Oft á tíðum er nauðsynlegt að kalka íslenska gróðurmold svo að sáðgresinu líði þar sem best og endist sem lengst. Jarðvegur þar sem rækta á gras gerir kröfu um sýrustig að lágmarki í kringum pH 5,3 á meðan korn og belgjurtir gera kröfu um að jarðvegurinn sé með pH 6,0 ef vel á að vera. Margar grænfóðurtegundir gera kröfu um sýrustig þarna mitt á milli, repja t.d. þrífst best þegar sýrustig er uppundir pH 6,0. Á sama hátt getur sýrustig jarðvegsins verið óheppilega hátt en sunnanlands má kalka töluvert mikið áður en við förum að hafa áhyggjur af því í hefðbundinni ræktun.

Samband garðyrkjubænda ákvað á aðalfundi á föstudag að skrifa ekki undir samning við landbúnaðarráðherra um niðurskurð á greiðslum til bænda og jafnframt um framlengingu á búvörusamningum, að því er kemur fram á fréttavefnum Suðurlandinu.is.

Skrifað var undir breytingar á gildandi búvörusamningum um starfskilyrði sauðfjárræktar og starfskilyrði mjólkurframleiðslu í Þjóðmenningarhúsinu í dag. Ekki verða gerðar breytingar á aðlögunarsamningi um starfsskilyrði framleiðenda garðyrkjuafurða eins og stefnt var því ekki náðist samkomulag um þær breytingar í þessari atrennu.
Steingrímur J. Sigfússon sjávarútvegs- og landbúnaðarráðherra undirritaði samningana fyrir hönd ríkisstjórnarinnar og Haraldur Benediktsson formaður Bændasamtaka Íslands, Sigurður Loftsson formaður Landssambands kúabænda og Sigurgeir Sindri Sigurgeirsson formaður Landssamtaka sauðfjárbænda skrifuðu undir samningana fyrir hönd bænda.

Sá óvenjulegi atburður varð í Noregi um helgina, að umferðarlögreglan stöðvaði ungan mann, sem ók dráttarvél á 49 km hraða á vegarkafla í Froland þar sem hámarkshraðinn var 40 kílómetrar á klukkustund.

Aðalfundur Auðhumlu svf. var haldinn á Hótel Selfossi föstudaginn 3. apríl sl. Full mæting fulltrúa var eða alls 81 fulltrúi með atkvæðisrétt. Miklar umræður urðu um reikninga Auðhumlusamstæðunnar og skýrslu stjórnar. Þrátt fyrir þungt rekstrarár og tap á rekstri, fengu stjórn og starfsmenn klapp á bakið fyrir sín störf enda hefur reynt mikið á við þær aðstæður sem fyrirtækjunum Auðhumlu og MS er búin um þessar mundir.

Á aðalfundi Hrossaræktarsamtaka Suðurlands þann 26. mars s.l. fjallaði Sigríður Björnsdóttir, dýralæknir hrossasjúkdóma um smitsjúkdóma og varnir gegn þeim. Erindið var mjög áhugavert og þótti stjórn HS tilvalið að fleiri fengju að fræðast um þessi mál en þeir sem áttu þess kost að mæta á aðalfundinn. Hér birtist því úrdráttur úr erindinu en þeir sem áhuga hafa á að kynna sér málið betur geta kynnt sér það frekar í fundargerð aðalfundar á slóðinni www.bssl.is undir Hrossaræktarsamtök Suðurlands.

Allnokkur áhugi virðist vera á heimavinnslu á mjólkurafurðum um þessar mundir. Af því tilefni hefur Guðbjörg Helga Jóhannesdóttir, atvinnu og nýsköpunarráðgjafi Bændasamtakanna stofnað opinn hóp á samskiptavefnum Facebook fyrir þá sem hafa áhuga á heimavinnslu. Markmiðið er að safna saman á einn stað upplýsingum um efnið, góðum ábendingum og ekki síst skapa lifandi umræður og gagnvirk samskipti. Þarna er hægt að leita ráða ef eitthvað er ekki að ganga upp eða ef þið viljið miðla uppfinningum ykkar og reynslu til annarra.

Á síðustu árum hefur opnast sá lánamöguleiki að sækja lánsfé til Lífeyrissjóðs bænda. Lífeyrissjóðurinn er einn af fáum lánveitendum sem er opinn í augnablikinu. Hámarkslán hjá þeim er 25 milljónir króna, lánstíminn er 5 til 40 ár og lánað er allt að 55% af áætluðu söluverði jarðeignar en 45% af áætluðu söluverði íbúðahúsnæðis. Lánin eru verðtryggð og bundin vísitölu neysluverðs. Vaxtakjör taka breytingum 15. hvers mánaðar og eru 0,7% hærri en meðalávöxtun í síðasta mánuði á nýjasta flokki íbúðabréfa til 30 ára í viðskiptakerfi Kauphallar Íslands. Þó aldrei hærri en hæstu lögleyfðu vextir Seðlabanka Íslands og aldrei lægri en 5%. Vextir eldri lána taka sömu breytingum.

Áhugafólk um smalahunda í Árnessýslu fyrirhugar að stofna sérstka smalahundadeild  og verður stofnfundur félagsins haldinn á Hestakránni Skeiðum, þriðjudagskvöldið 7. apríl nk. kl. 20:30.

Að vonum er allt áhugafólk um smalahunda hvatt til að mæta.

Í lok síðasta árs sló Hrafnhetta 153 frá Hólmum í A-Landeyjum gamalt met Sneglu 231 frá Hjálmholti í æviafurðum sem var 100.736 kg. Hrafnhetta hafði um áramótin síðustu náð því að mjólka 101.118 kg á 14,2 árum eða 7.121 kg að meðaltali á ári. Hrafnhetta sem er fædd í febrúar 1992 er enn í fullu fjöri, bar 4. janúar s.l. og var í 39,9 kg dagsnyt í febrúar s.l.

Sem kunnugt er hefur áburður hækkað mikið á síðustu tveimur árum. Vorið 2008 var ástæðan fyrst og fremst vegna mikilla verðhækkana á áburðarefnum á heimsmarkaði en nú í vor fyrst og fremst vegna veikrar krónu og þ.a.l. mikilla gengishækkana. Töluvert er spurt um hvers virði einstök áburðarefni eru og til að svara því geta bændur haft það sem grófa viðmiðun að köfnunarefni (N) kostar u.þ.b. 195 kr/kg, fosfór (P) kostar u.þ.b. 285 kr/kg og kalí (K) kostar u.þ.b. 130 kr/kg. Sambærilegar tölur fyrir árið 2008 á þáverandi verðlagi voru 145 kr/kg fyrir N, 260 kr/kg fyrir P og 112 kr/kg fyrir K. Hér fyrir neðan eru þessar tölur rökstuddar á eftirfarandi hátt:

Landbúnaðarháskóli Íslands hefur nú tekið í notkun upplýsingaveitu á vefslóðinni www.hesthus.is, en vefsíðan er rekin af átaksverkefninu Hross í hollri vist. Tilgangur þess verkefnis er að fræða hestamenn og hesthúsaeigendur um kosti og galla ólíkra lausna sem viðkoma hesthúsum og nærumhverfi hrossa.
Nú þegar eru komnar upplýsingar á síðuna um nokkrar gerðir af undirburði, m.a. glænýja afurð verkefnissins sem er kögglaður hálmur. Þegar líður á verkefnið munu koma inn á vefinn allar helstu fræðsluupplýsingar um hesthús, innréttingar og almennt um nærumhverfi hrossa.

Þessa dagana eru bændur mikið að spyrja ráðunauta út í kornrækt, tilkostnað við hana og hvort að hún borgi sig yfirleitt. Því er til að svara að það er að sjálfsögðu háð uppskeru á hektara, þ.e. deilistærðinni sem tilkostnaðinum er dreift á. Undanfarin ár hafa ráðunautar BSSL reiknað út að núllpunkturinn við kornræktina er á bilinu 3,3 – 3,5 tonn/hektara sé kornið þurrkað og er þetta vor engin undantekning frá því. Sé kornið votverkað með própíonsýru má gera ráð fyrir að uppskeran megi vera eitthvað lægri.

Peningastefnunefnd Seðlabanka Íslands hefur ákveðið að lækka stýrivexti bankans um eina prósentu í 17%. Hagvísar benda til þess að skilyrði séu til þess að draga úr peningalegu aðhaldi. Verðbólguþrýstingur hefur verið á undanhaldi um leið og eftirspurn hefur dregist saman, atvinna minnkað og gengi krónunnar orðið stöðugra. Sveigjanleiki þjóðarbúskaparins hefur komið fram í hraðri aðlögun innlendrar eftirspurnar, kaupmáttar launa og ytri jafnaðar. Mikill halli á vöru- og þjónustuviðskiptum við útlönd hefur snúist í verulegan afgang.

Vaxandi útflutningur hefur verið á innmat úr sauðfé og stórgripum frá Sláturhúsi KVH ehf. á Hvammstanga til landa í Evrópu, Asíu og til Bandaríkjanna.
„Við fluttum dálítið af innmat úr lömbum til Kína í haust,“ segir Magnús Jónsson framkvæmdastjóri. „Kínverjarnir tóku ákveðinn afskurð, fitu, nýru og svoleiðis. Svo erum við að skoða að flytja þangað vambir og keppi. Það fór smámagn af því í haust og kemur til með að verða meira í næstu sláturtíð.

Á aðalfundi Félags kúabænda á Suðurlandi 26.janúar sl.var tillaga samþykkt um að skipa nefnd sem ætlað var að eiga samstarf við hjálparstofnanir vegna ástandsins í þjóðfélaginu með matvælaaðstoð í huga. Tillagan fékk mjög góðar undirtektir á fundinum. Nefndina skipa stjórnarmenn FKS, formaður Búnaðarsambands Suðurlands og stjórnarformaður Auðhumlu. Nefndin ákvað að söfnunin gengi til Mæðrastyrksnefndar að þessu sinni.
Í góðu samstarfi við þessa aðila var söfnuninni komið á. Fyrir það vill stjórn Félags kúabænda á Suðurlandi þakka sérstaklega. Nýlega var sent bréf til allra mjólkurinnleggjenda á Suðurlandi þar sem þeim var boðið að taka þátt í söfnuninni.

Samkeppniseftirlitið birti 6. mars síðastliðinn úrskurð þar sem kveðið var upp úr með að Bændasamtök Íslands hefðu staðið að ólöglegu verðsamráði og brotið þar með samkeppnislög. Samkvæmt úrskurðinum eru Bændasamtökin samtök fyrirtækja og hafi þau viðhaft samkeppnishamlandi samráð, sem hafi meðal annars birst í ályktunum Búnaðarþings 2008 þar sem ályktað var að hækka þyrfti afurðaverð, en einnig hafi það samráð birst í viðtölum við forsvarsmenn Bændasamtakanna í fjölmiðlum þar sem þeir lýstu sömu skoðunum. Önnur gögn sem Samkeppniseftirlitið byggir úrskurð sinn á sýna jafnframt, að mati eftirlitsins, að starfsmenn Bændasamtakanna hafi unnið að því að þrýsta á um verðhækkanir. Séu það skýr og alvarleg brot á bannákvæðum samkeppnislaga.

Skuldir mjólkurframleiðenda á Íslandi nema rúmlega 30 milljörðum króna og líkur eru leiddar að því að þrjú af hverjum tíu kúabúum eigi undir högg að sækja vegna skuldsetningar. Kúabú hér á landi eru rúmlega 700 talsins. Samtök bænda kalla eftir því að fjármögnun kúabúa verði tryggð til lengri tíma, sérstaklega með það í huga að bú og heimili bænda eru yfirleitt óaðskiljanleg eining.

Frá og með deginum í dag geta viðskiptavinir Íslandsbanka óskað eftir greiðslujöfnun erlendra húsnæðislána. Um er að ræða úrræði sem lækkar greiðslubyrði viðskiptavina bankans sem eru með húsnæðislán í erlendri mynt en í flestum tilvikum lengist lánstíminn á móti. „Í meginatriðum er um að ræða lausn sem gerir fólki kleift að minnka greiðslubyrði sína til skamms tíma af erlendum lánum, auk þess að draga úr áhrifum gengissveiflna á einstaka afborganir. Jafnframt er eytt óvissu um mánaðarlegar afborganir með jafnari upphæð um hver mánaðarmót.

Samkeppniseftirlitið birti í dag úrskurð sinn vegna rannsóknar sem hófst fyrir ári síðan á starfsháttum Bændasamtaka Íslands vegna gruns um brot á samkeppnislögum. Vegna málsins hafa Bændasamtök Íslands sent frá sér yfirlýsingu sem er svohljóðandi:
 
„Bændasamtök Íslands telja sig ekki hafa brotið samkeppnislög en svo telur Samkeppniseftirlitið sem úrskurðað hefur að BÍ skuli greiða 10 milljónir króna í stjórnvaldssekt fyrir það sem kallað er ólöglegt verðsamráð.