Stefnt er að því að stofna hlutafélag um innflutning á nýjum kúastofni í næsta mánuði. Jón Gíslason, formaður Nautgriparæktarfélags Íslands (NRFÍ), sem barist hefur fyrir innflutningi á norskum kúastofni til Íslands, segir að hið nýja hlutafélag muni sækja um innflutningsleyfi til landbúnaðarráðuneytisins á næstu mánuðum. „Við stefnum að því að sækja um innflutningsleyfi á fósturvísum og sæði úr norska kúastofninum. Ráðuneytið mun þá leita álits hjá umsagnaraðilum eins og yfirdýralækni og fleiri aðilum.“

Auglýst hefur verið eftir umsóknum um styrki til Landbótasjóðs. Sjóðurinn er á vegum Landgræðslunnar og veitir styrki til margháttaðra landgræðslu- og landbótaverkefna. Styrkveitingar sjóðsins hafa um árbil verið með hefðbundnum hætti, en í ár verður sú breyting á að nú er hægt að sækja um styrki til endurheimtar votlendis. Umsóknarfrestur er til 15. mars n.k.

Mjólka hefur fest kaup á matvælafyrirtækinu Vogabæ og hefur mjólkurstöð Mjólku verið flutt í verksmiðjuhúsnæði Vogabæjar við Eyrartröð 2a í Hafnarfirði. Vogabær og Mjólka munu halda áfram að framleiða undir eigin merkjum. „Auk þeirra augljósu samlegðaráhrifa sem felast í að sameina dreifingu, skrifstofuhald og stjórnun þessara tveggja fyrirtækja þá leysum við um leið mjög brýnan húsnæðisvanda sem hefur verið að há eðlilegum vexti Mjólku undanfarna mánuði,“ segir Ólafur M. Magnússon, framkvæmdastjóri Mjólku.

Þórey Bjarnadóttir, bóndi á Kálfafeli í Suðursveit og sauðfjárrækatarráðunautur hjá Búnaðarsambandi Suðurlands, var nýlega kjörin formaður Búnaðarsambands Austur-Skaftfellinga. Hún er fyrsta konan til að gegna þessu embætti hjá búnaðarsambandinu.

„Ljóst þykir að grípa verður til aðgerða til að mæta þeim miklu hækkunum á aðföngum, s.s. á áburði og fóðri, sem bændur hafa mætt,“ segir á vefsíðu Bændasamtakanna í tilefni af fundi í verðlagsnefnd búvara í gærmorgun.
Á fundinum voru engar verðbreytingar ákveðnar en að sögn Ólafs Friðrikssonar formanns mun nefndin hittast aftur innan skamms. „Við fórum yfir miklar áburðarverðshækkanir, sem eru upp á 70-80% frá því í fyrra. Á fundinum kom fram það hald manna að áburður mundi hækka jafnvel enn meira á heimsmarkaði, þó að þær hækkanir skili sér ekki hingað á þessu vori.“ Hann segir helstu áburðarsala veita bændum gjaldfrest fram í maí gangi þeir frá kaupum í ársbyrjun. „Engu að síður vill nefndin fylgjast grannt með þannig að grípa megi inn í ef ástæða þykir til,“ segir Ólafur.

Landbúnaðarráðherra segir óhjákvæmilegt að styrkja íslenskan landbúnað og staðið verði við þá samninga sem gerðir hafa verið við bændur til 2012 og 2013. Hins vegar sé nauðsynlegt að skoða þróunina erlendis á næstu árum, sérstaklega innan ESB. Það sé athyglisvert að evrópski landbúnaðarráðherrann hafi nú þegar tilkynnt að styrkjum til landbúnaðar verði breytt. Þetta kom fram í utandagskrárumræðu um stuðning stjórnvalda við íslenskan landbúnað á Alþingi í gær.

Mjólkurframleiðsla er nú hafin á ný í Stærra-Árskógi á Árskógsströnd í Eyjafirði, en eins og menn muna brann fjósið á bænum ásamt bróðurparti bústofnsins um miðjan nóvember sl. Þá þegar var ákveðið að hefja uppbyggingarstarf og var nýtt fjós risið á grunni þess gamla þann 17. janúar sl., réttum tveimur mánuðum eftir brunann.  

Frá 1982 hefur sauðfé fækkað um nærri 32 milljónir á Nýja-Sjálandi en á árinu 2007 voru 38,6 millj. fjár í landinu. Það er 4% færra en árið áður og þar með hefur fjöldi sauðfjár þar ekki verið minni síðan 1955.

Danskir sérfræðingar telja að miklar verðhækkanir á matvælaverði séu yfirstaðnar og á komandi árum muni matvælaverð haldast stöðugt eða jafnvel lækka. Framleiðslan muni aukast gríðarlega og það valdi auknu framboði og lækkandi verði. Leif Nielsen, aðalhagfræðingur hjá Landbúnaðarráðinu í Danmörku, segist vera sammála þessu mati í aðalatriðum og kornverð hafi nú þegar náð hæstu verðum. Hann segir að kornverð muni lækka á komandi mánuðum og árum þó að það verði kannski ekki eins lágt og það var fyrir hækkanir.

Kúabúið að Lyngbrekku í Dalasýslu er samkvæmt nýútkomnum skýrslum afurðahæsta bú landsins á síðastliðnu ári. Samkvæmt skýrsluhaldi eru árskýr á Lyngbrekku 58,6 og meðal nyt kúnna 7.881 lítri og próteininnihald mjólkurinnar 3,36%. Bændur þar eru Bára Sigurðardóttir og Sigurður B. Hansson.

Stærsta kúamykjuorkuver í heimi var tekið í notkun í Innri-Mongólíu í Kína 21. janúar sl. Í orkuverinu er unnið úr mykju og fráveituvatni frá 10.000 kúm. Úr þessu hráefni fást 12.000 rúmmetrar af metangasi, sem duga til að framleiða 10 milljón KWst eða 10 GWst af raforku á ári. Þetta samsvarar uppsettu afli upp á u.þ.b. 1,5 MW.

Nú er það ljóst að Betra land mun því miður ekki geta lagt fram vöru- og verðskrá fyrir áburð að þessu sinni. Ástæðuna má helst rekja til vanefnda birgja Betra lands í gæðamálum. Auk þess hafa þrengingar á mörkuðum erlendis valdið því að ekki hefur tekist að ná áburði frá öðrum framleiðendum á réttum tíma.
Betra land mun áfram vinna að því að koma á viðskiptasamböndum við áburðarframleiðendur sem framleiða bæði einkorna og fjölkorna áburð. Betra land mun því halda sig til hlés á yfirstandandi sölutímabili.

Komið er á vefinn umsóknareyðublað um bústofnskaupastyrki til frumbýlinga í sauðfjárrækt sem úthlutað verður skv. gildandi sauðfjársamningi, fyrst í apríl næstkomandi. Styrknum verður úthlutað til bústofnskaupa, bæði til frumbýlinga og við ættliðaskipti á bújörðum.

Þann 20. janúar 1908 var haldið bændanámskeið að Þjórsártúni við Þjórsárbrú. Námskeiðið stóð í 10 daga og var vel sótt en þátttakendur voru 50 talsins. Stjórnandi þessa námskeiðs var Sigurður Sigurðarson, ráðunautur frá Langholti.
Haldnir voru umræðufundir um ýmis framfaramál og á einum þeirra kom fyrst fram hugmyndin að stofnun Búnaðarsambands Suðurlands. Samþykkt var strax gerð um nauðsyn á slíku sambandi og framkvæmd málsins síðan falin stjórn Smjörbúasambands Suðurlands en formaður þess var þá Ágúst Helgason í Birtingaholti.

Vegna viðhalds mun heimasíðan liggja niðri frá um það bil kl. 21 til kl. 24 í kvöld. Við biðjumst velvirðingar á þeim óþægindum sem þetta kann að valda.

Á síðasta ári komu 226 bú til uppgjörs í skýrsluhaldi nautgriparæktarinnar hér á Suðurlandi. Þetta er fækkun um 8 bú frá árinu áður. Þetta þýðir 84% þeirra búa sem voru í framleiðslu um áramótin 2006/07 tóku þátt í skýrsluhaldi á árinu 2007.
Meðalafurðir stóðu nánast í stað, enduðu í 5.579 kg/árskú sem er einu kg meira en 2006. Fituinnihald í mjólk hækkaði úr 3,95% í 4,02% og próteininnihaldið hækkaði um 0,01 prósentustig, í 3,41%. Meðalafurðir í kg verðefna (MFP) jukust þannig um 5 kg milli ára, úr 410 kg MFP/árskú í 415 kg MFP/árskú. Ef litið er til heilsárskúa, þ.e. kúa sem eru á skýrslu allt árið, kemur í ljós að meðalafurðir þeirra aukast úr 5.570 kg í 5.681 kg.

Það hefur sjaldan verið jafn brýnt tilefni til að velta fyrir sér innkaupum og notkun á hverju áburðarkorni eins og í ár. Sigurður Þór Guðmundsson jarðræktarráðunautur á Norðurlandi hefur tekið saman yfirlit um þá stöðu sem bændur eru í um þessar mundir vegna hækkandi áburðarverðs. Í meðfylgjandi Excel-skjali má sjá hvaða tegundir eru í boði og reiknuð út mismunandi áburðarþörf miðað við ólíkar forsendur. Í töflu 1 má sjá verð eins og það býðst í febrúar 2008 og jafnframt umreiknað yfir í krónur á kg köfnunarefnis (kr/kg N). Þá er sett upp tafla sem sýnir það magn af fosfór og kalí sem fylgir 120 kg af köfnunarefni.

YARA og Áburðarverksmiðjan hafa nú birt áburðarverðskrár sínar og er hækkun milli ára á bilinu 36-82% hjá báðum fyrirtækjunum, þ.e. ef borin eru saman verð einstakra áburðartegunda nú við sömu mánuði í fyrra. Í raun má þó segja að hækkunin sé öllu meiri því að afsláttarkjör eru breytt frá því sem var 2006-07. Þannig bauð YARA mest 15% afslátt frá sínu lokaverði í júní 2007 ef áburður var pantaður í nóvember 2006. Nú býðst mönnum mest 10% afsláttur frá júníverði 2008 ef pantað er í janúar eða febrúar 2008.

 Á sama hátt bauð Áburðarverksmiðjan í fyrra mest 15% pöntunarafslátt ef pantað var fyrir 15. janúar auk 5% staðgreiðsluafsláttar ef greitt var fyrir sama tíma. Nú eru bestu afsláttarkjör Áburðarverksmiðjunnar hins vegar 10% pöntunarafsláttur ef pantað er fyrir 15. febrúar auk 3% staðgreiðsluafsláttar ef greitt er fyrir þann sama tíma.

Mestur hluti áburðar undanfarin ár hefur verið seldur á mestu afsláttarkjörum hverju sinni.

Á formannafundi Búnaðarsambands Suðurlands sl. föstudag, 18. janúar, lýsti Þorfinnur Þórarinsson því yfir að hann myndi ekki gefa kost á sér til áframhaldandi kjörs á næsta aðalfundi Búnaðarsambands Suðurlands. Þorfinnur hefur setið í stjórn Búnaðarsambands Suðurlands frá árinu 1993, þar af frá árinu 2000 sem formaður stjórnar.

Nautgripum fækkar stöðugt í Danmörku og um áramótin síðustu var tala þeirra komin niður í 1.545.000. Það er fækkun um 34.000 eða 2,2% frá árinu áður. Fjöldi mjólkurkúa dróst saman um 4 þús. og voru þær 551 þús. um áramótin. Ekki er útlit fyrir að úr fækkun kúnna dragi því að kvígum hefur fækkað um 16 þús. milli ára eða 2,5%. Heildarfjöldi kvígna í Danmörku var 618 þús. um áramótin.