Fréttir
Nautís kálfar í einangrun
Þann 10 september voru þeir 21 Angus kálfar sem fæddust í vor og sumar teknir frá og settir í 9 mánaða einangrun sem mun þá ljúka 10 júní 2026. Það eru 12 naut og 9 kvígur. Meðalþynging frá fæðingu að fráfærum var 1318 gr/dag sem er meira en hjá sambærilegum hópi í fyrra. Elstu kálfarnir voru fæddir í byrjun apríl en þeir yngstu um 20. júlí. Burðurinn verður færður aðeins fram en mikilvægt er að kálfarnir geti verið sem lengst undir mæðrum sínum og nýtt beitina meðan hún er sem best. Þeir eru undan einu reyndu nauti, Hovin Milorg og þremur ungnautum sem eru lítið skyld þeim gripum sem fyrir eru. Ungnautin heita Lis Roll in one, Hovin Sokrates og Lis Super Nugget.
Útboð holdagripa hjá Nautís 2025
Þann 9. júlí sl fór fram útboð á 15 holdagripum hjá Nautís. Þar af 8 naut og 7 kvígur. Tilboð komu frá 15 rekstraraðilum. Kvígurnar seldust á 860 þús. að jafnaði en nautin á 1587 þús sem eru svipuð verð og í fyrra. Áður hafði 2 nautum verið fargað, annar var eineistungur og hinn með laka fótstöðu. Kvigurnar voru hjá nauti og eru vonandi fengnar. Nautís óskar nýjum eigendum til hamingju með gripina og vonar að þeir gagnist vel. Myndin er af Mola 24402 en hann er nú á Nautastöðinni Hesti þar sem sæði úr honum verður kyngreint nú í ágúst.
Burði hjá Nautís lokið 2025
Burður hjá Nautís hófst snemma í apríl og lauk nú seint í júlí. Kýrnar voru sæddar og var um 70% sem héldu við fyrstu sæðingu. Alls fæddust 22 kálfar og gekk burður yfirleitt mjög vel. Fæðingarþungi flestra kálfanna var á bilinu 35 kg til 40 kg en þess var gætt að gefa kúnum síðslegið og trénað hey fyrir burð. Einn kálfur drapst vikugamall og við krufningu kom í ljós að hann var með hjartagalla. Það eru því til 12 nautkálfar og 9 kvígukálfar. Kálfarnir eru undan reynda nautinu Hovin Milorg og svo ungnautunum L. Roll in one, L.S. Nugget og Hovin Sokrates. Þau voru fyrst og fremst valin út frá skyldleika (fjarskyld) en höfðu einnig kom vel út úr einstaklingsprófi á rannsóknastöð Norðmanna í Staur þar sem m.a. átgeta, fóðurnýting og vaxtarhraði er metin ásamt útliti og skapferli. Burði verður flýtt og æskilegt að kálfarnir fæðist í apríl og maí
