Forsíða - BSSL

Nánar

26.7.2010 14:23

SS: Verðlækkun á dilkakjöti er líður á sláturtíðina
ss.is

Sláturfélag Suðurlands, SS, kynnti í fréttabréfi í síðustu viku verðskrá sína fyrir haustslátrun á kindakjöti. Staðgreiðslu verður haldið áfram, föstudag eftir lok hverrar innleggsviku. Afurðaverðið í dilkakjöti lækkar hins vegar í öllum flokkum um 39,0 kr/kg frá árinu 2009, en verð af fullorðnu stendur í stað. Sláturleyfishafar hafa fengið sem nemur 35,25 kr/kg greitt frá BÍ í vaxta- og geymslugjald. Þessir fjármunir eiga nú að fara beint til bænda en ekki í gegnum afurðaverð hjá sláturleyfishöfum. Því lækkar afurðaverðið hjá SS í kindakjötinu sem þessu nemur. Sú nýbreytni er nú tekin upp að afurðaverðið er breytilegt eftir tímabilum, hæst fyrstu vikur sláturtíðarinnar en lækkar svo er líður á sláturtíðina. Verðið fer úr 110% af fullu verði niður í 96%.

Rétt er að vekja athygli á því að verðbólga mælist nú 5,7% á ársgrunni. Beingreiðslur til bænda munu einungis hækka um 2% á þessu ári. Til viðbótar er óvissa um mótframlag ríkisins til Lífeyrissjóðs bænda og tryggingargjald hefur hækkað verulega síðustu misseri. Þetta þýðir kjaraskerðingu fyrir sauðfjárbændur á næstu misserum.

Af öðrum kjötgreinum nefnir SS að sala á nautakjöti gengur vel. Söluaukningin á landsvísu var 8% í júní og 6% á 12 mánaða tímabili. Jafnframt hefur verð hækkað. Í hrossakjötinu er skortur á hrossum til slátrunar og verð hefur hækkað eilítið. Í svínakjötinu er hins vegar mikið offramboð og veruleg birgðasöfnun hefur átt sér stað síðustu mánuði, þrátt fyrir lágt verð. Afkoma svínabænda er bágborin.

Til baka