Landgræðsla ríkisins, með stuðningi Vegagerðarinnar og heimamanna, hefur hafið aðgerðir til að hefta öskufok á Sólheimasandi í Mýrdal. Tilbúinn áburður verður borinn á og grasfræblöndu sáð í sandana meðfram þjóðvegi 1 á Sólheimasandi og er vonast til þess að árangur sjást strax í sumar. Takist aðgerðirnar mun gróðurinn sem upp kemur draga verulega úr öskufoki á sandinum og tryggja öruggari umferð á þjóðveginum.
Tilgangurinn með aðgerðunum er að endurheimta að einhverju leyti lífsgæði íbúa á þessu svæði, auka möguleika til áframhaldandi búsetu og tryggja betur umferðaröryggi um þjóðveg 1 á Sólheimasandi. Verkið verður unnið að stærstum hluta af heimamönnum en starfsmenn Landgræðslunnar hafa umsjón með því.

Sjávarútvegs- og landbúnaðarráðherra lagði fyrir helgina fram frumvarp til laga á Alþingi um breytingar á lögum um framleiðslu, verðlagningu og sölu á búvörum. Frumvarpið felur í sér að tekið verði á þeirri óvissu sem ríkir um innvigtun og sölu á mjólk utan greiðslumarks. Í frumvarpinu er lagt til að afurðastöðvum (mjólkursamlögum) verði gert að greiða fjársekt fyrir að taka við mjólk frá framleiðanda sem ekki hefur greiðslumark og markaðsfæra hana á innanlandsmarkaði. Sama gildir ef rekstraraðili afurðastöðvar markaðsfærir innan lands afurðir úr mjólk sem er umfram greiðslumark framleiðanda án samþykkis framkvæmdanefndar búvörusamninga. Frumvarpið gerir ráð að sektin nemi 110 kr. fyrir hvern lítra mjólkur sem markaðsfærð er innanlands.

Töluverðir vatnavextir hafa verið í Svaðbælisá í morgun og náði Vatn að flæða yfir varnargarða sem reistir voru í nótt til að sporna gegn því það flæddi yfir tún á svæðinu. Litlu mátti muna að það flæddi yfir þjóðveginn en ræsi undir hann höfðu ekki undan.

Ríkisstjórnin lagði fram frumvarp um breytingar á lögum um stjórnarráðið á Alþingi í gærkvöldi. Helstu breytingarnar sem felast í frumvarpinu eru að ráðuneytum verður fækkað úr tólf í níu með með því að sameina dómsmála- og mannréttindaráðuneytið, samgöngu- og sveitarstjórnarráðuneyti í nýtt innanríkisráðuneyti, félags- og tryggingamálaráðuneyti og heilbrigðisráðuneyti í nýtt velferðarráðuneyti og nýtt atvinnuvega- og nýsköpunarráðuneyti verður til með sameiningu sjávarútvegs- og landbúnaðarráðuneytis við iðnaðarráðuneytið. Þá er lagt til að umhverfisráðuneytið taki að hluta yfir stjórnun og stefnumörkun varðandi nýtingu náttúruauðlinda og nafni ráðuneytisins verði í samræmi við það breytt í umhverfis- og auðlindaráðuneyti. Verði frumvarpið samþykkt taka lögin gildi 1. janúar 2011.

Miðað við verðbólguforsendur Seðlabankans munu greiðslur til bænda skerðast um 1.700 milljónir á árunum 2009 og 2010 frá upphaflegum búvörusamningi. Ástæða þessa eru þær breytingar sem gerðar voru á búvörusamningum vorið 2009 eftir að ákveðið var í fjárlögum sama árs að skerða samningsbundnar greiðslur til bænda samkvæmt þágildandi búvörusamningum. Þær forsendur sem samningsaðilar, Bændasamtökin og ríkisvaldið, gáfu sér við samningagerðina voru hins vegar að skerðingin væri um 1000 milljónir á þessu tímabili.

Yfirlitssýning kynbótahrossa á Gaddstaðaflötum verður á morgun, fimmtudaginn 10. júní, og hefst kl. 9.00. Röð hrossa verður eftirfarandi:

Vakin er athygli á því að fyrirhugað er að halda gæðastýringarnámskeið í sauðfjárrækt þann 14, júní n.k. á Stóra-Ármóti en ekki 18. júní eins og misritaðist í síðasta fréttabréfi. Námskeiðið hefst kl. 10.00 og því lýkur kl. 18.00.

Í nótt er spáð allt að 40 mm úrkomu á Eyjafjallajökli. Reiknað er með að mest rigni á tímabilinu milli kl. 5 og 9 í fyrramálið. Við þessar aðstæður er hætta á að öskulög á Eyjafjallajökli geti skriðið fram og niður farvegi áa sem renna suður af fjöllunum.

Yfirlitssýning kynbótahrossa á Gaddstaðaflötum verður á morgun fimmtudaginn 10. júní og hefst kl 9.00. Röðun flokka verður eftirfarandi:

Búið er að efnagreina gróðursýni sem tekin voru þann 1. júní s.l. Niðurstöðurnar sýna að engin ástæða er til að óttast flúoreitrun í búfénaði á beit þar sem öll sýni eru neðan þolmarka sauðfjár, nautgripa og hrossa.
Niðurstöðurnar eru eftirfarandi:

Í gær hóf Landgræðslan sáningu í um 400 hektara lands á Sólheimasandi í því skyni að reyna að hefta öskufjúk. Síðustu daga hefur svifryk víða um land farið langt yfir heilsuverndarmörk. Nánast óbúandi er við öskufokið í byggðinni undir austanverðum Eyjafjöllum, Skógum, Sólheimabæjum, í Fljótshlíð og Merkurbæjum þegar það er hvað verst.
Á næstu dögum mun Landgræðslan sá níu tonnum af fræi og dreifa 60 tonnum af áburði yfir öskulagið á Sólheimasandi.

Ítrekað er að samkvæmt þeim gróðursýnum sem tekin hafa verið virðist ekki vera ástæða til þess að halda búfénaði inni við vegna öskufalls og/eða -fjúks. Síðustu sýni sem tekin voru sýndu litla flúormengun og voru í öllum tilfellum um eða vel undir þolmörkum nautgripa og hrossa en þolmörk sauðfjár eru mun hærri.

Sláttur er hafinn undir Eyjafjöllum. Ásgeir Árnason, bóndi í Stóru-Mörk byrjaði að slá í gær en Stóra-Mörk stendur við norðurmörk Eyjafjalla og er síðasti bærinn sem ekið er fram hjá á leiðinni inn í Þórsmörk. Ekki er vitað hvaða hvaða áhrif askan mun hafa á hey en það verður kannað á næstu dögum. Í því skyni verða tekin sýni á nokkrum bæjum undir Eyjafjöllum og hey flutt á tilraunabúið á Stóra Ármóti þar sem verkun og lystugleiki heysins verður kannaður.

Sláturfélag Suðurlands hækkar verð á nautakjöti til bænda frá og með deginum í dag, þ.e. mánudeginum 7. júní. Einstakir flokkar hækka á bilinu 6,78% til 17,71%, en vegin meðaltalshækkun er 8,40%. Jafnframt hækkar flutningskostnaður um 8% úr 12 kr/kg. í 13 kr/kg. Heimtökugjald er óbreytt.

Frá og með mánudeginum 7. júní n.k. mun verða veruleg hækkun á afurðaverði Sláturhússins á Hellu. Þannig munu allir kjötflokkar, utan kálfakjöts, hækka um 8%. Eftir þessa verðbreytingu greiðir Sláturhúsið á Hellu langhæsta verð til bænda á landinu og greiðir hæsta verðið á landinu í öllum 31 gæðaflokkunum. Samhliða þessari hækkun hefur heimtökukostnaður verið hækkaður um 10 krónur pr. kíló og þá mun flutningskostnaður hækka einnig.

Landssamband kúabænda birti á föstudaginn niðurstöður verðkönnunar sambandsins á rúlluplasti og rúlluneti. Fram kemur í könnuninni að all verulegur munur er á verði til bænda á báðum rekstrarvörum. Þá kemur jafnframt nokkuð á óvart, að mjög margir aðilar flytja þessar rekstrarvörur til landsins. LK kannaði verð á 75 cm rúlluplasti og 123 cm breiðu rúlluneti. Lægst var verðið á plastinu hjá fyrirtækinu Búvís og hæst var verðið hjá fyrirtækinu Vélaval-Varmahlíð og munar þar 18% á hæsta og lægsta verði. Meðalverðið var 6,93 kr/meter plasts og var hæsta verðið 10,1% yfir meðalverðinu.

Á fundi með knöpum 2. júní síðastliðinn í Félagsheimili Sleipnis kom fram að þeir teldu engan grundvöll fyrir því að vera með sýningu fyrr en í endaðan júní, ástandið væri þannig á hrossunum. Einnig óskuðu þeir eftir sýningu í lok júlí. Búnaðarsamband Suðurlands hefur því ákveðið að sýningunni verði frestað til 28. júní og standi út þá viku. Það mun þó verða dæmt 8. og 9. júní í næstu viku til að koma til móts við þá sem þess óskuðu. Yfirlitssýningin verður fimmtudaginn 10. júní.

Komnar eru niðurstöður á efnagreiningum flúors í gróðursýnum sem tekin voru 26. maí s.l. Samkvæmt þeim er ekki ástæða til þess að óttast flúormengun í gróðri eins og staðan er. Þolmörk nautgripa og sauðfjár eru 30-40 mg/kg F þurrefnis og 70-100 mg/kg F þurrefnis hjá sauðfé. Öll sýnin eru vel undir þolmörkum sauðfjár, sýni á Raufarfelli er við þolmörk nautgripa og hrossa og eina sýnið sem er yfir þeim er frá Efstu-Grund. Það var hins vegar mjög lítið sýni og verður að taka niðurstöðum þess með fyrirvara.
Samkvæmt þessu er ekki ástæða til þess að halda búfénaði inni vegna hættu á flúoreitrun.
Niðurstöðurnar eru eftirfarandi:

Íslandsmethafinn í æviafurðum, Hrafnhetta 153 í Hólmum í A-Landeyjum, var felld þann 15. maí s.l. eftir sérlega farsæla og langa ævi. Hrafnhetta var fædd í febrúar 1992, dóttir Haka 88021, og var því orðin 18 vetra.
Hún bar fyrsta kálfi sínum 24. október 1994 og hafði mjólkað í 15,2 ár samtals 111.194 kg mjólkur eða 7.315 kg að meðaltali á ári.

Jón Bjarnason, Sjávarútvegs- og landbúnaðarráðherra, hefur ákveðið að setja á fót vinnuhóp ráðuneytisins, Landssambands kúabænda, Bændasamtaka Íslands og MAST sem mun hafa það hlutverk að móta reglur um mjólkurkvótamarkað. Vinnuhópurinn mun jafnframt skoða hvort unnt verði að flýta gildistöku uppboðsmarkaðarins, en miðað við núverandi reglugerð verður fyrsta uppboð ekki fyrr en 1. desember nk. Þetta var niðurstaða fundar forsvarsmanna LK og ráðherra í gær.