Bændafundir haustið 2013

Nú fer að líða að bændafundum Bændasamtaka Íslands.  Undanfarin haust hefur þátttaka bænda á fundunum verið minni en væntingar stóðu til, BÍ kallar því eftir óskum bænda um hvað þeir vilja ræða á fundunum.  Í nýjasta Bændablaðinu (3.okt.) er farið yfir fundarformið, forystumenn úr stjórn BÍ verða með stutt inngangserindi en síðan verða tekin fyrir ákveðin málefni sem heimamenn óska eftir. Einnig er möguleiki á að fá utanaðkomandi fyrirlesara til að fjalla um afmörkuð mál.  Bændur eru hvattir til að koma með fundarefni,  það má gera með því að hringja í Búnaðarsamband Suðurlands 480 1800 eða senda póst á Helgu Sigurðardóttur helga@bssl.is eða Svein Sigurmundsson sveinn@bssl.is.  Fundarefni þurfa að berast sem fyrst, eigi síðar en 11. okt. svo hægt sé að skipuleggja fundina.  Við hvetjum líka alla bændur til að vera duglegir að mæta á fundina, því máttur heildarinnar er mikill.

Dæmi um fundarefni, sem fróðlegt væri að fjalla um.  

• Landbúnaðarklasinn – aukin samvinna þeirra sem tengjast landbúnaði 
• Vinnuvernd í landbúnaði – stofnun langtímaverkefnis 
• Endurskoðun náttúruverndarlaga 
• Sóknaráætlun ríkisstjórnarinnar og landbúnaður 
• Hvernig á að ýta undir þróun í lífrænum landbúnaði? 
• Tollaumhverfi og heimsviðskipti með mat, þróun í PSE 
• Hamfaratryggingar, hvað má læra af undangengnum hallærisárum? 
• Breytt leiðbeiningaþjónusta bænda – árangur – framtíð 
• Nýjar búgreinar – sóknarfæri í nýsköpun 
• Hugbúnaðarþróun fyrir bændur 
• Íslensku búfjárkynin – varðveisla erfðaauðlinda og framtíð landbúnaðar 
• Ímyndar- og kynningarmál landbúnaðarins 
• Fjármögnun í landbúnaði 
• Fyrirlestur sérfræðings um vinnuumhverfi með áherslu á streitu og starfsgleði 
• Heimavinnsla matvæla og sala beint frá býli

Þetta er enganveginn tæmandi listi og því væri gaman að aðrar hugmyndir frá bændum og sjá þá á fundunum.