Grunur hefur vaknað um inflúensu í svínum á einu svínabúi hérlendis. Sýni sem voru tekin eru nú í rannsókn á Tilraunastöð HÍ að Keldum. Niðurstöðu er í fyrsta lagi að vænta í dag. Svínaflensa smitast ekki með svínakjöti og fólki stafar því engin hætta af neyslu þess. Til að koma í veg fyrir útbreiðslu smits til annarra búa hefur bann verið sett á flutning dýra frá búinu og allar sóttvarnir verið hertar.

Stofnfundur Samtaka ungra bænda var haldinn í Dalabúð í Búðardal 23. október síðastliðinn. Samtökin eru ætluð ungu fólki á aldrinum 18 til 35 ára sem hefur áhuga á landbúnaði og málefnum landsbyggðarinnar. Á fundinum var kosin fimm manna stjórn sem er skipuð þeim Margréti Ósk Ingjaldsdóttur, Þjórsárnesi í Flóa, Oddnýju Steinu Valsdóttir, Butru í Fljótshlíð, Helga Hauki Haukssyni, Straumi í Hróarstungu, Sigurði Þóri Guðmundssyni, Holti í Þistilfirði og Gunnbirni Ketlissyni, Finnastöðum í Eyjafirði. Helgi Haukur, sem kosinn var formaður félagsins, segir að stofnfundurinn hafi í alla staði verið ákaflega vel heppnaður.

Bændasamtök Íslands fóru ekki yfir svör Íslands við spurningum framkvæmdastjórnar Evrópusambandsins. Hið rétta er að samtökin komu að svörum ákveðinna hluta. Formlegt erindi um fulltrúa í samningahópi landbúnaðarhluta viðræðna við ESB hefur enn ekki borist samtökunum þrátt fyrir beiðni Bændasamtakanna um slíkt.
Bændasamtök Íslands hafa sent frá sér yfirlýsingu vegna tilkynningar utanríkisráðuneytisins í gær þar sem kemur fram að samtökin hafi, ásamt öðrum samtökum, farið yfir svör Íslands til Evrópusambandsins vegna aðildarumsóknar Íslands.

Nýir þátttakendur í gæðastýringu í sauðfjárrækt þurfa að sækja um aðild til Matvælastofnunar á þar til gerðum umsóknareyðublöðum sem nálgast má með því að smella hér. Sækja skal um fyrir 20. nóvember ef framleiðandi óskar eftir álagsgreiðslum fyrir næsta ár.

Í Morgunblaðinu í gær birtist eftirfarandi grein eftir Þóri Jónsson, kúabónda á Selalæk í Rangárvallasýslu og formann Félags kúabænda á Suðurlandi.

Kúabændur krefjast þess að óvissu verði eytt
Kvótakerfi í mjólkurframleiðslunni er kerfi sem bæði er framleiðslustýring og grunnur að stuðningi við framleiðslu á mjólk. Framleiðslustýringin felst í því að gefið er út ár hvert greiðslumark, þ.e. sá lítrafjöldi sem bændur fá greitt lögbundið lágmarksverð fyrir frá afurðastöð. Ákvörðun að því greiðslumarki fer eftir sölu á mjólkurafurðum síðastliðið ár og birgðastöðu.

Í gær var síðasti vinnudagur Jóhannesar Hr. Símonarsonar hjá Búnaðarsambandi Suðurlands en hann hefur nú sem kunnugt er tekið við starfi aðstoðarútibússtjóra Kaupþings á Hellu. Verkefni Jóhannesar hjá Búnaðarsambandinu munu flytjast á aðra starfsmenn Búnaðarsambandsins en hann kom einkum að rekstrar- og jarðræktarráðgjöf auk ýmissa annarra verkefna.
Jóhannesi er óskað góðs gengis og velfarnaðar í starfi sínu hjá Kaupþingi um leið og honum er þökkuð mjög vel unnin störf hjá Búnaðarsambandinu.

Þann 23. október næstkomandi er stefnt að því að halda málþing í Dalabúð í Búðardal með yfirskriftinni Ungt fólk og landbúnaður og í framhaldi verður stofnfundur samtaka ungra bænda. Viljum við hvetja sem flesta til að mæta, bændur sem og annað fólk sem hefur áhuga á málefnum landbúnaðar og hinna dreifðu byggða landsins. Enn fremur viljum við vekja athygli á því að allt ungt fólk á aldrinum 18 til 35 ára getur orðið aðilar að samtökunum, ekki er skilyrði að vera starfandi bóndi, einungis að hafa áhuga á málefnum landbúnaðar og landsbyggðarinnar.
Dagskráin á föstudeginum hefst kl. 13:00 og er svo hljóðandi:

Á vef Lanssambands kúabænda kemur fram að íslenskar mjólkurkýr endast stöðugt skemur en áður. Ending er skilgreind sem tíminn frá því kýrin ber 1. kálfi þar til henni er fargað. Eins og sjá má á meðfylgjandi línuriti (smellið á myndina til að stækka), hefur endingartíminn farið úr 1.152 dögum fyrir 10 árum, niður í 979 daga á sl. ári. Endingartíminn hefur verið þó nokkuð stöðugur undanfarin ár.

Út er komið Rit LbhÍ nr. 19. Ritið ber heitið Orsakir kálfadauða hjá fyrsta kálfs kvígum. Skýrsla um rannsóknir 2006-2008. Ritstjóri er Magnús B. Jónsson. “Kálfadauði hefur á undanförnum árum verið stöðugt vaxandi vandamál í íslenskri mjólkurframleiðslu. Má ætla að tjón af völdum hans nemi milljónum króna á ári hverju í afurðatjóni, töpuðum erfðaframförum stofnsins og fleiri þáttum,” segir Magnús B. Jónsson í yfirlitsgrein.

Verð til svínakjötsframleiðenda þarf að hækka um 38,5% til að þeir nái endum saman, að sögn Guðbrands Brynjúlfssonar á Brúarlandi í Borgarfirði. Offramleiðsla hefur gert það að verkum að afurðirnar hafa lækkað mikið í verði á árinu og segir Guðbrandur að verði engin breyting á gefist margir framleiðendur upp innan tveggja til þriggja mánaða.

Framkvæmdum við bústjórahúsið á Stóra-Ármóti er nú lokið en það hefur fengið verulega andlitslyftingu. Húsið sem byggt var árið 1950 þarfnaðist orðið verulegs viðhalds að utan og hafa framkvæmdir staðið yfir frá síðastliðnu hausti. Mest var unnið í framkvæmdinni á liðnum vetri en endanlega var lokið við alla vinnu utanhúss nú í sumar.

Hjalti Gestsson fyrrverandi ráðuanutur og framkvæmdastjóri Búnaðarsambands Suðurlands lést í gær á 94. aldursári. Hjalti var fæddur 10. júní 1916 að Hæli í Gnúpverjahreppi. Hjalti var mikilvirkur brautryðjandi innan íslenskrar búfjárræktar, þ.e. nautgripa- sauðfjár- og hrossaræktar.
Hjalti lauk stúdentsprófi frá Menntaskólanum í Reykjavík árið 1938. Hann varð búfræðikandídat frá Landbúnaðarháskólanum í Kaupmannahöfn 1941 og lauk þaðan framhaldsnámi tveimur árum síðar.

„Það er algjör metuppskera á þessu svæði. Við erum að fá 3-4 tonn af korni á hektarann. Kornuppskera hér undir Eyjafjöllum er ekki undir þúsund tonnum,“ sagði Ólafur Eggertsson, bóndi á Þorvaldseyri og formaður Landssambands kornbænda.
Kornskurður hefur gengið mjög vel í haust og hafa kornbændur undir Eyjafjöllum ekki orðið fyrir neinum skakkaföllum hvað veðurfar snertir. Ólafur taldi að kornskurður hafi yfirleitt gengið vel á Suðurlandi.

Allur búrekstur Landbúnaðarháskólans á Hvanneyri verður færður undan skólanum og yfir í sérstakt rekstrarfélag um næstu áramót. Við þessa breytingu var ellefu starfsmönnum skólans sagt upp störfum, þar af fimm sem tengjast búrekstrinum.
Landbúnaðarháskólinn hefur rekið 70 kúa fjós á Hvanneyri og um 700 kinda fjárbú á Hesti í Borgarfirði. Ný útihús er á báðum stöðum og nýr mjaltaþjónn sér um mjaltir í Hvanneyrarfjósinu.

Í fjárlagafrumvarpinu sem lagt var fram í gær er niðurskurðarhnífnum beitt oft og víða. Meðal þess sem fyrir honum verður eru framlög ríkisins til bænda og samtaka þeirra. Framlög til þess að standa undir beingreiðslum til sauðfjár-, kúa- og garðyrkjubænda eru þó í samræmi við þá samninga sem gerðir voru um búvöruframleiðsluna í vor og sumar. Hins vegar eru framlög til ráðgjafarþjónustu dregin verulega saman. Alls nemur sá niðurskurður ríflega 100 milljónum króna sé borið saman við útgjöld til sama málaflokks á þessu ári. 87,2 milljónir eru teknar af liðnum Ráðgjafarþjónusta og búfjárrækt og 30 milljónir af liðnum þróunarverkefni og markaðsverkefni.

Námskeið í burðarhjálp verður haldið á Stóra Ármóti næstkomandi þriðjudag, þann 6. október. Námskeiðið er haldið á vegum endurmenntunardeildar Landbúnaðarháskólans og kennari er Grétar Hrafn Harðarson, dýralæknir og tilraunastjóri á Stóra-Ármóti.

Á laugardaginn var, 26. september sl., voru liðin 10 ár frá því fyrsti mjaltaþjónninn var tekinn í notkun hér á landi. Þá tóku Sæmundur, Svanborg og fjölskylda á bænum Bjólu í Rangárþingi ytra (þá Djúpárhreppi) í gagnið Lely Astronaut A2 mjaltaþjón.

Hinn 28. september urðu þær breytingar á útsendingartíma veðurfregna á RÚV, Rás eitt, að veðurspá, sem flutt hefur verið frá Veðurstofu Íslands að loknum fréttum kl. 16 verður framvegis klukkan 18:50. Með spánni verður einnig skýrt frá hæsta hita dagsins og mestu úrkomu. Í morgunfréttatíma, sem er kl. 10:03, er skýrt frá lægsta hita næturinnar.
Veðurfregnir frá Veðurstofu eru nú lesnar í útvarpi kl. 00:50, 4:30, 6:40, 10:03, 12:45, 18:50 og 22:07. Auk þess eru lesnar stuttar veðurfréttir með öðrum fréttum RÚV og annarra útvarpsstöðva.

Nýlega féll dómur í Héraðsdómi Suðurlands í máli sem varðaði heilbrigði og velferð dýra en umráðamaður þeirra var sakfelldur í málinu. Mál þetta byrjaði með ábendingu til Matvælastofnunar en í framhaldi var umhirða og ástand tveggja hrossa staðfest af héraðsdýralækni og héraðsráðunaut. Vegna bágs ástands hrossanna reyndist nauðsynlegt að aflífa hrossin. Um var að ræða tvær hryssur. Önnur hryssan var með hófsperru á öllum fótum og gat ekki hreyft sig úr stað. Holdafar hryssunnar var samkvæmt holdstigun á bilinu 1,0 (grindhorað) til 1,5 (horað). Hin hryssan hafði líka hófsperru en auk þess slæma sinubólgu á öllum fótum. Holdafar hennar var samkvæmt holdstigun á bilinu 1,5 (horað) til 2,0 (verulega aflögð).

Ný heimasíða www.beintfrabyli.is hefur nú litið dagsins ljós. Þar geta viðskiptavinir nálgast íslenskar landbúnaðarafurðir á auðveldan og skilvirkan hátt. Þar er hægt að leita eftir landshlutum, eftir vörum eða eftir ákveðnum bæ.
Beint frá býli, félag heimavinnsluaðila er félag bænda sem stunda eða hyggjast stunda sölu afurða beint frá býli bóndans á Íslandi.