Framkvæmdastjóri Bændasamtakanna færir norskum kollegum þakkir

Eiríkur Blöndal framkvæmdastjóri Bændasamtakanna ávarpaði í gær aðalfund norsku bændasamtakanna, Norges Bondelag sem stendur yfir í Lillehammer. Í ræðu sinni fór Eiríkur yfir stöðu landbúnaðar á Íslandi nú um stundir og tæpti á helstu málum sem hafa verið og eru í forgrunni í vinnu Bændasamtaka Íslands. Lýsti hann sérstaklega baráttu Bændasamtakanna gegn ESB-aðild og þakkaði Norges Bondelag fyrir stuðning í þeirri baráttu.

Eiríkur nefndi einnig fjármálakreppuna sem ríkir hér á landi og hefur haft veruleg áhrif á lífsafkomu margra bænda. Ekki væri til að bæta úr skák að eldgos hefði hafist í Eyjafjallajökli í ofanálag sem hefði ollið gríðarlegu tjóni og orðið til þess að grípa þyrfti til mjög róttækra aðgerða til stuðnings bændum á Suðurlandi. Þakkaði hann norskum bændum fyrir þeirra myndarlega fjárhagsstuðning vegna eldsumbrotanna sem yrði nýttur til að kosta afleysingaþjónustu fyrir bændur.

Hér má sjá viðtal norska bændablaðsins Bondebladet við Eirík.