Leitarvefurinn http://leitir.is var opnaður fyrir um mánuði síðan eða þann 11. nóvember s.l. Vefurinn leitar samtímis í Gegni sem er samskrá velflestra bókasafna í landinu, tengdu stafrænu íslensku efni ásamt erlendum áskriftum að stafrænu vísindaefni í Landsaðgangi. Nafn vefgáttarinnar er sótt til þess viðburðar sem á sér stað á haustin í sveitum landsins er bændur halda til fjalla og smala saman búpeningi sínum. Þeir fara í leitir. Á vefnum leitir.is fara menn einnig í leitir og smala saman upplýsingum. Það er margt sem þar kemur í leitirnar.

Landssamtök sauðfjárbænda hafa birt vegið meðalverð til bænda að fengnum niðurstöðum úr kjötmati haustsins. Lokaverðið reyndist lægra en áætlað hafði verið og skýrist það af því að flokkun var aðeins lakari í ár en í fyrra. Vegið meðalverð á lambakjöti reyndist vera rúmar 492 krónur pr kg. Hækkun frá raunverði 2010 var rúm 71 kr/kg. Verð á öðru kindakjöti varð tæpar 245 kr/kg. Það ríflega tvöfaldaðist í verði frá 2010 og nam hækkunin um 128 kr/kg. Viðmiðunarverð LS fyrir lambakjöt var 581 kr fyrir lambakjöt og 301 kr fyrir annað kindakjöt svo talsvert vantaði upp á að það næðist.

Eyþór Einarsson heldur opinn fyrirlestur um meistaraverkefni sitt við Auðlindadeild Lbhí, miðvikudaginn 14. desember kl. 15 í Ásgarði á Hvanneyri en það fjallar um rafrænt mat á lambakjöti, sem byggt er á stafrænum myndum af kjötskrokkum (video image analysis; VIAscan®) og viðfangsefnið er að meta notagildi þessarar tækni í sláturhúsum hér á landi. Prófanir á tækninni fóru fram á sláturhúsi kjötafurðarstöðvar KS á Sauðárkróki. Markmið rannsóknarinnar var annars vegar að meta hæfni tækninnar til að spá fyrir um vöðvahlutfall skrokka og að flokka samkvæmt EUROP kerfinu (5 vöðvaflokkar og 6 fituflokkar) sem er núgildandi matskerfi. Hins vegar að meta erfðastuðla bæði fyrir kjötmatsþætti og stigun líflamba með áherslu á að kanna hversu vel líflambamatið tengist rafræna matinu og hvort rafrænt EUROP mat (viaEUROP) og núgildandi EUROP mat (pEUROP) mældi sömu eiginleika.

Landbúnaðarháskólinn hefur gefið út skýrslu um reynslu af nýlegum legubásafjósum á Íslandi í samantekt Snorra Sigurðssonar. Í kynningu segir að þróun í fjósbyggingum hafi verið hröð hérlendis á undanförnum árum með auknum fjölda lausagöngufjósa sem ýmist eru nýbyggingar eða breyttar eldri byggingar. Ljóst er að enn er þó mikil þörf fyrir áframhaldandi þróun á aðbúnaði mjólkurkúa og einnig er þekkt að á liðnum árum hafa litið dagsins ljós fjölbreyttar og oft ólíkar lausnir við hönnun og frágang fjósa landsins. Brýnt var talið að safna saman reynslu bændanna úr þessum ólíku fjósum og miðla áfram til bænda sem huga á framkvæmdir og setti Landbúnaðarháskóli Íslands því í gang verkefnið Betri fjós, en verkefnið var styrkt af Þróunarsjóði nautgriparæktarinnar.

Ríkisendurskoðun telur ekki ástæðu til að ætla að sauðfjárbændur fái hærri beingreiðslur en þeir eiga rétt á samkvæmt lögum og reglum en fyrr á þessu ári fékk Ríkisendurskoðun ábendingu um að dæmi væru um að sauðfjárbændur fengju hærri beingreiðslur en þeir ættu rétt á. Athugun Ríkisendurskoðunar, sem fjallað er um í nýrri skýrslu, bendir ekki til þess að ábendingin eigi við rök að styðjast.

Fagráð í nautgriparækt stóð fyrir ráðstefnu 30. nóvember 2011 þar sem tekin voru fyrir málefni er tengdust kynbótastarfi í nautgriparækt. Á ráðstefnunni sem haldin var í Bændahöllinni var m.a. rætt um árangur kynbótastarfsins, breytingar á áherslum í ræktunarstarfinu á undanförnum árum, nýjungar í kynbótum og nýjar leiðir, kynbætur á grundvelli upplýsinga um erfðamengi, árangur skipulagðrar blendingsræktar, ræktunarstarf í nálægum löndum o.fl. Glærur frá ráðstefnunni eru nú aðgengilegar á heimasíðu Bændasamtakanna.

Í dag verður fyrsti bændafundur BÍ hér á Suðurlandi á Icelandair hótel Flúðum og hefst hann kl. 13.00. Við hvetjum bændur til þess að fjölmenna á fundinn sem og aðra bændafundi BÍ sem verða næstu daga.
Á morgun verður fundunum framhaldið hér sunnanlands og er fundaplanið eftirfarandi:

Fóðurblandan hefur sett á markað geldstöðustamp og kurl, LIFELINE – Líflínu, sem er í 22,5 kg fötum eða 20 kg pokum. Að sögn Fóðurblöndunnar er um að ræða góða og hagkvæma lausn við bætiefnagjöf geldstöðunnar. Í tilkynningu frá Fóðurblöndunni segir meðal annars um Lifeline:

Nú er unnið að útgáfu markaskráa um land allt en þær munu koma út á næsta ári. Eigendum eyrnamarka búfjár og frostmerkja hrossa er bent á að hafa samband við markaverði til þess að skrá mörk sín í markaskrá. Gildir þetta bæði um þá sem eiga skráð mörk og þá sem hyggjast fá mark eða taka upp nýtt. Brýnt er einnig að tilkynna markavörðum um eigendaskipti að mörkum. BSSL er ekki kunnugt um skráningargjöld fyrir mörk í markaskrá nema í Árnessýslu austan vatna, þ.e. austan Ölfusár og Hvítár, þar sem gjaldið hefur verið ákveðið 2.500 kr.
Markaverðir á starfssvæði Búnaðarsambands Suðurlands eru:

Nú stendur yfir ráðstefna um nautgriparækt á Hótel Sögu í Reykjavík. Á ráðstefnunni hefur margt fróðlegt komið fram en hún hófst á erindi um ræktunarárangur síðustu 30 ára sem Ágúst Sigurðsson flutti. Erindið var unnið upp úr rannsókn sem Ágúst og Jón Viðar Jónmundsson gerðu og voru niðurstöður hennar birtar í Icelandic Agricultural Sciences (www.ias.is) fyrir skömmu. Í erindinu kom fram að erfðaframfarir hafa skilað okkur síðasta áratuginn aukningu í nyt sem nemur 33 kg af mjólk á grip á ári eða 1,2 kg próteins. Ef við reiknum þessa afurðaaukningu til verðs þá nemur aukningin rúmlega 2.500 kr/grip á ári og er þá eingöngu verið að tala um framfarir í mjólkurmagni.

Við minnum á að umsóknarfrestur um styrki frá Framleiðnisjóði landbúnaðarins til nýsköpunar atvinnu á bújörðum, samstarfsverkefni bænda og annarar eflingu atvinnu til sveita rennur út þann 5. desember n.k. (póststimpill gildir). Allar nánari upplýsingar eru veittar á skrifstofu Framleiðnisjóðs landbúnaðarins, Hvanneyri í síma 430-4300 eða í gegnum netfangið fl@fl.is.

Allir félagsmenn í Félagi hrossabænda fá eintak af bókinni Hrossaræktin 2011 sér að kostnaðarlausu. Aðildarfélög FH hafa fengið bókina afhenta og munu sjá um dreifingu. Félagar í Hrossaræktarsamtökum Suðurlands geta fengið bókina afhenta hjá Höllu Eygló Sveinsdóttur á skrifstofu Búnaðarsambands Suðurlands, Austurvegi 1 á Selfossi.

Össur Skarphéðinsson utanríkisráðherra skrifaði í gær undir samkomulag við rússnesk stjórnvöld um gagnkvæma vottun mjólkurframleiðenda sem mun opna fyrir útflutning íslenskra mjólkurafurða, þ.á.m. skyrs, mjólkurdufts og smjörs, inn á Rússlandsmarkað. Samkvæmt samkomulaginu ábyrgist Matvælastofnun að íslenskir framleiðendur mjólkurafurða uppfylli þær gæðakröfur sem rússnesk yfirvöld gera til innflytjenda. Það greiðir leið íslenskra mjólkurafurða inn á Rússamarkað, og reyndar einnig til Hvíta-Rússlands og Kasakstan, en ríkin þrjú gengu nýverið í tollabandalag.

Hefðbundinni sláturtíð er lokið hjá Sláturfélagi Suðurlands er lokið. Samtals var slátrað 92.184 dilkum hjá félaginu frá viku 34 til og með viku 45. Meðalfallþungi reyndist vera 15,72 kg samanborið við 15,77 kg í fyrra.
Meðaleinkunn fyrir gerð lækkaði úr 8,68 en fitueinkunn var nánast óbreytt milli ára, 6,61 í ár en var 6,60 árið 2010.

Hinir árlegu haustfundir sauðfjárræktarinnar hefjast í dag en fyrsti fundurinn hefst kl. 14.30 í Þingborg. Alls verða haldnir fjórir fundir í dag og á morgun. Til umfjöllunar á fundunum verða hauststörfin, hrútakostur Sauðfjársæðingastöðvar Suðurlands kynntur og farið yfir starfsemi stöðvarinnar. Nýtt kynningarmyndband um Sauðfjársæðingastöðina verður sýnt auk þess sem nýútkominni hrútaskrá sauðfjársæðingastöðvanna verður dreift. Þá verða hæst dæmdu hrútar haustsins verðlaunaðir. Fundað verður á eftirtöldum stöðum:

Fóðurblandan verður með opið hús í verslunum sínum á Suðurlandi miðvikudaginn 23. nóvember á Selfossi og fimmtudaginn 24. nóvember á Hvolsvelli. Báða dagana verður opið til kl 21:00 – kynning byrjar kl. 15:00
Boðið verður upp á léttar veitingar auk þess sem frábær tilboð verða báða dagana og nýjar vörur kynntar.

Landsfundi Sjálfstæðisflokksins lauk helgina. Að venju voru samþykktar fjölmargar ályktanir en það er einkum þrennt sem snertir landbúnað sérstaklega. Í fyrsta lagi er það úr ályktun um atvinnumál þar sem segir að mikilvægt sé að tollar verði afnumdir, vörugjöld og aðflutningsgjöld endurskoðuð, þar með talið af landbúnaðarvörum, með það að markmiði að lækka vöruverð og örva verslun í landinu. Í öðru lagi má nefna kafla um landbúnaðarmál í ályktun um atvinnumál en þar vekur sérstaka athygli að Sjálfstæðisflokkurinn vill afnema kvótakerfi í mjólkurframleiðslu. Kaflinn um landbúnaðarmál í atvinnumálaályktuninni fylgir hér með í heild sinni. Það þriðja sem sérstaka eftirtekt vekur úr ályktunum fundarins er svo úr ályktun um fjármál heimilanna þar sem fjallað er um mat á bújörðum: „Sjálfstæðisflokkurinn leggur til að mat á virði bújarða í tengslum við skuldaaðlögun bænda verði framkvæmt af úrskurðarnefnd sem fjármálastofnanir og bændasamtök koma sér saman um til þess að tryggja að jafnræðis sé gætt.“

Við viljum vekja athygli kúabænda á því að þann 1. nóvember s.l. voru gerðar breytingar á einstaklingsmerkingum nautgripa með gildistöku reglugerðar nr. 968/2011 um gildistöku reglugerðar Evrópuþingsins og ráðsins nr. 1760/2000 um að koma á kerfi fyrir auðkenningu og skráningu nautgripa og um merkingar nautakjöts og nautakjötsafurða. Þar segir að: „Til að gera kleift að rekja flutninga á nautgripum skulu dýrin vera auðkennd með eyrnamerki í báðum eyrum…“. Jafnfram segir í bráðabirgðaákvæði með reglugerðinni að ekki sé krafist endurmerkingar á nautgripum sem eru fæddir fyrir gildistöku reglugerðar þessarar sem skráðir eru í kynbótaskýrsluhaldskerfi Bændasamtaka Íslands og eru einstaklingsmerktir á fullnægjandi hátt. Ef slíkt merki týnist úr grip skal hann þó merktur skv. ákvæðum reglugerðarinnar.

Sláturfélag Suðurlands hefur sent frá sér tilkynningu þar sem minnt er á að vetrarslátrun sauðfjár verður miðvikudaginn 30. nóvember n.k. og innlegg staðgreitt skv. verðskrá nóvember.

Hagstofa Íslands er að gera sérstakt átak í því að efla hagtölugerð í landbúnaði, en fram að þessu hafa Bændasamtök Íslands séð að mestu um að safna saman tölum um landbúnaðinn. Nokkuð hefur verið fjallað um þessi mál á síðustu misserum, m.a. í tengslum við umsókn Íslands um aðild að Evrópusambandinu. Í skýrslu sem framkvæmdastjórn ESB sendi frá sér í haust sagði að sambandið teldi að Ísland væri ekki tilbúið til viðræðna um landbúnaðarmál, m.a. vegna þess að hagtölur um landbúnaðarmál á Íslandi væru ófullkomnar. ESB gagnrýnir m.a. að hagsmunasamtök sæu um að safna tölum um landbúnaðarmál.