Niðurstöður úr gróðursýnum 17. maí 2010

Hér eru birtar niðurstöður úr gróðursýnum sem tekin voru þann 17. maí 2010. Um er að ræða magn flúors (ppm – mg/kg þurrefnis) á gróðri og í skolvatni. Gera verður fyrirvara um niðurstöðu í sýni frá Efstu-Grund, þar gæti niðurstaðan verið lægri.

Dags.	Bær	Flúor (F-)ppm (mg/kg) í þurrefni
17. maí 2010	Raufarfell	401
17. maí 2010	Efsta-Grund	137
17. maí 2010	Hlíð	167
17. maí 2010	Núpur	94
17. maí 2010	Voðmúlastaðir	25
17. maí 2010	Sólheimahjáleiga	162
17. maí 2010	Hraungerði	31
17. maí 2010	Ytri-Ásar	7
17. maí 2010	Butra	86
17. maí 2010	Efri-Ey	15

Flest sýnanna eru yfir þolmörkum fyrir nautgripi með þeim undantekningum að sýnin frá Efri-Ey og Ytri-Ásum eru undir þeim mörkum. Þá er sýni frá Voðmúlastöðum á þeim mörkum. Hvað sauðfé snertir þá eru þau sýni sem eru undan Eyjafjöllunum og vestast i Mýrdalnum (Sólheimahjáleiga) vel yfir þolmörkum sauðfjár. Sýni frá Butru í Fljótshlíð er um eða aðeins yfir þolmörkum sauðfjár en önnur sýni vel undir.

Greinilegt er að flúorinn skolast fljótt úr öskunni ef rignir á annað borð nema að um verulegt öskulag sé að ræða. Miðað við þessar niðurstöður er alls ekki óhætt að beita búfénaði undir Eyjafjöllum og alla vega vesturhluta Mýrdals sem og innst í Fljótshlíð. Þetta er svæðið næst eldstöðinni. Ekki virðist ástæða til að hafa áhyggjur af öðrum svæðum meðan ekki verður meira öskufall en þarna var orðið. Að sjálfsögðu breytir úrkoma þessari mynd fljótt.