Búnaðarsamband Suðurlands stendur sem kunnugt er fyrir viðamikilli Landbúnaðarsýningu dagana 22. – 24. ágúst n.k. á Gaddstaðaflötum við Hellu. Sýning sem þessi kostar mikið fé og því var leitað eftir samstarfi við nokkur fyrirtæki og stofnanir sem standa landbúnaðinum nærri.

Dýraheilbrigðissvið Matvælastofnunar, Landssamband hestamannafélaga og Landsmót ehf. höfðu samstarf um aukið eftirlit með dýravernd á nýafstöðnu landsmóti. Allir keppnishestar í fullorðinsflokkum voru heilbrigðisskoðaðir fyrir keppni og var þeirri skoðun fylgt eftir fyrir milliriðla og úrslit. Skoðunin, sem fengið hefur vinnuheitið “Klár í keppni”, fékk góðar viðtökur hjá knöpum og almennt var gerður góður rómur að þessu framtaki.

Yfirmaður landbúnaðarmála hjá Evrópusambandinu, Mariann Fischer Boel, biður þýska bændur um að hætta að senda sér mjólk í pósti. Hefur hún fengið um tíu þúsund lítra af mjólk senda og mikið af mjólkinni kemur með almennum pósti heim til hennar.

Stjórn Búnaðarsambands Suðurlands kom saman í gær, mánudaginn 7. júlí í tilefni af 100 ára afmæli Búnaðarsambandsins en afmælisdagurinn sjálfur var þann 6. júlí. Á fundinum var m.a. færðar til bókar hamingjuóskir Búnaðarsambandsins til sunnlenskra hestamanna með afar góðan árangur á nýafstöðnu Landsmóti hestamanna.

Það má með sanni segja að sýning stóðhesta á Landsmótinu á Hellu í gær hafi verið með miklum glæsibrag. Magnaðir hestar voru dæmdir í flokki 4 vetra stóðhesta. Seiður frá Flugumýri hlaut hæsta dóminn, hækkaði hæfileikaeinkunn eilítið, fór úr 8,33 í 8,35. Seiður lækkaði lítillega fyrir stökk en hækkaði á móti fyrir skeið. Hesturinn er lipur, léttbyggður og háfættur. Hann er með 8,5 fyrir vilja og geðslag og er afar jákvæður að sögn ræktandans Páls Bjarka Pálssonar á Flugumýri.

Sjávarútvegs- og landbúnaðarráðuneytið hefur birt auglýsingu um takmarkanir á sláturfjár innan og milli sauðfjárveikivarnarsvæða þar sem fram kemur að bannað er að flytja til slátrunar á Hornafirði fullorðið fé úr Mýrdals- og Skaftártunguhólfum og einnig af svæðum norðan Hamarsár. Sama gildir um fullorðið fé úr varnarhólfum vestan Þjórsár.
Auglýsinguna í heild sinni má sjá með því að smella á lesa meira.

Í tilefni af 100 ára afmæli Búnaðarsambands Suðurlands 2008 verður haldin landbúnaðarsýning á Gaddstaðaflötum við Hellu dagana 22.-24. ágúst næstkomandi. Sýningin á Hellu verður ein sú stærsta sinnar tegundar sem haldin hefur verið hérlendis um árabil. Landbúnaðarsýningin verður þróunar- og tæknisýning jafnframt því sem hún kynnir hlutverk og stöðu íslensks landbúnaðar í þjóðfélaginu. Markmið sýningarinnar er að kynna fjölbreytni íslensks landbúnaðar, hátt tæknistig og þá miklu þekkingu sem er að finna innan greinarinnar.

Allmargir bændur á Suðurlandi hafa nú þegar lokið 1. slætti sem hlýtur að teljast óvenju snemmt, þ.e. að ljúka honum í júní. Víðast hvar hefur viðrað vel til heyskapar, verið góður þurrkur og ættu því að hafa náðst hey með hámarksgæðum.
Þurrkurinn hefur hins vegar verið það mikill að sums staðar er hann farinn að hamla sprettu og þær skúrir sem fallið hafa undanfarna daga gera ekki mikið þó þær hjálpi vissulega til.

Hreppsnefnd Skeiða- og Gnúpverjahrepps samþykkti samhljóða á fundi sínum í gærkvöldi breytingu á aðalskipulagi sveitarfélagsins 2004-2016 varðandi Hvamms- og Holtavirkjun.

Dagskrá Landbúnaðarsýningarinnar er nú sem óðast að taka á sig mynd. Vönduð og fjölbreytt skemmtidagskrá verður í boði alla sýningardagana og verða hin árlegu Töðugjöld á Hellu hluti af dagskrá sýningarinnar.

Forseti Íslands, herra Ólafur Ragnar Grímsson, setur sýninguna föstudaginn 22. ágúst kl. 13 að viðstöddum boðsgestum. Kl. 14 verður sýningarsvæðið svo opnað almenningi. Laugardag og sunnudag hefst sýningin kl. 10 og stendur hún alla dagana til kl. 20.

Almannavarnanefndir á jarðskjálftasvæðinu á Suðurlandi hafa látið meta hættu á grjóthruni í kjölfar jarðskjálftanna. Niðurstöður rannsókna eru þær að hætta á grjóthruni er talin hafa aukist á svæðinu kringum Hamarinn við Hveragerði, Reykjafjall og Ingólfsfjall. Almannavarnanefndir hvetja fólk til sýna sérstaka aðgát og vera ekki á ferð á umræddum svæðum að nauðsynjalausu.

Mjólkursamsalan er að hefja sölu á skyri á Bretlandsmarkaði. Tilraunasendingar hafa farið í nokkrar heilsubúðir í London og nágrenni og stefnt er að því að Skyr.is verði til sölu í mörgum smásöluverslunum í haust.
MS hefur unnið að undirbúningi markaðssetningar skyrsins í Bretlandi um tíma. Að sögn Guðbrands Sigurðssonar, framkvæmdastjóra Nýlands ehf. sem annast útflutning mjólkurafurða fyrir MS, hefur tilraunaútflutningur gefist vel. Umfangsmeiri útflutningur hefst í haust þegar Skyr.is verður kynnt og boðið til sölu í smásöluverslunum.

Ekki er byrjað að farga sauðfé á bænum Brautarholti í Hrútafirði, þar sem riðuveikismit af afbrigðinu NOR98 greindist í mánaðarbyrjun. Að sögn Ásgeirs Sverrissonar, bónda í Brautarholti, stendur hann nú í viðræðum við Matvælastofnun um samning um förgun fjárins. „Þau mál eru bara á byrjunarstigi en ganga ágætlega,“ segir Ásgeir, sem býst ekki við því að gengið verði til verksins fyrr en í síðari hluta þessa mánaðar.

Því miður varð vefur Búnaðarsambands Suðurlands fyrir árás frægs vefhakkara fyrir helgina. Við það duttu út nokkrar fréttir sem settar voru inn dagana 4., 5. og 6. júní. Tæknimenn Aicon, sem hýsir vefinn, brugðust skjótt við og er nokkuð ljóst að vefurinn er ekki lengur árásarhæfur þar sem búið er að koma í veg fyrir að slíkar árásir geti átt sér stað, þó ekki sé til neitt sem heitir 100% öryggi.

Í síðustu viku var staðfest af Tilraunastöð Háskólans í meinafræði á Keldum að riða hefði greinst í einu sýni frá kind sem drapst á bæ í Hrútafirði í Vestur-Húnavatnssýslu. Á bænum eru um 300 vetrarfóðraðar kindur og óskaði bóndinn eftir að héraðsdýralæknir kæmi og rannsakaði kindina. Riða hefur ekki greinst áður í þessu varnarhólfi. Keldur hafa ennfremur staðfest að hér var um svokallað NOR 98 afbrigði af riðu að ræða – en slík tilfelli hafa komið upp áður hér á landi.

Sláttur er hafinn í Landeyjum, nánar tiltekið á Voðmúlastöðum í Austur-Landeyjum hjá Hlyni S. Theodórssyni og Guðlaugu B. Guðlaugsdóttur. Slegnir voru 14 hektarar sem borið var á snemma í vor. Þetta er með alfyrsta móti sem sláttur hefst á Suðurlandi en ekki met. Í því sambandi má nefna að sláttur hófst 28. maí árið 2003, 2. júní 2004, 4. júní 2005, 13. júní 2006 og 8. júní í fyrra.

Þórarinn Leifsson bóndi í Keldudal í Skagafirði var á ferð um Þverárfjallsveg, milli Sauðárkróks og Skagastrandar í morgun þegar hann sá sér til furðu ísbjörn vera að spóka sig um 100 metra frá veginum. Þórarinn telur að þetta sé fullvaxið dýr sem þar sé á ferð sem rölti í rólegheitum meðfram veginum á fjallinu.

Búast má við vöruskorti fram eftir vikunni vegna skemmda á búnaði í starfsstöð MS á Selfossi í jarðskjálftunum á fimmtudag. Starfsemin á Selfossi verður rekin með takmörkuðum afköstum fram eftir vikunni eða þar til viðgerðir hafa farið fram.

Strax eftir jarðskjálftann hóf Viðlagatrygging Íslands að skipuleggja viðbrögð. Haft var samband við tjónadeildir vátryggingafélaganna og munu þær annast mat og uppgjör innbústjóna og munu matsmenn vátryggingafélaganna bregðast hratt við. Var þetta kynnt af viðskiptaráðherra á ríkisstjórnarfundi í morgun.

Í nótt hafa verið stöðugir eftirskjálftar eftir stóra skjálftann í Ölfusi í gær, og hundruð skjálfta mælst. Stærstu skjálftarnir eftir miðnætti eru 3 – 3,5 stig, en aðeins fáir hafa farið yfir 3 stig.
Eðlilega virðist draga úr hrinunni samkvæmt upplýsingum frá Veðurstofunni. Veðurstofan telur að öllum líkindum sé ekki hætta á öðrum skjálfta í Ölfusi af svipaðri stærð og varð í gær.