Áhugavert

Tenglar

Stóra Ármót > Tilraunir > Tilraunir í gangi >

Tilraunir í gangi

Hraustar kýr

Flokkur: Fóðuröflun og fjölbreytt framleiðslukerfi     Upphafsár: 2008

Tengiliður: Grétar Hrafn Harðarson       Netfang: ghh@lbhi.is   
 
Aukin sjálfbærni í fóðrun mjólkurkúa
Kostnaður við aðföng hefur stóraukist undanfarin misseri, einkum vegna verðhækkana á áburði, kjarnfóðri og eldsneyti. Í kjölfarið er líklegt að á næstu árum verði lögð áhersla á aukna sjálfbærni við öflun fóðurs.  Reyndar sjást þess nú þegar merki í aukinni fjölbreytni í gróffóðuröflun og stóraukinni byggrækt.  Aðalógnin í þessari þróun er þó sú að aukin fóðrun auðgerjanlegra kolvetna eins og byggs leiðir í fyrsta lagi til aukinnar framleiðslu eiturefna í vömb og í öðru lagi til lækkunar á sýrustigi og bólguviðbragða einnig í vömb. Vonast er til að niðurstöður geti verið leiðbeinandi í því hversu mikið magn byggs er óhætt að gefa án þess að það komi niður á heilsufarsþáttum gripsins. Ávinningurinn yrði markvissari og betri nýting á heimöfluðu byggi.
 

Júgurhreysti

Flokkur: Heilbrigði í framleiðslu og heilnæmar afurðir     Upphafsár: 2010

Tengiliður: Grétar Hrafn Harðarson       Netfang: ghh@lbhi.is   
 
Áhrif Startvac® bóluefnis á júgurheilbrigði
Í marga áratugi hefur verið unnið án mikils árangurs að rannsóknum og þróun bóluefna gegn júgurbólgu.  Nú er komið á markað bóluefni, Startvac®, sem fengið hefur viðurkenningu Evrópusambandsins.  Markmið þessa verkefnis er að skoða áhrif bóluefnisins á júgurheilbrigði íslenskra kúa.  Valdar verða allt að 300 kýr frá 10 búum, þremur búum LbhÍ auk 7 annarra.  Helmingur kúnna fær meðferð og hinn helmingurinn verður viðmiðunarhópur.  Kýrnar eru flokkaðar í fyrsta kálfs kvígur og eldri kýr og parað er saman innan flokka.  Tilviljun ræður svo í hvorn meðferðarhópinn hver lendir.  Fylgst verður með tíðni júgurbólgu, einstaklingstengdri frumutölu og tíðni sýktra spena í upphafi og lok rannsóknar.
 

Kvígur 24

Flokkur: Fóðuröflun og fjölbreytt framleiðslukerfi     Upphafsár: 2010
 
Tengiliður: Grétar Hrafn Harðarson       Netfang: ghh@lbhi.is  
 
Áhrif mismunandi fóðursamsetningar á vöxt og þroska kvígna
Í verkefninu verða skoðuð áhrif mismunandi fóðursamsetningar á vöxt og þroska kálfa og kvígna, með það að meginmarkmiði að finna heppilegustu samsetningu sem fullnýtir vaxtargetu gripanna á hverjum tíma, án þess þó að um óhóflega holdsöfnun verði að ræða. Ætla má að íslenskir kúabændur séu að tapa umtalsverðum peningum eða á bilinu 100–150 milljónum króna á ári ef stuðst er við bandaríska kostnaðarútreikninga með því að láta kvígur bera 28 mánaða gamlar en ekki 24 mánaða. Kostnaðurinn felst einkum í aukinni þörf á húsnæði, auknu viðhaldsfóðri, meiri vinnu og lakari frjósemi. Ávinningur verkefnisins er að draga úr þeirri sóun sem fólgin er í þessum háa aldri við fyrsta burð. Verkefninu er ætlað að gera ráðgjöf til bænda á þessu sviði markvissari.
 
Frjáls aðgangur að sýrðri mjólk – áhrif á vöxt og þroska kvígna
Í verkefninu verða skoðaðar tvær mismunandi fóðrunaraðferðir á mjólkurskeiðinu.  Báðar miðast þær við að koma til móts við vaxtargetu ungkálfanna, en rannsóknir í BNA hefa sýnt að vöxtur og þroski þetta tímabil hefur mikil áhrif á afurðir. Einnig er mikilvægt að fullnýta vaxtargetu gripanna á hverjum tíma uppeldisins til að tryggja kvígum nægan þroska til að bera 24 mánaða gamlar. Ávinningur verkefnisins felst í því að þróa fóðrun og umönnun kálfa sem stuðlar að góðum þroska hjá framtíðarmjólkurkúm þessa lands og þannig draga úr þeirri sóun sem fólgin er í háum burðaraldri og litlum afurðum. Verkefninu er ætlað að gera ráðgjöf til bænda á þessu sviði markvissari.

Prenta þessa síðu