Samkvæmt upplýsingum frá jarðfræðingum hjá Jarðvísindastofnun Háskóla Íslands heldur klepragígur áfram að hlaðast upp í nyrsta ískatli Eyjafjallajökuls og hraunið rennur áfram til norðurs að Gígjökli. Farið var í eftirlitsflug yfir eldstöðvarnar í gær með flugvél Landhelgisgæslunnar. Lítið sást til eldstöðvanna en hægt er að fylgjast með þróuninni á ratsjá flugvélarinnar. Gosið virðist svipað og undanfarna daga en þó mun minna en í upphafi.

Íslandsbanki hefur sent frá sér athugasemd vegna umfjöllunar Morgunblaðsins á málefnum bóndans á Skáldabúðum. Þar kemur m.a. fram að Íslandsbanki hefur farið þess á leit við eftirlitsnefnd sem skipuð er af ráðherra efnahags- og viðskiptamála að hún fari yfir öll gögn og feril málsins. Þá segir Íslandsbanki það vera rangt að umrædd eign hafi verið seld án auglýsingar.
Athugasemd Íslandsbanka fer hér á eftir:

Í Morgunblaðinu í dag, fimmtudaginn 29. apríl, er viðtal við Sigurgeir Runólfsson bónda á Skáldabúðum. Þar segir hann farir sínar ekki alveg sléttar í viðskiptum sínum við bankakerfið en hann hefur neyðst til að selja jörðina eftir að viðskiptabanki hans tók þá ákvörðun.
Sigurgeir segist hafa reynt að berjast á móti þessu, en eins manns stríð endi aldrei vel. Hann segir jafnframt að jörðin hafi verið seld án þess að auglýsa hana og að hann og kona hans, Þórey Guðmundsdóttir, séu óánægð með vinnubrögð bankans en hafi ekki treyst sér til annars en að samþykkja skilmála bankans, enda hafi þau staðið frammi fyrir því að vera lýst gjaldþrota ef þau skrifuðu ekki undir samning um sölu jarðarinnar. Sigurgeir segir fjölskylduna vera á götunni og sig atvinnulausan.

Nýsköpunarfyrirtækið ORF Líftækni ætlar að tvöfalda ræktun sína á erfðabreyttu byggi í sumar til að anna aukinni eftirspurn eftir afurðum fyrirtækisins. Í sumar mun hluti byggræktunar fyrirtækisins fara fram í 2.500 fermetra gróðurhúsi að Kleppjárnsreykjum í Borgarfirði.
Fyrirtækið hefur sent frá sér tilkynningu þar sem segir að byggið sem verður ræktað í Borgarfirði myndi í fræjum sínum verðmætt prótein sem m.a. er ætlað til notkunar í snyrtivörur. „Stærstur hluti aukinnar framleiðslu sé ætlað að mæta aukinni eftirspurn meðal erlendra viðskiptavina í snyrtivöruiðnaðinum.

Stjórn Bændasamtaka Íslands hefur sent frá sér tilkynningu þar sem þakkað er fyrir þann stuðning sem bændum hefur verið sýndur vegna eldgossins í Eyjafjallajökli. Tilkynningin fer hér á eftir:
„Bændasamtökin þakka fjölmörgum sem sýnt hafa bændum stuðning í hug og verki undanfarna sólarhringa. Sérstakar þakkir eru færðar til samtaka bænda í nágrannalöndum okkar og raunar um allan heim. En atburðir vekja til umhugsunar mikilvægi á starfi bænda, velferð dýra og matarframleiðslu. Íslendingar sýna innlendri matvælaframleiðslu mikinn skilning og meta bændur það mikils og vilja rækja það hlutverk, sem er besti stuðningurinn til lengri tíma.

Starfsfólk Landgræðslunnar vinnur nú að því hörðum höndum að kanna þær leiðir sem stofnunin getur farið til að aðstoða bændur undir Eyjafjöllum svo sem varðandi aukatún til sláttar í sumar, að hefta fok þar sem jökulhlaupið skyldi eftir leir og framburð beggja vegna Markarfljóts og kanna ástand heiðanna.
Starfsfólk Landgræðslunnar vinnur nú að því hörðum höndum að kanna þær leiðir sem stofnunin getur farið til að aðstoða bændur undir Eyjafjöllum svo sem varðandi aukatún til sláttar í sumar, að hefta fok þar sem jökulhlaupið skyldi eftir leir og framburð beggja vegna Markarfljóts og kanna ástand heiðanna.

Stjórn Búnaðarsambands Suðurlands hefur ákveðið að halda formannafund búnaðar- og búgreinafélaga föstudaginn 30. apríl á Hótel Hvolsvelli og hefst hann kl 11:00.
Ástæðan er eldgosið í Eyjafjallajökli og ástandið á því svæði þar sem öskufall eða flóð hafa valdið tjóni. Tilgangur með fundinum og fundarefni er að fara yfir stöðu mála, upplýsa hvað Búnaðarsambandið hefur verið að fást við og velta því fyrir sér með hvaða hætti er hægt að veita bændum á þessu svæði mesta aðstoð.

Fulltrúar frá Bjargráðasjóði verða í upplýsingamiðstöðinni að Heimalandi undir Eyjafjöllum í dag kl. 12.00 til 14.00 og munu veita íbúum upplýsingar og ráðgjöf.

Hreinsunarstarf á þeim bæjum þar sem öskufall varð mest er í fullum gangi. Vagn Kristjánsson lögreglumaður hefur yfirumsjón með hreinsunarstarfinu. Hann segir að því er fram kemur á mbl.is aðkomuna á bæjunum ekki jafnsvarta og áður enda hafi slökkviliðsmenn vatnshreinsað húsin. Þá hafi sveitarfélagið beitt vinnuvélum við að skafa heimreiðar og bæjarhlöð.

Sjálfboðaliðar hafa undanfarna daga aðstoðað bændur undir Eyjafjöllum við hreinsunarstarf eftir öskufallið frá gosinu í Eyjafjallajökli. Hátt í eitt hundrað manns eru að störfum á bæjum undir Eyjafjöllum og er skipulaginu er stýrt frá félagsheimilinu Heimalandi. Að sögn Jóhönnu Róbertsdóttur, svæðisfulltrúa Rauða krossins á Suðurlandi og Suðurnesjum, eru sjálfboðaliðarnir frá 4×4, Rauða krossinum og úr hópi sem var settur saman á Fésbókinni auk liðsmanna úr björgunarsveitunum og frá Brunavörnum Árnessýslu. Fólkið vinnur að hreinsun á bæjum, skolun á veggjum og þökum auk hreinsunar á hlöðum krigum bæina. Einnig fái bændur aðstoð frá fólkinu við ýmislegt sem þeir óski eftir að fá aðstoð við.

Jarðvísindastofnun Háskólans hefur birt kort af þykktardreifingu öskufalls undir Eyjafjöllum. Þykkast er öskulagið í byggð norðan Seljavelli og liggur þykktarás öskufallsins um austanvert Lambafell, nánast í hásuður frá gígnum í toppi Eyjafjallajökuls.

Fulltrúar Bændasamtakanna, þau Erna Bjarnadóttir sviðsstjóri félagssviðs og Elías Blöndal Guðjónsson lögfræðingur, verða til viðtals í fjöldahjálparmiðstöðinni Heimalandi undir Eyjafjöllum í dag milli kl. 12:00 og 14:00.

Sjávarútvegs- og landbúnaðarráðherra hefur í samráði við stjórn Bjargráðsjóðs ákveðið að heimila að hafist verði handa við hreinsun túna á bænum Önundarhorni undir Eyjafjöllum. Í tilkynningu frá landbúnaðarráðuneytinu kemur fram að Önundarhorn hafi farið einstaklega illa undan flóðinu í Svaðbælisá, eftir að gosið hófst í Eyjafjallajökli. Verulegur hluti túnanna er þakin jökulleir og öðrum framburði. Mjög mikilvægt er að hefjast handa sem allra fyrst vegna vorkomunnar og eru bændurnir Pála Kristin Buch og Sigurður Þór Þórhallsson tilbúin að takast á við það með tilstyrk Bjargráðasjóðs.

Í nótt var fremur rólegt yfir gosstöðinni í Eyjafjallajökli. Upp úr miðnætti dökknaði gosmökkurinn talsvert samkvæmt upplýsingum lögreglu og vindátt breyttist þegar leið á nóttina til suðausturs. Aska fellur nú í norðvestur frá eldstöðinni í átt að Fljótshlíð. Rétt er að taka fram að öskufall er nú ekkert í líkingu við það sem var í fyrstu.
Veðurstofan spáir suðaustlægri átt í dag og vaxandi vindi smám saman. Gert er ráð fyrir öskumistri til norðvesturs frá eldstöðinni. Með öskumistri er átt við truflun í skyggni vegna ösku, samkvæmt upplýsingum Veðurstofunnar.

Sigurður Þórhallsson, bóndi á Önundarhorni undir Eyjafjöllum, segist í viðtali við RÚV standa frammi fyrir því að öll hans ræktun, 100 hektarar, séu hulin aur og ösku. Hann segir jafnframt að yfirlýsingar bænda um að bregða búi dragi mátt úr öðrum og efast um að Bjargráðasjóður dekki allan kostnað sem eldgosið hefur skapað bændum. Hann telur að kostnaðurinn geti sýnt sig þegar líður á, hvað varðar tækjabúnað og vélakost.
Sigurður segist nú vinna að því að gera umhverfi sitt vistlegra og að áður en hann taki ákvörðun um það að hætta búskap vilji hann sjá hver þróun öskufallsins verður. „Ef það hættir þá held ég það sé óhætt að skoða það að byrja að hreinsa.“

Á sumardaginn fyrsta verður opið hús í að Reykjum í Ölfusi, en þar er miðstöð garðyrkjunáms á Íslandi. Reykir eru í útjaðri Hveragerðisbæjar; skammt frá sundlauginni. Skólinn er opinn frá kl. 10 til 18. Í aðalbyggingu skólans fer fram Íslandsmeistarakeppni í blómaskreytingum og eru allir velkomnir til að fylgjast með keppendum að störfum. Sumarið er komið í garðskálanum og hægt er að heimsækja hitabeltið í bananahúsinu og pottaplöntusafninu. Verkefni nemenda í skrúðgarðyrkju verða til sýnis í verknámshúsi. Kaffiveitingar og markaðstorg með garðyrkjuafurðir. Kl. 14:00-15:00 verður hátíðardagskrá þar sem afhent verða garðyrkjuverðlaun LbhÍ og Umhverfisverðlaun Hveragerðisbæjar.

Að sögn vettvangsstjórnar á Hvolsvelli hefur nóttin verið mjög róleg. Rétt fyrir kl. 01:00 í nótt varð örlítil aukning á vatnsrennsli í Markarfljóti og barst nokkur krapi með en þegar leið að morgni hafði vatnsmagn ekki aukist frekar í ánni. Frá eldstöðvunum má þó enn finna markvissan takt umbrotanna. Vetur og sumar frusu saman undir Eyjafjöllum og er nú mikill snjór og hálka á veginum austan við Markarfljót. Má í dag búast við öskufalli í grennd við eldstöðina og vestur af henni. Þetta kemur fram í féttatilkynningu frá Almannavörnum.
Í tilefni sumardagsins fyrsta verður í dag opið hús og veisla í Heimalandi frá kl. 11-17.
Verða veitingar í boði SS, Emmess ís og Ölgerðarinnar. Rangárvallasýsludeild Rauða Krossins sér um að halda utan um samkomuna líkt og undanfarna daga í Heimalandi.

Heilsugæslan í Rangárþingi hefur eflt þjónustu sína vegna eldgossins í Eyjafjallajökli. Opnaður hefur verið sérstakur þjónustusími til að sinna líkamlegri og andlegri vanlíðan vegna gossins.

Búnaðarsamband Suðurlands hefur brugðist við eldgosinu í Eyjafjallajökli á margvíslegan hátt. Rauði þráðurinn í viðbrögðunum hefur verið aðstoð, upplýsingamiðlun og ráðgjöf til bænda við þeim aðstæðum sem upp eru komnar. Hér á heimasíðunni hefur verið reynt að miðla upplýsingum um framgang gossins og hvernig bregðast skuli við, einkum og sér í lagi öskufalli.
Búnaðarsambandið hefur tekið þátt í starfshópi sjávarútvegs- og landbúnaðarráðuneytisins vegna eldgossins í Eyjafjallajökli en í honum eiga sæti Sigurgeir Þorgeirsson, ráðuneytisstjóri, sem stýrir hópnum, og fulltrúar frá BSSL, BÍ, MAST og Samtökum sveitarfélaga. Starfshópurinn hefur einkum það hlutverk að samræma aðgerðir sem falla utan almannavarnarkerfisins og lögbundinna hlutverka sveitarfélaga.

Ljóst er að eldgosið í Eyjafjallajökli hefur reynt mjög á þolrif þeirra bænda sem á svæðinu búa. Það er erfitt að horfa upp á slíkar hamfarir að maður tali nú ekki um þá nagandi óvissu sem um framhaldið ríkir. Á slíkum stundum er mikilvægt að fólk finni fyrir og fái stuðning og ekki verður annað séð en að öll þjóðin hafi samúð með bændum á svæðinu og sé öll af vilja gerð til þess að styðja við bakið á þeim. Þá verður að segjast eins og að aðgangsharka fjölmiðla er oft á tíðum full mikil og brýnt að fólk sem orðið hefur fyrir áföllum sem þessum fái frið og andrými til þess að íhuga sína stöðu og meta ástandið.
Áföll á borð við þessi eru ávallt erfið viðfangs og þrátt fyrir stuðning er ljóst að einhverjir bændur munu gera hlé á búskap sínum en nú þegar hefur verið tilkynnt um slíkt á tveimur búum. Þessi bú eru á því svæði sem orðið hefur hvað verst úti af völdum öskufalls.