700 kg/árskú en Daníel í Akbraut er í fjórða sæti á landsvísu og Kirkjulækur í því sjötta.

Í gær fæddist sannkallaður risakálfur á Ytri-Skógum undir Eyjafjöllum. Kálfurinn vóg 77 kg og var að sjálfsögðu tekinn með keisara enda varla á færi nokkurra kúa að bera slíku flykki. Lars Hansen, dýralæknir, aðstoðaði kálfinn, sem er kvíga, í heiminn. Kvígan lifði burðinn af og heilsast vel. Móðirin er Húfa 350 Trefilsdóttir 96006, móðir Húfs 07049, en hún var komin 35 daga fram yfir tal. Faðir kálfsins er Flói 02029.

Eigendur Fóðurblöndunnar hafa lagt fyrirtækinu til 600 milljónir í aukið hlutafé. Jafnframt hafa skuldir fyrirtækisins verið lækkaðar niður í um tvo milljarða, en fyrirtækið skuldaði rúmlega 5,1 milljarð í árslok 2008.
Stærsti eigandi Fóðurblöndunnar er Kaupfélag Skagfirðinga með yfir 70% hlut og Auðhumla með um 18% hlut. Auðhumla, sem á og rekur Mjólkursamsöluna, keypti árið 2006 hlut í Fóðurblöndunni. Skiptar skoðanir eru meðal bænda um hvort félagið eigi að taka þátt í rekstri fóðurfyrirtækja. Félagið taldi hins vegar að það yrði að reyna að verja eign sína með því að leggja Fóðurblöndunni til aukið eigið fé.

Skjálftavirknin í Eyjafjallajökli tók aftur kipp í nótt og hviða smáskjálfta mældist milli kl. 03:40 og 05:20. Þá urðu nokkrir skjálftar um og yfir 2 stig, sá stærsti 2,6 stig. Alls hafa mælst á milli 270 og 280 skjálftar á þessu svæði frá miðnætti. Skjálftarnir mælast enn á sama dýpi og verið hefur eða 7-10 km.

Hagtölur landbúnaðarins 2010 eru komnar út. Eins og fyrri ár er útgáfan í bæklingsformi og er alls 30 síður. Í Hagtölum landbúnaðarins er m.a. hægt að finna tölfræði um landið og bóndann, bústofn og bústærð, landbúnaðarframleiðsluna, markaðsmál, verðlag og vísitölur o.m.fl. Bæklingurinn fer víða – hann er m.a. vinsæll á meðal ferðamanna, skólafólks og að sjálfsögðu á meðal þeirra sem starfa í landbúnaði.

Stjórnir 26 hestamannafélaga hafa undiritað mótmælaskjal þar sem mótmælt er hvernig staðið var að vali á Reykjavík sem staðsetningu Landsmóts hestamanna árið 2012. Alls eru 47 félög aðilar að Landssambandi Hestamannafélaga (LH). Búið var að ákveða fund með Haraldi Þórarinssyni formanni LH 5. mars síðastliðinn þar sem afhenda átti mótmælaskjalið en Haraldur aflýsti þeim fundi að kvöldi 4. mars en boðaði til fundar 9. mars í staðinn. Hinn 5. mars skrifuðu Haraldur, forsvarsmenn Fáks í Reykjavík og fulltrúar Reykjavíkurborgar síðan undir samning um að Landsmót skyldi haldið í Reykjavík.

Dregið hefur úr skjálftavirkni undir Eyjafjallajökli. Almannavarnir munu mjög líklega aflétta viðbúnaðarstigi að sögn Steinunnar S. Jakobsdóttur, jarðeðlisfræðingi hjá Veðurstofunni. Mjög ólíklegt sé að þessari skjálftahrinu ljúki með gosi.