Vegna aukinnar virkni í Eyjafjallajökli hefur almannavarnadeild Ríkislögreglustjóra beðið Matvælastofnun að hvetja alla þá sem hafa með búfjárhald að gera í nágrenni jökulsins að fylgjast vel með fréttum útvarpsstöðva. Nýjustu fréttir eru einnig að finna á heimasíðu Almannavarna: www.almannavarnir.is.
Búnaðarsamband Suðurlands hvetur umráðamenn búfjár á svæðinu til að fylgjast vel með fréttum, kynna sér rétt viðbrögð og vera viðbúnir ef ástæða verður til.

Vísindamannaráð almannavarna fundaði í morgun vegna aukinnar jarðskjálftavirkni í Eyjafjallajökli, en frá því um áramót hefur virkni færst í aukana. Í lok febrúar jókst svo virknin verulega og síðustu sólarhringana hefur hún verið viðvarandi. Nokkrir jarðskjálftanna hafa verið að stærðinni 2 – 3. Flestir eru á 7-10 kílómetra dýpi.
Almannavarnir eru með viðbragðsáætlun vegna eldgoss í Eyjafjallajökli. Vegna aukinnar virkni í jöklinum hefur verið ákveðið að virkja áætlunina á fyrsta háskastigi, óvissustigi, sem einkennist af atburðarás sem er hafin og ætla má að geti leitt til þess að öryggi fólks og/eða byggðar sé stefnt í hættu. Athuganir, rannsóknir, vöktun og mat er aukið og samráð milli almannavarna og þeirra stofnana sem málið varðar er aukið. Svona óróahrina leiðir ekki endilega til eldgoss.

Stofnfundur Félags ungra bænda á Suðurlandi fór fram sl. helgi, laugardaginn 27. febrúar. Fundargestir komu af öllu starfssvæði samtakanna en það spannar yfir Austur-og Vestur Skaftafellssýslur, Rangárvallasýslu og Árnessýslu. Greinilega er mikill áhugi á landbúnaði meðal ungs fólks á Suðurlandi og mikill sóknarhugur í ungum bændum en á fundinn mættu fast að 80 manns.

Á nýliðnu Búnaðarþingi sátur þar systur í fyrsta sinn í sögu þingsins. Þetta eru þær Guðrún Lárusdóttir í Keldudal í Hegranesi og Fanney Ólöf Lárusdóttir á Kirkjubæjarklaustri II. Fanney Ólöf, sem er ráðunautur hjá Búnaðarsambandi Suðurlands ásamt því að vera bóndi, situr sitt þriðja þing en Guðrún er í fyrsta sinn fulltrúi á Búnaðarþingi. Þær feta í fótspor móður sinnar, Sólrúnar Ólafsdóttur, sem var eitt sinn í stjórn Bændasamtakanna og sótti þar af leiðandi Búnaðarþing.

Föstudaginn 19. mars n.k. frá kl. 13.30 til kl. 17.00 verður opið fjós hjá Tilraunabúinu á Stóra Ármóti þar sem gestum og gangandi gefst kostur á að skoða aðstöðuna og fræðast um starfsemi búsins. Kynntar verða ýmsar tilraunaniðurstöður, sagt frá tilraunum í gangi og undirbúningi. Þá mun Kynbótastöð Suðurlands sýna klaufskurð og boðið verður upp á sýnikennslu í kúadómum.
MS verður með vörukynningu á staðnum og mun m.a. kynna nýja íþróttadrykkinn, Hleðslu.

Nú fyrir stundu var tilkynnt um úrslit í kosningum til stjórnar Bændasamtaka Íslands á Búnaðarþingi sem haldið er í Bændahöllinni. Haraldur Benediktsson var kjörinn formaður fyrr í dag með öllum greiddum atkvæðum eða 45. Að auki voru kosnir sex fulltrúar í stjórn samtakanna. Alls gáfu ellefu þingfulltrúar kost á sér til stjórnarsetu. Úrslit kosninganna voru þau að Sveinn Ingvarsson í Reykjahlíð fékk 45 atkvæði, Jóhannes Sigfússon á Gunnarsstöðum fékk 41 atkvæði, Sigurbjartur Pálsson á Skarði fékk 40 atkvæði, Vigdís M. Sveinbjörnsdóttir á Egilsstöðum fékk 40 atkvæði, Árni Brynjólfsson á Vöðlum fékk 23 atkvæði og Guðný Helga Björnsdóttir á Bessastöðum fékk 22 atkvæði.

Atli Gíslason formaður sjávarútvegs- og landbúnaðarnefndar segir sameiginlegan fund nefndarinnar og efnahags- og skattanefndar með fulltrúum Bændasamtakanna hafa verið mjög gagnlegan. „Það var mikill skilningur hjá þingmönnum og samstaða um að bregðast við þessum mikla vanda bænda. Ráðneytin voru hvött til að leggja til lagabreytingar sé þeirra þörf, bæði varðandi breytingar á virðisaukaskatti, áframhaldandi frystingu lána og möguleg þvingunarúrræði gagnvart fjármögnunarfyrirtækjum. Þingnefndirnar lýstu því yfir að þær væru tilbúnar að gera allt sem í þeirra valdi stæði til að flýta slíkum málum í gegnum þingið.

Með lögum nr. 128 frá 23.desember 2009 var horfið frá því fyrirkomulagi að tekjur úr veiðifélögum verði ávallt skattlagðar sem fjármagnstekjur utan rekstrar.
Fyrirkomulagið hafði verið gagnrýnt enda mátti hvorki nýta beinan kostnað á móti tekjum né tap af rekstri. Þannig voru dæmi um að rekstraraðilar hafi þurft að greiða fjármagnstekjuskatt vegna þessara tekna án nokkurs frádráttar á sama tíma og þeir hafa átt ónotað tap af rekstri sínum.

Ef ekki væri stundaður landbúnaður á Íslandi þyrftu landsmenn að verja um 100 milljónum króna á hverjum degi í kaup á erlendum landbúnaðarvörum sem skapa myndi tilheyrandi vöruskiptahalla. Þess í stað skilar íslenskur landbúnaður á bilinu 35 til 40 milljörðum í ríkisskassann árlega þegar frá eru talin erlend aðföng. Íslenskur landbúnaður skapar því bæði gjaldeyri og sparar hann að sama skapi. Þó slíkt hafi alltaf verið mikilvægt hlýtur það að teljast mikilvægara nú en nokkru sinni. Innlendar landbúnaðarvörur hafa á undanförnum misserum haldið niðri matarverði og verið þáttur í að halda niðri verðbólgu hér á landi.

Sjávarútvegs og landbúnaðarráðherra, Jón Bjarnason, fundaði um stöðuna í skuldamálum bænda í síðast liðinni viku með Atla Gíslasyni, þingmanni og formanni sjávarútvegs- og landbúnaðarnefndar, Lilju Mósesdóttur formanni efnahags- og viðskiptanefndar, Jóni Gunnarssyni þingmanni, Haraldi Benediktssyni formanni Bændasamtaka Íslands, Sigurgeiri Þorgeirssyni ráðuneytisstjóra í sjávarútvegs- og landbúnaðarráðuneytinu, Jóhanni Guðmundssyni aðstoðarmanni ráðherra, Ingimar Jóhannssyni skrifstofustjóra í ráuðneytinu og fulltrúum viðskiptabankanna sem fara með málefni bænda.

Staða landbúnaðarins meðal þjóðarinnar hefur sjaldan eða aldrei verið sterkari, segir Haraldur Benediktsson, formaður Bændasamtaka Íslands. Hann kynnti nýja könnun um afstöðu þjóðarinnar til landbúnaðarins og til Evrópusambandsaðildar við setningu Búnaðarþings í dag.

Jón Bjarnason, sjávarútvegs- og landbúnaðarráðherra, afhenti bændunum á Hrauni á Skaga og Grænhóli í Ölfusi landbúnaðarverðlauninin 2010. Verðlaunin eru sem áður gripir úr höndum Ívars Björnssonar gullsmiðs og leturgrafara. Ráðherra sagði að tilgangurinn verðlaunanna væri einkum að vekja athygli á því sem vel er gert í landbúnaði.
Hér á eftir fer texti úr ræðu Jóns Bjarnasonar um búin tvö:

Snjóflóð féll við bæinn Garða í Reynishverfi í Mýrdal í gærkvöldi, færði traktor og bíl úr stað og reif niður girðingar. Íbúðarhúsið var rýmt í kjölfarið og gista ábúendur annars staðar. Snjóflóðahætta er enn við bæinn og einnig við bæinn Lækjarbakka í sömu sveit.

…á árshátíð Landsambands kúabænda sem haldin verður á Hótel Sögu laugardaginn 27. mars n.k. Miða og herbergjapantanir eru í síma 525 9930 eða á sales.saga.reykjavik@radissonsas.com

Lagt er til að ríkið geri samning við svínabændur um starfsskilyrði greinarinnar, í skýrslu starfshóps um eflingu svínaræktar. Jafnframt er varað við samþjöppun framleiðslunnar og vakin athygli á því að unnt er að margfalda notkun byggs við framleiðslu svínakjöts.
Erfiðleikar eru í svínaræktinni um þessar mundir og afkoma framleiðenda slæm. Miklar sveiflur hafa verið í framleiðslunni á undanförnum árum og þótt neyslan hafi aukist hafa komið tímabil mikillar offramleiðslu. Verð hefur lækkað og framleiðendur orðið gjaldþrota.

Laugardagskvöldið 27. febrúar verður haldinn stofnfundur Félags ungra bænda á Suðurlandi, F.U.B.S., í Árhúsum á Hellu og hefst fundurinn kl. 20.30.
Samtök ungra bænda voru stofnuð þann 23. október á síðasta ári. Stofnfundurinn fór fram í Dalabúð fyrir vestan og skráðu rúmlega 100 manns sig sem stofnfélaga.
Helstu markmið samtakanna er að greiða fyrir og efla nýliðun í landbúnaði, bæta ímynd landbúnaðarins, efla og styrkja íslenskan landbúnað, efla félagsstarf meðal ungra bænda og standa vörð um menntun og rannsóknarstarf í landbúnaði.

Einar Kr. Guðfinnsson og Guðlaugur Þór Guðlaugsson, þingmenn Sjálfstæðisflokks hafa sent formönnum Sjávarútvegs- og landbúnaðarnefndar og Viðskiptanefndar bréf og óskað eftir sameiginlegum fundi nefndanna þar sem farið verði yfir skuldamál í landbúnaði og þau úrræði sem standi bændum til boða.

Héraðsdómur Reykjavíkur hefur komist að þeirri niðurstöðu að óheimilt sé að binda skuldbindingar í íslenskum krónum við gengi erlendra gjaldmiðla en maður á Akureyri var sýknaður af kröfu Lýsingar hf. vegna eftirstöðva af bílaláni. Lánið var veitt í íslenskum krónum og bundið dagsgengi erlendra mynta.
Í dómsorði segir m.a.: „Viðskiptaráðherra skipaði árið 2000 nefnd til að endurskoða vaxtalög nr. 25/1987 og lagði fram frumvarp á 126. löggjafarþingi sem varð að lögum nr. 38/2001. Í almennum athugasemdum með frumvarpinu segir: „Þær breytingar sem lagðar eru til að gerðar verði á verðtryggingarkafla vaxtalaga eru eftir farandi: Heimildir til að binda skuldbindingar í íslenskum krónum við gengi erlendra gjaldmiðla eru felldar niður …“

Aðalfundur Félags sauðfjárbænda í Árnessýslu verður haldinn í Þingborg föstudaginn 26. febrúar nk. kl. 20.30 Sigurgeir Sindri Sigurgeirsson, formaður Landssamtaka sauðfjárbænda, kemur á fundinn og segir frá starfsemi samtakanna.
Margrét Ingjaldsdóttir ráðunautur segir frá og sýnir myndir úr námsferð frá Noregi og Svíþjóð. Þar heimsótti hún meðal annars sel, fjárhús með áhugaverðu gjafakerfi, ostaframleiðslu o.fl.

Farið var þess á leit við Evrópusambandið að gagnagrunnurinn WF, með lyfjaskráningum, yrði viðurkenndur sem rafrænn hestapassi. Sú viðurkenning hefur nú fengist og mun liðka fyrir útflutningi á reiðhestum, kynbótahrossum og hrossakjöti. Engin fordæmi eru fyrir rafrænum hestapassa innan ESB og má segja að WF hafi rutt brautina.