Eftir gosið í Grímsvötnum hafa menn haft áhyggjur af afdrifum korns í ökrum þar sem öskufallið var mest. Þriðjudaginn 31. maí s.l. skoðuðu Jónatan Hermannsson hjá Landbúnaðarháskólanum og Kristján Bj. Jónsson hjá Búnaðarsambandi Suðurlands kornakra í Vestur-Skaftafellssýslu. Farið var í nánast hvern einasta kornakur í sýslunni. Komið var á 17 bæi – einn á Brunasandi, 5 á Síðu, 5 í Landbroti, 5 í Meðallandi og einn í Skaftártungu.
Ástandið reyndist miklum mun betra en menn höfðu óttast. Aska var öll fokin af ökrum því að þar var ekkert við að festast. Akrar voru eðlilega misjafnir en í heildina leit kornið prýðilega út. Sáð hafði verið í akra á bilinu 30. apríl – 18. maí. Sumt kornið var því ekki komið upp þegar öskubylur geisaði og hafði því ekkert af honum að segja. En af korninu sem farið var að spretta hafði öskufok sorfið blöðin svo þau visnuðu. Við það gulnuðu akrar um hríð. Hvergi sást þó að askan hefði skemmt vaxtarsprota og ný blöð koma nú fram á eðlilegan hátt.

Sláturfélag Suðurlands hefur ákveðið að hækka verð á öllum flokkum nautakjöts um allt að 6% á einstaka flokka frá og með 30. maí s.l. Flutningskostnaður og heimtaka er óbreytt.

Hollaröð á fyrri yfirlitssýningu kynbótahrossa á Gaddstaðaflötum er nú komin á vefinn hjá okkur. Yfirlitssýningin hefst kl. 8.00 í fyrramálið, föstudaginn 3. júní, og er áætlað að hún standi til milli kl. 19 og 20 annað kvöld.

Verð á nautakjöti hefur hækkað töluvert á síðustu 12 mánuðum eða um 15-20%. Í dag tekur gildi hækkun á verði til bænda hjá bæði Sláturfélagi Suðurlands (SS) og sláturhúsinu Hellu (SH). SS hækkar allt ungneytakjöt um 3% en SH hækkar ungneyta- og kýrkjöt um 4-6%.
Haft er eftir Baldri H. Benjamínssyni, framkvæmdastjóra LK, í Morgunblaðinu í dag að við framleiðum ekki eins mikið og æskilegt væri og að sláturleyfishafar séu farnir að hringja í bændur og spyrjast fyrir um hvað þeir eigi af gripum. Hann segir þróunina ekki einskorðast við Ísland og að nautakjötsverð erlendis hafi hækkað talsvert mikið. Nefna má að hjá stærsta nautgripasláturhúsi í Danmörku hefur verð hækkað um 12-13% á árinu.

Þjónustumiðstöð almannavarna á Kirkjubæjarklaustri tók til starfa s.l. föstudag. Meginverkefni hennar er að sinna eftirmálum eldgossins í Grímsvötnum sem snúa að íbúum, sveitarfélögum og uppbyggingarstarfi. Þjónustumiðstöðin er staðsett í grunnskólanum á Klaustri og er opin öllum þeim sem þurfa aðstoð eða upplýsingar vegna eldgossins. Þjónustumiðstöðin verður virk eins lengi og þurfa þykir en frá og með mánudeginum 30. maí verður viðvera frá kl.10:00-13:00.
Hægt er að ná sambandi við fulltrúa þjónustumiðstöðvarinnar í síma 847 5715 og með tölvupósti í netfangið adstod.klaustur@gmail.com

Yfirlitssýning kynbótahrossa á Sörlastöðum fer fram dagana 28. og 29. maí, næstkomandi laugardag og sunnudag. Sýning hefst kl. 8.00 á laugardagsmorgun og kl. 9.00 á sunnudag. Hestakostur á sýningunni er firnasterkur svo sem áhugasamir notendur Worldfengs hafa væntanlega þegar áttað sig á. Það er því vert að hvetja hrossaræktaráhugafólk sérstaklega til að líta við á Sörlastöðum um helgina til að sjá fjöldan allan af glæsilegum gripum og afkastahrossum í samanburði.
Skipulagning þessara daga og röð flokka er eftirfarandi:

Sláturhúsið Hellu hefur tilkynnt um 4-6% hækkun á verði ungneyta- og kýrkjöts til bænda sem tekur gildi 30. maí n.k. Flutningskostanður hækkar einnig. Eftir hækkun er verð á t.d. UNI Úrval A 625 kr/kg, UNI A 575 kr/kg, UNI B 545 kr/kg og UNI M+ 535 kr/kg.

Á íbúafundi sem haldinn var á Kirkjubæjarklaustri í gærkvöldi vegna ástandsins sem gosaskan úr Grímsvötnum hefur valdið, kom fram að þeir sem væru brunabótatryggðir fengju tjón sitt bætt. Neyðarstigi hefur verið aflétt og nú er einungis svonefnt hættustig í gildi. Í dag ætla svo Almannavarnir að opna þjónustumiðstöð í grunnskólanum en þangað á til dæmis að beina óskum um þrif og annað. Víðtækt hreinsunarstarf heldur áfram í dag.

Sláturfélag Suðurlands hefur tilkynnt um verðhækkun til bænda á öllum flokkum ungneyta frá og með mánudeginum 30. maí n.k. Hækkunin er u.þ.b. 3%. Eftir hækkun er verð á t.d. UNI Úrval A 618 kr/kg, UNI A 568 kr/kg, UNI B 537 kr/kg og UNI M+ 527 kr/kg.

Hollaröð kynbótasýningar á Gaddstaðaflötum við Hellu er komin á vefinn hjá okkur. Dómsstörf hefjast mánudaginn 30. maí kl. 8.00 og standa síðan linnulítið yfir fram til 10. júní. Alls eru skráð 571 hross til dóms á sýningunni.

Íbúafundur verður haldinn í félagsheimilinu á Kirkubæjarklaustri fimmtudaginn 26. maí 2011 kl.20:30. Farið verður yfir þróun eldgossins í Grímsvötnum, afleiðingar þess og stöðuna í dag.

Stöku gufubólstrar rísa nú upp frá gígnum í Grímsvötnum líkt og gerði í allan gærdag og er gosið í lágmarki. Almannavarnir vara þó við því að sprengihætta sé ekki liðin hjá og mjög varasamt sé að nálgast eldstöðina. Á Kirkjubæjarklaustri og í nærsveitum er gott veður, hægviðri og væta.
Nú er unnið að hreinsun á öskufallssvæðum og verður settur meiri kraftur í það starf í dag og á morgun þegar meiri mannskapur og öflugri tæki koma á vettvang.

Yfirlitssýning kynbótahrossa á Sörlastöðum fer fram dagana 28. og 29. maí, næstkomandi laugardag og sunnudag. Sýning hefst kl. 8.00 á laugardagsmorgun og kl. 9.00 á sunnudag. Hestakostur á sýningunni er firnasterkur svo sem áhugasamir notendur Worldfengs hafa væntanlega þegar áttað sig á. Það er því vert að hvetja hrossaræktaráhugafólk sérstaklega til að líta við á Sörlastöðum um helgina til að sjá fjöldan allan af glæsilegum gripum og afkastahrossum í samanburði.
Skipulagning þessara daga og röð flokka er eftirfarandi:

Nú þegar rofað hefur til á áhrifasvæði eldgossins austur í Skaftárhreppi hafa menn getað hugað betur að búpeningi sínum. Að sögn Gunnars Þorkelssonar, héraðsdýralæknis á Kirkjubæjarklaustri, er ástandið á búpeningi með ágætum. Það var helst sauðfé sem varð fyrir barðinu á gosösku en nautgripir sluppu betur. Alls drápust níu kindur, sjö hröktust ofan í skurði (þar af tvö lömb) en ekki er ljóst hvernig tvær drápust.
„Ástandið á búfénaði er gott að öðru leyti en því að það er mjög slæmt í augum. Það er brýnt að reyna að hjálpa fénu með því að skola augun strax og ná sandinum og öskunni úr augunum,“ segir Gunnar að því er fram kemur fréttavef RÚV.

Jarðvísindastofnun Háskólans hefur efnagreint tvö öskusýni úr Grímsvatnagosinu. Hið fyrra var tekið á Kirkjubæjarklaustri í upphafi öskufalls, rétt eftir miðnætti 22. maí, eða kl 0:58. Seinna sýnið tekið á Hörgslandi á Síðu að morgni 22. maí, kl. 8.45.
Útskolun vatnsleysanlegra efna af yfirborði öskunnar var gerð til að líkja efir efnasamsetningu regnvatns eftir fyrstu snertingu við öskuna. Skoltilraunin var gerð á 2 g af ösku í 10 ml af vatni. Innihald öskunnar af vatnsleysanlegum flúor á yfirborði er samkvæmt þessum mælingum 4,90 mg/l og 4,95 mg/l.

Fimmtudaginn 26. maí næstkomandi mun heilbrigðisfulltrúi vera í fjöldahjálparstöðinni á Kirkjubæjarklaustri og meta neysluvatn. Hægt er að koma með neysluvatn til rannsóknar í félagsheimilið á morgun og fyrripart fimmtudags.
Mælt verður fyrir leiðni og sýrustigi í vatninu og út frá þeim mælingum metið hvort gera þurfi frekari aðkallandi mælingar.Íbúar Skaftárhrepps, sem ekki eru á samveitu Kirkjubæjarklausturs, eru sérstaklega hvattir til að notfæra sér þetta.

Eldgosið í Grímsvötnum virðist vera að fjara út. Aðeins gufustrókar koma úr gígnum á u.þ.b. mínútufresti að sögn Ásbergs Jónssonar sem staddur er við elsdstöðina ásamt 20 manna hópi frá ferðaskrifstofunni Nordic Visitor. Þetta kom fram í morgunútvarpi Rásar 2.

Eins og landsmönnum er kunnugt, hefur gosið í Grímsvötnum, sem hófst þ. 21. maí s.l. þegar valdið bændum og búaliði á því svæði, sem harðast hefur orðið úti af þess völdum, miklu tjóni og enn er ekki ljóst hversu víðtækt það er. Sem betur fer eru stofnanir og sjóðir í landinu sem bæta hluta þess skaða, sem gosið veldur, en lærdómur okkar af síðustu sambærilegum atburðum er sá, að margt er það sem út af stendur og verður ekki bætt með þeim hætti. Verða bændur því að óbreyttu að bera verulegan hluta af tjóninu sjálfir og er þar um svo stórar fjárhæðir að ræða fyrir einstaklingana, að slíkt myndi gera þeim ókleyft að halda áfram rekstri með sama sniði.

Dregið hefur úr gosinu og nær gosmökkurinn nú í 3-6 km hæð. Gjóskuframleiðsla hefur að sama skapi minnkað mikið en hins vegar hefur gríðarlegt magn af ösku fallið á landið og er ennþá í háloftunum. Gosið í Grímsvötnum er samkvæmt mati vísindamanna af sömu stærðargráðu og dæmigert Kötlugos. Strax fyrsta sólarhringinn í þessu gosi var öskufallið orðið jafnmikið og í öllu eldgosinu í Eyjafjallajökli. Öskufall er nú minna á Kirkjubæjaklaustri og nærsveitum en aftur móti töluvert þar fyrir austan, í Fljótshverfi og Öræfum. Ólíklegt er talið að gosið breyttist í hraungos þar sem stöðug vatnsáveita er inn í gíginn nema því aðeins að það dragist á langinn. Til þess að minnka öskufall og hefta öskufok þyrfti almennilegt slagveður. Útlit er fyrir rigningu suðaustanlands á föstudag.

Jón Bjarnason, landbúnaðar- og sjávarútvegsráðherra og Sigurgeir Þorgeirsson, ráðuneytisstjóri voru hér á Selfossi í morgun þar sem þeir funduðu með forsvarsmönnum Búnaðarsambands Suðurlands og Matvælastofnunar auk fulltrúa frá almannavarnardeild Ríkislögreglustjóra vegna ástandsins, sem hefur skapast í kjölfar eldgossins í Grímsvötnum. Um 20 þúsund fjár eru á svæðinu og mjólkurframleiðsla er á 25 bæjum. Um 1.800 nautgripir eru á svæðinu frá Álftveri austur að Skeiðarársandi.