Í Fréttablaðinu í dag er grein eftir Ögmund Jónasson, alþingismann og formann BSRB, þar sem hann gagnrýnir viðbrögð Samkeppniseftirlitsins gagnvart hagsmunagæslu Bændasamtaka Íslands fyrir bændur. Þar veltir hann því upp hvort Samkeppniseftirlitið sé orðið endanlega galið og hvort Bændasamtökunum beri ekki beinlínis skylda til að vinna að hagsmunum bænda.

Landeigandi á Norðurlandi hefur, með dómi, losnað undan fjallskilaskyldu þar sem hann nýtir ekki afrétt. Hann fékk ógilt fjárnám sem Eyjafarðarsveit hafði látið gera til greiðslu fjallskilagjalda.
Á síðasta ári var gert fjárnám í eigum Harðar Snorrasonar, bónda í Hvammi í Eyjafjarðarsveit, vegna vangoldinna fjallskilagjalda til Eyjafjarðarsveitar fyrir árin 2003-2006 en þau námu tæpum hundrað þúsund krónum.

Rafmagnstafla í aðstöðurými tilraunafjóssins á Stóra-Ármóti brann yfir í fyrradag og einskær heppni að ekki hlytist af bruni. Unnið hafði verið að þrifum í aðstöðunni og líklegasta skýringin sú að vatn hafi náð að leka inn í töfluna eftir köplum sem tengdir eru ofan í töfluna og þannig orsakað skammhlaup.

Nýtt 150 bása fjós, búið tveimur mjaltaþjónum, verður tekið í notkun í Flatey á Mýrum í Austur-Skaftafellssýslu eftir 3-4 vikur. Fyrirtækið Lífsval á Akureyri á búið og sagði Jón Björnsson, framkvæmdastjóri Lífsvals, að nú væri verið að leggja lokahönd á fjósið en erfitt veðurfar í vetur hefði tafið framkvæmdirnar.

Þörf er á viðamikilli rannsókn þar sem sauðfjárbændur og Matvælastofnun leggjast á eitt um að komast að því hvað veldur því að ungar ær láta lömbum. Þetta er mat Halldórs Runólfssonar yfirdýralæknis.
Halldór segir talsvert hafa verið rannsakað á síðasta ári hvað kunni að valda lambadauða og hversu hátt hlutfall gemlinga lætur lömbum áður en þau koma í heiminn. Einhlýt skýring hafi ekki fundist. Hann telur þó ekki um nýjan sjúkdóm að ræða.

Spennandi folar hafa verið skráðir ti leiks á Ungfolasýningu Hrossaræktarsamtaka Suðurlands sem fram fer í Ölfushöllinni á laugardaginn 22.mars n.k. 
Meðal hesta sem skráðir hafa verið eru synir Álfasteins frá Selfossi, Parkers frá Sólheimum, Töfra frá Kjartansstöðum, Glóðars frá Reykjavík, Stála frá Kjarri, Snæs frá Bakkakoti, Keilis frá Selfossi og Gaums frá Auðsholtshjáleigu. Af frægum mæðrum eru Rispa frá Eystri-Hól og Þruma frá Selfossi.
 

Pétur Blöndal bar á dögunum fram nokkrar spurningar til sjávarútvegs- og landbúnaðarráðherra á Alþingi um innflutning á landbúnaðarvörum. Meðal annars spurði þingmaðurinn hvernig innflutningur landbúnaðarvara með tollkvótum hafi þróast sem hlutfall af innanlandsneyslu?

Íslenskir bændur bíða ekki í röðum eftir að geta hafið lífrænan búskap. Ekki er nægur fjárhagslegur hvati til að fara út í slíkt hér á landi miðað við núgildandi reglur. Ekki stendur þó á faglegri þjónustu Bændasamtakanna, segir formaðurinn, Haraldur Benediktsson, sem segir óraunhæft að ætla sér að ná því markmiði sem sett hefur verið fram í þingsályktunartillögu, að 15% framleiðslunnar verði vottuð lífræn að 12 árum liðnum. Í dag er hlutfallið innan við 1%, líkt og fram kom í máli Ólafs Dýrmundssonar landnýtingarráðunautar í Morgunblaðinu í gær.

Finnst þér að áhugamál þitt / atvinna njóti lítils skilnings og að félagar þínir í sauðfjárrækt séu fáir? Ert þú vondaufur um framtíðina eða hyggst þú sækja fram?

Félag sauðfjárbænda í Árnessýslu er að leita að þér, því nú leitum við félaga, gamalla og nýrra, sem vilja skapa tengsl og samstöðu meðal sauðfjárbænda, efla sauðfjárrækt og láta sig varða kjara- og markaðsmál.

Tillaga um að taka mögulega sölu á Hótel Sögu til umræðu var felld á Búnaðarþingi í gær en 23 fulltrúar greiddu atkvæði gegn henni á móti 22 sem studdu hana. Bændasamtökin eiga bæði Hótel Sögu og Hótel Ísland og hefur hið síðarnefnda verið til sölu frá því í júní.

Búnaðarþingi lauk í gær og var eftirfarandi kjaramálaályktun samþykkt við lok þingsins:

Eins og Bændasamtök Íslands hafa bent á síðustu mánuði hefur rekstrarkostnaður í landbúnaði hækkað verulega um heim allan. Hliðstæð þróun blasir við hér og rekstrarútgjöld íslenskra bænda hafa á síðustu vikum og mánuðum hækkað meira en áður hefur þekkst.

Yfirlýsingar Skúla Thoroddsens, framkvæmdastjóra Starfsgreinasambandsins (SGS), í frétt í 24 stundum í gær um kröfur Búnaðarþings í kjaramálum hafa valdið allnokkrum titringi. Í drögum að kjaramálaályktun þingsins er lögð áhersla á að tollar á innfluttar landbúnaðarvörur verði ekki lækkaðir. Skúli sagði þær kröfur út í bláinn.

Aðalsteinn Baldursson, sviðsstjóri matvælasviðs Starfsgreinasambandsins, segir þetta ekki rétta lýsingu á afstöðu SGS.

Skiljanlegt er að landeigendum við neðri hluta Þjórsár, þar sem áform eru uppi um að reisa þrjár virkjanir, finnist ganga hægt í samningaviðræðum við Landsvirkjun. Þetta segir Þorsteinn Hilmarsson, upplýsingafulltrúi Landsvirkjunar. Í Morgunblaðinu á dögunum sagði Renate Hanneman, landeigandi á Herríðarhóli í Ásahreppi, að enginn gangur væri í samningaviðræðum við landeigendur á svæðinu.

Föstudaginn 7. mars nk. verða verðlaunaveiting og fræðslufundur í nautgriparækt í Þingborg í Flóa kl. 13.15. Afhent verða verðlaun fyrir hæst dæmdu kýr í kúaskoðun 2006 og 2007, þ.e. kýr fæddar 2002 og 2003.
Auk þessa verða landsráðunautar Bændasamtaka Íslands, Gunnfríður E. Hreiðarsdóttir og Magnús B. Jónsson, með fræðsluerindi, m.a. um nýtt skýrsluhaldskerfi í nautgriparækt og kynbætur nautgripa.

Vefur Bændasamtaka Íslands hefur fengið andlitslyftingu en í dag sunnudaginn 2. mars 2008 er nýi vefurinn opnaður. Með vefnum vonast Bændasamtökin til þess að geta veitt viðskiptavinum sínum enn betri þjónustu en áður á vefnum. Með tíð og tíma verða kynntar nýjungar sem eiga vafalaust eftir að gagnast bændum og öðrum notendum vel, segir á forsíðu nýja vefsins.

Daníel Jónsson, kúabóndi á Ingunnarstöðum í Reykhólasveit, segir að flótti sé kominn í raðir bænda og nauðsynlegt sé að þeir fái 30 króna hækkun fyrir hvern mjólkurlítra nú þegar til að mæta 50 til 100% hækkunum á aðföngum til bænda á undanförnum tveimur árum.

Smitsjúkdómurinn hringskyrfi hefur verið staðfestur á bæ í Skagafirði. Fyrstu varúðarráðstafanir hafa verið fyrirskipaðar en ákvörðun um nánari aðgerðir verður tekin á næstu dögum. Síðast liðið haust greindist hringskyrfi á bæ í Eyjafirði en hafði þá ekki greinst hér á landi síðan árið 1988. Þetta gefur tilefni til að óttast að hringskyrfi sé útbreiddara en talið hefur verið. Það er því ástæða til að hvetja alla sem umgangast nautgripi að hafa augun opin fyrir einkennum sem gætu bent til sjúkdómsins og hafa samband við héraðsdýralækni ef minnsti grunur vaknar.

Fjöldi fyrrverandi félagsmanna í Mjólkursamsölunni gæti átt rétt á auknum greiðslum úr séreignarsjóði samsölunnar. Fjárhæðirnar gætu hlaupið á tugum og jafnvel hundruðum milljóna.

Stjórn Lífeyrissjóðs bænda samþykkti nýjar lánareglur fyrir sjóðinn þann 25. febrúar sl.  Hámarkslán voru hækkuð úr 6 mkr. í 25 mkr. pr. sjóðfélaga en takmarkast að öðru leyti við verðmat löggilts fasteignasala. Lágmarkslán sjóðsins er 500 þús. Jón Hólm Stefánsson fasteignasali á Gljúfri í Ölfusi mun taka að sér verðmat á bújörðum vegna lánveitinga sjóðsins.  Gera má ráð fyrir að í auknum mæli verið krafist greiðslumats vegna lánsumsókna og verður bændum beint til búnaðarsambanda.

Beint frá býli hefur látið gera sérstakt merki fyrir býli sem framleiða matvöru úr eigin hráefni á býlinu og selja beint til notenda. Merkið má til dæmis nota á vörur sem eru framleiddar og seldar á býlunum og í auglýsingum. Áhersla er lögð á matvæli sem byggja á íslenskri matarhefð.